Read new_tumbuka_bible Ezekiyele 18 Bible Online

Ezekiyele 18 - new_tumbuka_bible bible

Ezekiyele 18

¹Mazgu gha FUMU ghakizaso kwa ine kuti,

²“Kasi mukung'anamulachi pakuwerezgawerezga ntharika iyi mu charu cha Israele, yeneiyo yikuti, ‘Ŵawiskewo ŵakarya vipambi vya mpheska zakunchanchamira, ndipo mino gha ŵana ŵawo ghakunyenyera!’ ”

³“Ine FUMU Chiuta, nkhurapa nadi, nkhuti, ‘Ntharika iyi kuti mwamkuyowoyaso mu charu cha Israele chara.’

⁴Wonani, ŵanthu wose mbane. Wiske na mwana wuwo, wose mbane. Munthu uyo wakwananga wamkufwa.”

⁵“Tiyerezgere kuti munthu ndi murunji ndipo wakuchita icho nchakwenerera na chakunyoroka.

⁶Munthu uyu wakureka kuŵa na chiphikiro pa mapiri pachanya, nanga nkhusopa ŵangoza ŵa mbumba ya Israele, nesi kumukazuzga muwoli wa muzengezgani wakhe, panji kumukhwaska mwanakazi uyo ngwambula kutozgeka.

⁷Iyo kuti wakumusuzga munthu chara, kweni wakumuwezgera wa matewu icho wakakorera, ndiposo kuti wakwiba chara. Iyo wakuŵapa chakurya awo ŵali na njara, na kumuvwarika uyo wakwenda nkhule.

⁸Iyo kuti wakubwerekeska kuti watorepo zakusazgirapo chara, panji kupokapo chandulo. Iyo wakujikora ku kuchita uheni, ndipo wakweruzgira mu urunji pakati pa munthu na munthu.

⁹Iyo wakurondezga marango ghane na kusunga malangulo ghane. Munthu wa ntheura ndi murunji, ndiyo wati waŵenge na umoyo.” Ntheura ndimo FUMU Chiuta wakuyowoyera.

¹⁰“Tiyerezgere kuti munthu wababa mwana mweneuyo ndi munkhungu ndiposo nchikozi.

¹¹Mwana uyu wakureka kuchita chimoza cha milimo iyi, kweni wakuŵa na viphikiro pa mapiri pachanya. Iyo wakukazuzga muwoli wa muzengezgani wakhe.

¹²Iyo wakusuzga mukavu na musokwano. Iyo wakwiba mwakukwapura, ndipo kuti wakuwezga chara chikhole cha ngongole. Iyo wakusopa ŵangoza na kuchita maukazuzi.

¹³Iyo wakubwerekeska kuti wasangepo zakusazgirapo na kupoka chandulo. Kasi munthu wa ntheura wangakhara na umoyo? Na pachoko pose. Iyo kuti wangakhara na umoyo chara. Pakuti wakachita maukazuzi ghose agha, iyo wati wakomeke. Mrandu wa nyifwa yakhe uŵenge pa mutu wakhe.”

¹⁴“Kweni tiyerezgere kuti munthu uyu wababa mwana, mweneuyo wakuwona zakwananga zose izo wiske wachita. Iyo wakopa, ndipo kuti wakumurondezga chara nanga nkhuchita nga ndi umo wiske wakuchitira.

¹⁵Iyo kuti wakuŵa na viphikiro pachanya pa mapiri chara, nanga nkhusopa ŵangoza ŵa mbumba ya Israele. Iyo kuti wakukazuzga muwoli wa muzengezgani wakhe chara.

¹⁶Iyo wakwanangira munthu waliyose chara nanga nkhupoka chikhole nesi kwiba mwakukwapura. Kweni iyo wakuŵapa chakurya awo ŵali na njara, na kumuvwarika uyo wakwenda nkhule.

¹⁷Iyo wakujikora ku kuchita uheni. Iyo kuti watora zakusazgirapo chara, nesi kupokapo chandulo. Iyo wakurondezga marango ghane na kusunga malangulo ghane. Munthu wa ntheura wati wafwenge chifukwa cha ubendezi wa wiske chara. Nadi, wati wakharenge wamoyo.

¹⁸Kweni wiske, pakuti wakayuzganga ŵanthu na kwiba mwakukwapura vinthu vya mubali wakhe, ndipo kuti wakachita chinthu chiweme chara mukati mu ŵanthu ŵa kwakhe, nadi, iyo wati wafwenge chifukwa cha ubendezi wakhe.”

¹⁹“Ndipouli imwe mukuyowoya mukuti, ‘Kasi mwana wareke uli kulangika chifukwa cha uheni wa wiske? Para mwana wachita icho nchakwenerera na chakunyoroka, ndipo waŵikapo mtima pakusunga marango ghane ghose, nadi wati wakharenge wamoyo.

²⁰Munthu uyo wananga ndiyo wati wafwenge. Mwana kuti wamkulangika chifukwa cha ubendezi wa wiske chara, nanga ndi wiske kuti wamkulangika chifukwa cha ubendezi wa mwana wakhe chara. Munthu murunji wati wapokere njombe ya urunji wakhe, ndipo muheni wati wapokere njombe ya uheni wakhe.’ ”

²¹“Kweni usange munthu muheni wakuwerako ku uheni wakhe wose uwo wakachitanga na kusungilira marango ghane ghose ndipo wakuchita icho nchakwenerera na chakunyoroka, nadi wati waŵenge na umoyo, kuti wati wafwenge chara.

²²Nanga nkhamoza ka zakwananga zakhe ako wakachita, kuti kati wakumbukikenge chara. Chifukwa cha urunji uwo wachita, wati wakharenge wamoyo.

²³FUMU Chiuta wakuti, ‘Kasi nkhukondwera na nyifwa ya muheni, asi kwakuruska nkhukhumba kuti wawereko ku machitiro ghakhe ghaheni mwakuti wakhare wamoyo?

²⁴Kweni para munthu murunji wakuwerako ku urunji wakhe na kuchita ubendezi, ndiposo wakuchita maukazuzi agho muheni wakuchita, kasi wati wakharenge wamoyo? Pamkuŵavye nanga nkhamoza ka urunji wakhe ako kizamkukumbukika. Chifukwa cha zakwananga zakhe na uheni uwo wachita, wati wafwenge.’ ”

²⁵“Ndipouli imwe mukuyowoya mukuti, ‘Machitiro gha FUMU kuti nga urunji chara.’ Pulikani sono, imwe ŵaIsraele, kasi machitiro ghane nga urunji chara? Asi ndi machitiro ghinu agho ngambula urunji?

²⁶Para munthu murunji wakuwerako ku urunji wakhe na kuchita ubendezi, wati wafwenge chifukwa cha ubendezi wakhe. Iyo wati wafwenge nadi chifukwa cha ubendezi uwo wachita.

²⁷Ndiposo, para munthu muheni wakuwerako ku uheni wakhe uwo wachita, ndipo wakuchita icho nchakwenerera na chakunyoroka, wati waponoskeke.

²⁸Chifukwa wakalanguruka na kuwerako ku zakwananga zakhe zose izo wakachita, wati waphokwenge nadi, ndipo kuti wati wafwenge chara.

²⁹Ndipouli, ŵaIsraele ŵakuti, ‘Machitiro gha FUMU kuti nga urunji chara.’ Imwe ŵaIsraele, kasi machitiro ghane ngambula urunji? Asi ndi machitiro ghinu agho ngambula urunji?”

³⁰Ntheura FUMU Chiuta wakuti, “Nditi ndimweruzganinge imwe ŵaIsraele, nditi ndimweruzgenge munthu yose kwakulingana na mendero ghakhe. Zgokani mtima ndipo muwereko ku uheni wose uwo mukuchita, mzire ubendezi umumarani.

³¹Wuskanimo kwananga uko mukandichitira ine, ndipo jitorerani mtima uphya na mzimu uphya! Kasi muti mufwirengechi, imwe ŵaIsraele?

³²Ine kuti nkhukondwera na nyifwa ya munthu waliyose chara. Ntheura weraniko ku uheni kuti mukhare na umoyo.” Ntheura ndimo FUMU Chiuta wakuyowoyera.