Read new_tumbuka_bible Ezekiyele 2 Bible Online

Ezekiyele 2 - new_tumbuka_bible bible

Ezekiyele 2

¹FUMU yikati kwa ine, “Iwe, mwana wa munthu, yimilira. Ine nkhukhumba kuyowoya kwa iwe.”

²Apo yikayowoyanga kwa ine, Mzimu ukanjira mwa ine, ndipo ukandikhozga malundi kuti ndiyimilire. Ndipo nkhapulika FUMU yikuyowoya kwa ine.

³FUMU yikati kwa ine, “Iwe mwana wa munthu, ine sono nkhukutuma ku ŵanthu ŵa fuko la Israele. Iwo ŵandigarukira ine ndipo ŵali kundiwukira nga ndi umo ŵakachitira ŵawiskewokuru mpaka muhanya uno.

⁴Ŵanthu awo nkhukutumako, mba mutafu na ŵanonono mu mtima. Iwe ukaŵaphalire ukati, ‘FUMU Chiuta wakuti.’

⁵Ndipo manyi ŵamkukupulika panji kureka kukupulika (pakuti ndi ŵanthu wakugaruka), ndipouli ŵamkumanya kuti nchimi yanguŵa mukati mwawo.

⁶Kweni iwe mwana wa munthu, ureke kopa iwo panji icho ŵamkuyowoya, nanga ŵangaŵa nga ndi minga panji mikolankhanga kwa iwe, panji nesi kukhara mukati mwawo nga ndi para ukukhara pa ŵakalizga. Ureke kopa icho ŵakuyowoya, nesi kuthika lusoko para ukuŵalaŵiska. Pakuti ndi ŵanthu awo ŵali kundigarukira ine.

⁷Iwe ukaŵaphalire mazgu ghane, manyi ŵamkukupulika panji chara. Pakuti ndi ŵanthu awo ŵali kundigarukira.

⁸“Kweni iwe mwana wa munthu, pulika icho nkhukuphalira. Ureke kundigarukira nga ndi umo iwo ŵali kundigarukira. Iwe yasama ndipo urye icho nkhukupa.”

⁹Ndipo nkhati ndalaŵiska, nkhawona woko ilo likanyoroskekera kwa ine. Mu woko lira mukaŵa buku.

¹⁰Wakajula buku lira panthazi pane, ndipo likalembeka mukati na kuwaro. Mazgu agho ghakalembekamo ghakaŵa gha vitengero, gha kulira, na gha visuzgo.