Read new_tumbuka_bible Ezekiyele 20 Bible Online

Ezekiyele 20 - new_tumbuka_bible bible

Ezekiyele 20

¹Mu chirimika cha chinkhonde na chiŵiri, mu mwezi wa chinkhonde, pa zuŵa la khumi la mwezi, ŵarara ŵanji kufuma mu charu cha Israele ŵakiza kwa ine kwiza kafumba na vya FUMU, ndipo ŵakakhara panthazi pane.

²Mazgu gha FUMU ghakiza kwa ine ghakati,

³“Iwe mwana wa munthu, yowoya ku ŵarara ŵa charu cha Israele uti, FUMU Chiuta wakuti, ‘Chifukwa uli mukukhumba kwizakandifumba. Nkhurapa nadi, ine kuti nkhukhumba chara kuti imwe mundifumbenge.’ ”

⁴“Iwe mwana wa munthu, kasi uti uŵeruzgenge? Kasi ungaŵeruzga?” Ntheura uŵamanyiske maukazuzi gha ŵawiskewokuru,

⁵ndiposo uŵaphalire uti, “FUMU Chiuta wakuti, ‘Pa zuŵa lira nkhamusankhiranga Israele, nkhachita chirapo ku mphapu ya ŵa mu mbumba ya Yakhobe nkhajivumbula kwa iwo mu charu cha Eguputo.’ Nkhachita chirapo kwa iwo na kuyowoya kuti, ‘Ndine FUMU, Chiuta winu.’ ”

⁶Pa zuŵa lira nkharapa kwa awo nkhati, “Nditi ndiŵawuskengemo mu charu cha Eguputo na kuŵaŵika mu charu icho ndaŵapenjera, charu cha mkaka na uchi, charu chakuchindikika kuruska vyaru vyose.”

⁷Ndipo nkhati kwa iwo, “Munthu yose mukati mwinu wataye maukazuzi ghakhe gheneagho maso ghakhe ghakukondwera nagho, ndipo rekani kujikazuzga na ŵangoza ŵa charu cha Eguputo. Ine ndine FUMU Chiuta winu.”

⁸“ ‘Kweni ŵakandigarukira, ndipo kuti ŵakakhumba chara kundipulikira. Munthu yose kuti wakaghareka maukazuzi ghakhe chara gheneagho maso ghakhe ghakakondwera nagho, ndipo kuti ŵakaŵasida chara ŵangoza ŵa mu charu cha Eguputo.’ ” “Ntheura nkhaghanaghana kuŵafumiskira kucheruka kwane na kufumiskira ukari wane pa iwo mu charu cha Eguputo.

⁹Kweni nkhachita ichi chifukwa cha kuvikirira nchindi ya zina lane, kuti lireke kukazuzgika panthazi pa ŵamitundu ŵeneawo ŵaIsraele ŵakukharamo mukati mwawo, nkhajivumbula panthazi pawo pakuŵafumyamo mu charu cha Eguputo.

¹⁰Ntheura nkhaŵafumiska mu charu cha Eguputo na kwiza nawo mu mapopa.

¹¹Nkhaŵapa marango ghane na kuŵarongora malangulo ghane mwa gheneagho munthu wangawumiramo pakughasunga.

¹²Ndiposo nkhaŵapa maSabata ghane, kuŵa chimanyikwiro pakati pa ine na iwo, mwakuti ŵamanye kuti ine ndine FUMU, yeneiyo yikuŵazgora kuŵa ŵakupatulika.”

¹³“Kweni ŵaIsraele ŵakandigarukira mu mapopa. Kuti ŵakarondezga marango ghane chara, ŵakakana malangulo ghane, mwa gheneagho munthu wangawumiramo pakughasunga, ndipo ŵakaghakazuzga chomene maSabata ghane.” “Ntheura nkhaghanaghana kufumiskira ukari wane pa iwo mu mapopa, pakuŵamara petu.

¹⁴Kweni kuti nkhachita ichi chara chifukwa cha kuvikirira nchindi ya zina lane, kuti lireke kukazuzgika panthazi pa ŵamitundu, ŵeneawo ŵakandiwona para nkhaŵafumiskanga ŵaIsraele mu Eguputo.

¹⁵Ndiposo nkhachita chirapo kwa iwo mu mapopa kuti, ‘Ndireke na kuya kaŵanjizga mu charu icho nkhaŵapa, charu cha mkaka na uchi, charu chakuchindikika kuruska vyaru vyose,

¹⁶pakuti ŵakakana marango ghane, ŵakareka kurondezga malangulo ghane ndipo ŵakakazuzga maSabata ghane. Mitima yawo yikarondezga ŵangoza ŵawo.’

¹⁷“Ndipouli nkhaŵa na chiwuravi na iwo, kuti nkhaŵakoma chara nanga nkhuŵamara petu mura mu mapopa.

¹⁸Ndipo nkhati ku ŵana ŵawo mu mapopa, ‘Rekani kurondezga marango gha ŵawiskemwekuru, nanga nkhusungilira malangulo ghawo, nesi kujikazuzga na ŵangoza ŵawo.

¹⁹Ine FUMU, ndine Chiuta winu. Rondezgani marango ghane, ndipo muŵike mtima pakusungilira malangulo ghane.’

²⁰Sungani maSabata ghane kuŵa ghakupatulika kuti ghaŵe chimanyikwiro pakati pa ine na imwe, mwakuti mumanye kuti ine ndine FUMU Chiuta winu.

²¹“Kweni ŵana ŵawo ŵakandigarukira, ŵakareka kurondezga marango ghane, ndipo uti ŵakaŵikapo mtima chara pakusungilira malangulo ghane, mwa gheneagho munthu wangawumiramo pakughasunga, ŵakakazuzga maSabata ghane. Ntheura nkhaghanaghana kufumiskira na kufiskira ukari wane pa iwo mu mapopa.

²²Kweni nkhajikora, ndipo nkhachita ichi chifukwa cha kuvikirira nchindi ya zina lane, kuti lireke kukazuzgika panthazi pa ŵamitundu, ŵeneawo ŵakawungana para nkhaŵafumiskangamo.

²³Ndiposo nkharapa chirapo kwa iwo mu mapopa nkhati, ‘Ndamkuŵambininiska mukati mu ŵamitundu na kuŵabarariskira mu vyaru vyose,

²⁴chifukwa ŵalije kughafiska malangulo ghane, kweni ŵakakana marango ghane na kukazuzga maSabata ghane, ndipo maso ghawo ghakaŵa pa ŵangoza ŵa ŵawiskewokuru.’

²⁵Ndiposo nkhaŵapa marango ghane gheneagho kuti ghakaŵa ghaweme chara, ndipo mwa gheneagho ŵakaŵavye na kumanya kusangiramo umoyo.

²⁶Nkhaŵareka kuti ŵajikazuzge ŵekha na vyawanangwa vyawo pakupereka wose ŵana ŵawo ŵa uŵere kuŵa sembe yakocha, kuti ndiŵawofye chomene. Nkhachita ichi kuti ŵamanye kuti ine ndine FUMU.

²⁷“Ntheura, iwe mwana wa munthu, yowoya ku ŵaIsraele kuti FUMU Chiuta wakuti: Mwa cheneicho ndimo ŵawiskemwekuru ŵakanditukira ine, pakureka kuŵika chigomezgo mwa ine.

²⁸Chifukwa para nkhiza nawo mu charu cheneicho nkharapa kuŵapa, ŵakasora phiri lose litali na khuni lose liŵisi, mwenemumo ŵakaperekanga sembe ndiposo na vyawanangwa vyawo vyeneivyo vikandavyira ku ukari. Kwenekura ŵakachita sembe ya sungu liweme na kupungura sembe zawo za vyakumwa.

²⁹Nkhati kwa iwo, ‘Kasi malo gha pachanya ghakusoperako agho mukuyako ndi nga?’ Ntheura ghakuchemeka ‘Malo gha pachanya ghakusoperako’ mpaka sono.

³⁰“Ntheura uyowoye na ŵaIsraele uti, FUMU Chiuta wakuti: Kasi muti mujikazuzgenge nga ndi umo ŵakachitiranga ŵawiskemwekuru, na kupurukira ku maukazuzi ghawo?

³¹Para mukupereka vyawanangwa vyinu na kupereka ŵana ŵinu kuŵa sembe yakocha pa moto, mukujikazuzga na ŵangoza ŵinu wose mpaka na kuno ku lero. Kasi nditi ndimuzomerezgani uli kuti mwiza kafumbanga ine, imwe mwa ŵaIsraele? Nkhurapa nadi nkhuti, ‘Kuti mwakufumbako kwa ine chara.’ ” Ntheura ndimo FUMU Chiuta wakuyowoyera.

³²“Icho mukughanaghana kuti chiti chiŵengeko chara,” apo mukughanaghana kuti, “Tiyeni tiŵe nga ŵamitundu, tiŵe nga ndi mafuko gha ŵanthu ŵa mu vyaru, kusopa khuni na libwe.”

³³FUMU Chiuta wakuti, “Nkhurapa nadi kuti nditi ndimuwusani na woko lankhongono na lakutambazuka ndiposo na ukari wakuzura.

³⁴Ine ndamkumufumyanimo mu ŵamitundu na kumusokororani kufuma mu vyaru vyeneivyo muli kumbininikiramo, na woko lakhe lankhongono na lakutambazuka, ndiposo na ukari wakuzura.

³⁵Ndamkumutorerani mu mapopa gha ŵamitundu, ndipo mwenemura ndamkumweruzgani ndamwene.

³⁶Nga ndi umo nkheruzgira ŵawiskemwekuru mu mapopa, ŵati ŵafuma mu charu cha Eguputo, ndimo ndamkumweruzgirani namweso.” Ntheura ndimo FUMU Chiuta wakuyowoyera.

³⁷“Ndamkumwendeskani panthazi pane, ndamkumupendani yumozayumoza, ndipo nditi ndichite kuti mupulikire phangano lane.

³⁸Ndipo ndamkufumiskamo vigeŵenga mukati mwinu, na awo ŵakundinangira ine, ndamkuŵawuskamo mu charu icho ŵakupanjwamo, kweni kuti ŵamkunjiramo mu charu cha ŵara chara. Penepapo mwamkumanya kuti ine ndine FUMU.”

³⁹“Kweni imwe, ŵaIsraele, FUMU Chiuta wakuti, ‘Rutani, waliyose wa imwe wakasopenge ŵangoza ŵakhe, sono na kunthazi, usange murekenge kundipulikira. Kweni zina lane lituŵa mureke kulikazuzgaso na vyawanangwa vyinu na ŵangoza ŵinu.

⁴⁰FUMU Chiuta wakuti, Pakuti pa phiri lane lakupatulika, phiri lakuzonthoka la mu charu cha Israele, ndipo ŵaIsraele wose ŵamkundisopera mu charu chira. Kwenekura ndiko ndamkuŵapokerera ndipo ndizamkukhumba kupokera mithulo yinu na vyawanangwa vyinu viweme chomene pamoza na sembe zinu zose ziweme.

⁴¹Ndamkumupokererani imwe nga ndi sungu liweme lakukondweska, para nkhumufumyanimo mu ŵamitundu, na kumusokororani mu vyaru vyeneivyo mukambininikiramo, ndipo ndamkurongora kupatulika kwane mukati mwinu panthazi pa ŵamitundu.

⁴²Penepapo mwamkumanya kuti ndine FUMU, para ndamutorerani mu charu cha Israele, cheneicho nkharapa kuŵapa ŵawiskemwekuru.

⁴³Ndipo mwenemumo mwamkumbuka mendero ghinu na machitiro ghose, gheneagho mwajikazuzga nagho, ndipo mwamkunyanyara mwekha mauheni ghose agho mukachitanga.

⁴⁴Ndipo mwamkumanya kuti ndine FUMU, para nkhumuchitirani ichi pakuvikulira nchindi ya zina lane, kuti ndamkuchita kwakuyana na mendero ghinu ghaheni chara, panji kwakuyana na machitiro ghinu ghawakawaka chara, imwe mwa ŵaIsraele.’ ” Ntheura ndimo FUMU Chiuta wakuyowoyera.

⁴⁵Ndipo mazgu gha FUMU ghakiza kwa ine ghakati,

⁴⁶“Iwe mwana wa munthu, razgira chisko chako ku mwera, upharazge pakususka charu cha ku mwera ndipo uchime pakususka thengere la ku mwera.

⁴⁷Uyowoye ku thengere la ku mwera kuti lipulike mazgu agho FUMU yikuyowoya. FUMU Chiuta wakuti, ‘Wonani, nditi ndipembe moto mwa imwe, ndipo uti umyangure chikhuni chilichose chiŵisi na chakomira. Dimi la moto ura kuti lamkuzimyika chara, ndipo kufuma ku mwera mpaka ku mpoto chisko cha munthu yose chamkuŵawuka.

⁴⁸Waliyose wamkuwona kuti ine FUMU ndine ndapemba moto ura, ndipo kuti wamkuzimyika chara.’ ”

⁴⁹Penepapo nkhati, “Mwe FUMU Chiuta! Ŵakundinena ine kuti, ‘Asi ndi munthu mweneuyo wakuyowoyera mu zintharika?’ ”