Read new_tumbuka_bible Ezekiyele 19 Bible Online

Ezekiyele 19 - new_tumbuka_bible bible

Ezekiyele 19

¹Iwe, wuska chitengero na kulirira nduna za charu cha Israele,

²ndipo uyowoye kuti, “Nyoko wakaŵa nga ndi nkharamu yanakazi nadi mukati mu zinkharamu. Wakagonanga pakati pa nkharamu, kulera ŵana ŵakhe.

³Wakalera mwana wakhe yumoza mweneuyo wakazgoka kuŵa nkharamu yiwukirano. Nkharamu yira yikasambira kukora nyama, ndipo yikamara ŵanthu.

⁴Ŵamitundu ŵakayichitira chiwawa, ndipo yikawira mu mbuna yawo. Ŵakayiguguza na nkhoroŵeko na kwiza nayo ku charu cha Eguputo.

⁵“Para nkharamu yanakazi yira yikawona kuti chakuchita chasoŵa, chigomezgo chakhe nacho chikamara. Yikatoraso mwana wakhe munyakhe na kumuzgora kuŵa nkharamu yiwukirano.

⁶Mwana yura wakendendekanga mukati mu nkharamu zinyakhe, wakazgoka kuŵa nkharamu yiwukirano, yikasambira kukora nyama, ndipo yikaryanga ŵanthu.

⁷Yikapankhura malinga ghawo, na kuyizgora mapopa misumba yawo. Para yikabangulanga charu chikatenthema, na wose awo ŵakaŵa mwenemumo.

⁸Ntheura mafuko gha ŵanthu ghakayiwukira nkharamu yira ghakathya vipingo kosekose. Ghakatandazga ukonde pachanya pakhe ghakayitorera mu mbuna yawo iyo ghakajima.

⁹Ghakayiguguza na nkhoroŵeko, ghakaya kayinjizga mu chitupa chakusungiramo, na kwiza nayo kwa karonga wa charu cha Babuloni. Ghakayiŵika mu nyumba ya vikondo, kuti lizgu lakhe lireke kupulikikwaso pa mapiri gha Israele.”

¹⁰“Nyoko wakaŵa nga ndi mpheska ya mu munda yakuzgurika na yakupandika pafupi na maji, yakupambika na ya minthavi yinandi chifukwa yikaŵa pafupi na maji ghanandi.

¹¹Munthavi wakukhora chomene wa mpheska yira ukazgoka kuŵa ndodo ya ufumu. Ukazonthoka chomene mukati mu minthavi yakukorana. Ukawonekanga pachanya pamoza na minthavi yakhe yinandinandi.

¹²Kweni mpheska yira yikazgurikira mu ukari, yikaponyeka pasi. Mphepo ya ku mafumiro gha dazi yikayiwomizga, vipambi vyakhe ŵanthu ŵakavipurura. Minthavi yakhe yikuru yikomira moto ukayimyangura yose.

¹³Kweni sono mpheska yira yazgurika na kupandika mu mapopa mu charu chomizo na cha chinkhamwa.

¹⁴Ndipo moto wagolera kufuma mu minthavi yakhe yikuru, wamyangura minthavi yakhe na vipambi vyakhe. Ntheura mulije na kukharamo minthavi yikuru, ndodo ya ufumu nayo palije.” Ichi nchitengero, ndipo chazgoka kuŵa chitengero.