Read new_tumbuka_bible Ezekiyele 17 Bible Online

Ezekiyele 17 - new_tumbuka_bible bible

Ezekiyele 17

¹Mazgu gha FUMU ghakiza kwa ine kuti,

²“Iwe mwana wa munthu, uyowoye chinthanguni ku ŵaIsraele, ndipo uyowoyere mu ntharika.

³Uyowoye kuti FUMU Chiuta wakuti, ‘Nombo yikuru ya mapapindo ghakuru na ghatali, na mahungwa ghanandi gha mathotomathoto, yikiza ku charu cha Lebanoni. Yikakora munthavi wa pachanya pa khuni la milanje.

⁴Yikaphorapo munthavi wa pachanya chomene ndipo yikaruta nawo ku charu cha ŵamalonda, na kuwuŵika mu msumba wa ŵanthu ŵa malonda.’ ”

⁵“Ndipo yikatora mbuto ya mu charu zira na kuyipanda mu nyata yiweme mu mphepete mwa mronga. Yikandipanga nga ndi khuni la munyezani.

⁶Ndipo yikamera na kuzgoka kuŵa khuni la mpheska, leneilo minthavi yakhe yikathazira musi, kurazga ku nombo yira, misisi yakhe nayo yikakuranga kusi kwakhe. Ntheura likazgoka kuŵa khuni la mpheska leneilo likaŵa na minthavi, ndiposo na mahamba.”

⁷“Kukaŵaso nombo yinyakhe yikuru, ya mapapindo ghakuru na mahungwa ghanandi. Khuni la mpheska lira likathazira misisi yakhe ku nombo yira, ndipo likamera minthavi yeneiyo yikarazga ku nombo kuti yithiririkenge. Kweni pa malo apo yikapandika,

⁸wakayizgura na kuya kayipanda pa nyata yiweme pafupi na maji ghanandi, mwakuti yiŵe na minthavi na kupambika vipambi, ndipo likazgoka kuŵa khuni la mpheska yakuzirwa.”

⁹Uŵaphalire uti, “FUMU Chiuta wakuti, ‘Kasi khuni la mpheska ili liti likulenge? Asi nombo yira yiti yizgurenge misisi yakhe na kudumulako minthavi yakhe, mwakuti mahamba ghakhe ghose agho ghasunda waka ghomire? Asi chiti chikhumbenge woko lankhongono panji ŵanthu ŵanandi pakulizgura na misisi yakhe?

¹⁰Wona, para ŵalizgura na kulipanda panyakhe, kasi liti liyane na charu? Asi lamkomira pepetu para mphepo ya ku mafumiro gha dazi yaputirapo.’ ”

¹¹Ntheura nkhapulika mazgu gha FUMU kuti,

¹²“Yowoya sono ku nyumba ya chigaruka uti, ‘Kasi mukumanya chara icho vinthu ivi vikung'anamula?’ Uŵaphalire uti, ‘Karonga wa charu cha Babuloni wakiza mu msumba wa Yerusalemu, wakatoramo karonga na nduna zakhe, ndipo wakiza nawo ku kwakhe ku charu cha Babuloni.

¹³Ndipo karonga wa charu cha Babuloni yura wakatorapo yumoza wa mu mbumba ya ufumu na kupangana nayo, wakamurapiska chirapo. (Wakawuskamo ŵarongozgi ŵa charu,

¹⁴kuti ufumu ura uŵe wakuyuyuka na wambula kujikwezga, kuti para ukusungilira phangano lakhe ungamanya kukhalirira.)

¹⁵Kweni karonga yura wakamugarukira ndipo wakatuma zinkharamba ku charu cha Eguputo, kuti zikapokeko mahachi na ŵankhondo ŵanandi. Kasi iyo wati watonde? Kasi wangamanya kupona usange wachita ntheura? Kasi wangaswa phangano na kupona?’ ”

¹⁶FUMU Chiuta wakuti, “Nkhurapa nadi nkhuti, ‘Wamkufwira mu charu cha karonga uyo wamkuŵika pa chizumbe, mweneuyo wakwerura chirapo chakhe na kuswa phangano lakhe, wamkufwira mu charu cha Babuloni.

¹⁷Mawumba ghakuru gha Faro pamoza na nkhondo yakhe yikuru kuti vyamkovwira chara, para ŵa mu charu cha Babuloni ŵazenga vibumira vyakukwerera mu linga, na kujarizga msumba kuti ŵakome ŵanthu ŵanandi.

¹⁸Chifukwa wakayuyura chirapo na kuswa phangano, leneilo wakapangana ndipouli wachitaso vinthu vyose ivi, kuti wati waphokwe chara.’ ”

¹⁹Ntheura FUMU Chiuta wakuti, “Nkhurapa nadi kuti, pa chifukwa cha chirapo cheneicho wayuyura na phangano lane leneilo waswa, ndamkumulanga.

²⁰Ndamkutandazga ukonde wane pa iyo ndipo wamkukoreka mwenemumo, ndamkwiza nayo ku charu cha Babuloni na kweruzgana nayo kwenekura, chifukwa waswa phangano.

²¹Vinkhara vyakhe viweme vyose vyamkukomeka na nkhondo, ndipo awo ŵaphokwa ŵamkumbininikira ku vyaru vyose. Penepapo mwamkumanya kuti ndine FUMU ndayowoya.”

²²FUMU Chiuta wakuti, “Na ine wuwo ndizamkutorapo kamunthavi kufuma pa khuni la milanje wakuzonthoka, ndamkupanda mu nyata yiweme. Ndamkuphyora kamunthavi kateta kufuma pachanya chomene ndipo ine ndamwene ndamkukapanda pa phiri litali lakuzonthoka.

²³Ndamkukapanda pachanya pa phiri mu charu cha Israele mwakuti kaŵe na minthavi na kupambika vipambi, na kuzgoka kuŵa khuni la milanje lakuzirwa. Musi mwakhe mwamkukhara vinyama vyose vya mtundu na mtundu ndipo viyuni vya mtundu na mtundu vyamkuzengamo vivimbo vyawo mu minthavi yakhe.

²⁴Ndipo makuni ghose gha mu thondo ghizamkumanya kuti ndine FUMU yeneiyo yikukhizga khuni litali, na kulizgora khuni lifupi kuŵa litali, ndiposo na komizga khuni liŵisi na kulizgora khuni lomizo kuŵa lakutikitira. Ine FUMU ndachiyowoya ndipo ndamkuchichita.”