Read new_tumbuka_bible Ezekiyele 21 Bible Online

Ezekiyele 21 - new_tumbuka_bible bible

Ezekiyele 21

¹Mazgu gha FUMU ghakiza kwa ine ghakati,

²“Iwe mwana wa munthu, razgira chisko chako ku Yerusalemu, upharazge na kususka malo ghalighose ghakupatulika, uchime na kususka charu cha Israele,

³ndipo uŵayowoyere ŵa mu charu cha Israele uti, ‘FUMU yikuti, “Wonani, nkhumususkani, nditi ndisororenge lupanga lwane mu chibazi, ndipo nditi ndikomenge ŵaweme na ŵaheni mukati mwako.

⁴Pakuti ndamkukomamo ŵaweme na ŵaheni mwa iwe, ntheura nditi ndisorerenge lupanga lwane mu chibazi kwimikana na ŵanthu wose kufuma na ku mwera mpaka ku mpoto.

⁵Ndipo munthu waliyose wamanye kuti ine FUMU, ndasorora lupanga lwane mu chibazi, kuti luwereremoso chara.” ’ ”

⁶“Ntheura iwe mwana wa munthu, tampha. Tampha chomene na mtima wakuphyoka na chitima chikuru panthazi pawo.

⁷Ndipo para ŵakukufumba iwe kuti, Kasi ukutamphirachi? Uŵazgore uti, Chifukwa cha uthenga uwo ndapulika gheneagho para ghafika mtima wa munthu yose wamkusongonoka, ndipo mawoko ghose ghamkupoka, na mtima wa munthu yose wamkufwa chipoyo, ndipo makongono gha ŵanthu wose ghamkusunkhunyika nga ndi maji. Wonani, chikwiza ndipo chiti, chifiskikenge, ndimo wakunenera FUMU Chiuta.”

⁸Ndipo mazgu gha FUMU ghakiza kwa ine ghakati,

⁹“Iwe mwana wa munthu, uchime uti, ‘FUMU yikuti, “Lupanga, inya lupanga lwanoreka ndiposo ndwakutuwurika,

¹⁰lwanoreka kukomera ŵanthu ndwakutuwurika kuti lumwetuke nga ndi leza! Iwe wa mwana wane wawuskira lupanga muchanya, kuti welure ŵangoza wose ŵa makuni!” ’ ”

¹¹“Ntheura lupanga lwaperekeka kuti lutuwurike, mwakuti luŵe lwakutuwurika, lwanozgeka kuŵikika mu mawoko gha uyo wakukoma.

¹²Iwe mwana wa munthu, lira na kutengera, chifukwa lupanga lwawuskikira muchanya kwimikana na ŵanthu ŵane ndiposo na kwimikana na nduna zose za ŵaIsraele. Iwo ŵaperekeka ku nkhondo pamoza na ŵanthu ŵane. Ntheura mujitimbe pa chifuŵa.

¹³Chifukwa ichi nchiyezgo. Kasi mphanyi kwanguŵa uli usange mwerurenge chilango chira? Ntheura ndimo FUMU Chiuta wakuyowoyera.”

¹⁴“Ntheura, iwe mwana wa munthu, chima. Kuŵa mawoko ghako ndipo reka lupanga luwe pasi kaŵiri panji katatu. Ili ndi lupanga lwakukomera ŵanthu. Ndi lupanga lwa kukoma kukuru, lweneulo lwaŵazingirizga,

¹⁵kuti mitima yawo yisongonoke chifukwa cha wofi, ndipo ŵanandi ŵakhuŵare na kuwa pa vipata vyawo. Ndapereka lupanga lwakugabuka, lweneulo ŵakulumwetuska nga ndi leza, ndipo lwanoreka kukomera ŵanthu.

¹⁶Hemba chomene ku maryero na ku mazere, kose uko songo yako yarazga.

¹⁷Naneso nditi ndikuŵe mawoko, ndipo nditi ndikhorweske ukari wane. Ine FUMU ndayowoya.”

¹⁸Mazgu gha FUMU ghakizaso kwa ine ghakati,

¹⁹“Iwe mwana wa munthu, rongora misewu yiŵiri yeneiyo nkhondo ya karonga wa charu cha Babuloni yamkwendamo, misewu yose yiŵiri yifumire mu charu chimoza. Ndipo unozge chiphambano, uchiŵike pa mphatukano ya msewu, kurazga ku msumba.

²⁰Urongore umo nkhondo yamkwenda kuya ku msumba wa Raba mu charu cha ŵaAmoni ndiposo na msewu wakuya ku charu cha Yuda, mu msumba wa Yerusalemu weneuwo uli kuzingirizgika na malinga.

²¹Chifukwa karonga wa charu cha Babuloni wakwimilira pa mphatukano ya msewu, apo misewu yiŵiri yikupatukana, mwakuti waroske. Wakusunkhunya mivwi, kufumba ŵangoza, ndipo wakulaŵiska pa chiŵindi.

²²Mu woko lakhe la maryero mukwiza mphenduzgo iyo yakora Yerusalemu, wati warizge mbata na nkhondo pamoza na chitengero, wati waŵike vyakugumulira vipata, wati wawunde vibumira na kuzenga vigongwe.

²³Kweni kwa iwo chiti chiwoneke nga ndi kuwukwa kwa utesi. Nanga ŵangarapa virapo, kweni iyo wamkukumbuska uheni wawo wose, mwakuti ŵakoreke.”

²⁴Ntheura FUMU Chiuta wakuti, “Chifukwa mwandikumbuska na chigaruka chinu cha pakweru, ndipo uheni winu wavumbukwa mu machitiro ghinu ghose, pakuti mwanguŵa mu maghanoghano ghane, muti muchichizgike kuperekeka mu mawoko gha ŵarwani ŵinu.”

²⁵“Iwe nawe wa nduna ya Israele, wa muheni na wambula kopa Chiuta, wamweneiwe zuŵa lako la soka lafika, nyengo ya kulangika kwako kwa umaliro,

²⁶FUMU Chiuta wakuti: Wuskako chilemba na kuvura mphumphu. Vinthu kuti viti vikharengeso nga ndi umo viliri chara. Ivyo nvya pasi viti vikwezgekenge ndipo ivyo vya pachanya viti vikhizgikenge.

²⁷Nditi ndichipankhule charu ndipo nditi ndichipankhule nadi, kweni ichi kuti chizamkuchitika chara mpaka wakusoreka wane wize kuti walange msumba.”

²⁸“Iwe mwana wa munthu, uchime uti, ‘FUMU Chiuta wakuti pa vya ŵaAmoni na chiuta wawo uyo ngwa kukhozga soni: Lupanga, lupanga lwasororeka kuti lukome. Lwatuwurika kuti lukome ŵanthu, kuti lumwetukenge nga ndi leza.

²⁹Mboniwoni zinu nzautesi ndipo kuroska kwinu nkhwautesi. Ndipouli uti ukome vikozi viheni vyeneivyo zuŵa lakweruzgira mirandu yawo laneng'enera. Mu leneilo ŵamkulangika kwambula na kuphokwa.

³⁰Uluwezgere lupanga mu chibazi chakhe. Ndamkukweruzgira ku malo agho ukababikirako, ku charu icho ukufumako.

³¹Ndamkufumiskira ukari wane pa iwe, ndiposo ndamkuthutira ukari wane wakugolera nga ndi moto pa iwe, ndamkukupereka mu mawoko gha viŵanthu vya nkhaza, vyeneivyo ndi nkhwantha zakukoma ŵanthu.

³²Wamkuzgoka kuŵa nkhuni za moto, ndopa zako zamkuthikira mu charu ndipo kuti wamkusidapo na chikumbusko chako kunyuma chara. Pakuti ndine FUMU ndachiyowoya.’ ”