Read new_tumbuka_bible Ezekiyele 22 Bible Online

Ezekiyele 22 - new_tumbuka_bible bible

Ezekiyele 22

¹Mazgu gha FUMU ghakizaso kwa ine ghakati,

²“Iwe mwana wa munthu, kasi wizamkuŵa mweruzgi? Kasi wizamkweruzga msumba wa ndopa? Ipo uwuphalire maukazuzi ghakhe ghose.

³Uwuphalire uti, FUMU Chiuta wakuti, Msumba uwo ukuthiska ndopa mukati mwakhe na kujitorera kupankhuka ndipo ukujikazuzga na ŵangoza ŵakhe, kuti nyengo yakhe yakwana!

⁴Iwe wa msumba, uli na mrandu chifukwa cha ndopa izo wathiska na kujikazuzga na ŵangoza awo wanozga. Wajisenderezga kufupi na zuŵa lako ndipo nyengo yako iyo yilikwimika yakwana. Ntheura ndakuzgora kuŵa chisunjizgo ku mafuko, ndiposo na chimuhoyere ku vyaru vyose.

⁵Ŵeneawo ŵali kufupi na awo ŵali kutali na iwe, ŵati ŵakuhoye iwe wa muheni nkhanira na wa mbembe.”

⁶“Wonani, nduna za ŵaIsraele izo zili mukati mwako, yiliyose kwakuyana na mazaza ghakhe, yaŵika mtima pakuthiska ndopa.

⁷Ŵanthu ŵako ŵakuyuyura ŵawiskewo na ŵanyinawo. Iwo ŵakuyuzga ŵalendo ndipo ŵakusuzga ŵalanda na vyokoro.

⁸Mwayuyura vinthu vyane vyakupatulika, na kukazuzga maSabata ghane.

⁹Muli ŵanthu ŵanji mwa iwe ŵeneawo ŵakuŵanena uheni ŵanyawo kuti ŵathiske ndopa. Muli ŵanji mukati mwako awo ŵakuchita viphikiro pa malo gha pachanya ndiposo ŵanji ŵakuchita vya ukazuzi.

¹⁰Mukati mwako muli ŵanthu ŵeneawo ŵakugonana na ŵawoli ŵa ŵawiskewo. Mukati mwako muliso ŵanji awo ŵakuchichizga kugonana na ŵanakazi awo ŵali ku mwezi, ŵambula kutozgeka.

¹¹Ŵanji ŵakuchita ukazuzi na ŵawoli ŵa ŵazengezgani ŵawo, ndipo ŵanyakhe ŵakukazuzga na mukamwana wawo wuwo, ŵanji ŵakukazuzga mudumbu wawo, mwana mwanakazi wa ŵawiskewo.

¹²Mukati mwako ŵanthu ŵakupoka vimbundi kuti wathiske ndopa. Ukupoka chuma chakusazgirapo ndiposo na chandulo, ndipo ukupoka chandulo ku ŵazengezgani ŵako na machitiro gha nkhaza. Ndipo iwe wandiruwa ine.” Ntheura ndimo FUMU Chiuta wakuyowoyera.

¹³“Ntheura mu ukari wane ndakukuŵira mawoko pa chandulo icho wapokera mu kuwura kugomezgeka, ndiposo na ndopa izo wathiska mukati mwako.

¹⁴Kasi chikanga chako chamkuchintha, panji kasi mawoko ghako ghamkuŵa na nkhongono, mu mazuŵa agho ndamkukweruzga? Ine FUMU ndachiyowoya ndipo ndamkuchifiska.

¹⁵Ŵanthu ŵako ndamkuŵambininiskira mukati mu ŵamitundu, na kumubarariskani mu vyaru vya chilendo, ndipo ndamkumarizga ukazuzi mukati mwako.

¹⁶Wamkukhozgeka soni panthazi pa ŵamitundu wose, ndipo wamkumanya kuti ndine Fumu.”

¹⁷Mazgu gha FUMU ghakiza kwa ine ghakati,

¹⁸“Iwe mwana wa munthu, mbumba ya Israele yazgoka makharang'anjo kwa ine. Wose, siliva, na mkuŵa, na chithini, na chisulo, ndiposo na muthovu mu ng'anjo, ŵazgoka makharang'anjo.

¹⁹Ntheura FUMU Chiuta wakuti, ‘Pakuti mose mwazgoka makharang'anjo, nditi ndimuwunjikani mukati mu Yerusalemu.

²⁰Nga ndi umo ŵanthu ŵakuwunjikira mu ng'anjo siliva, mkuŵa, chisulo, muthovu ndiposo na chithini, na kupembako moto kuti visongonoke, ntheura ndimo ndamkuchitira na imwe mu ukari wane na mu kutukutwa kwane. Ndamkumunjizgani mwenemumo na kumusongonorani.

²¹Ndamkumuwunganyani na kuphutirapo moto wa ukari wane, ndipo mwamkusongonokera mwenemumo.

²²Nga ndi umo siliva likusongonokera mu ng'anjo, ntheura ndimo namwe mwamkusongonokera mwenemumo, ndipo mwamkumanya kuti ine FUMU ndafumiskira ukari wane pa imwe.’ ”

²³Ndipo mazgu gha FUMU ghakizaso kwa ine ghakuti,

²⁴“Iwe mwana wa munthu, uchiphalire charu uti, ‘Ndiwe charu icho chindasukike nesi vura kurokwapo pa iwe pa zuŵa la ukari wane.’

²⁵Ndi charu cheneicho nduna zakhe zili nga ndi nkharamu zakubangura, zeneizo zili pa nyama. Nduna izi zamyangura ŵanthu ŵamoyo, na kupoka vyuma vyawo ndiposo na usambazi wawo, zandaniska vyokoro mukati mwakhe.

²⁶Ŵasofi ŵakhe ŵaswa dango lane, na kukazuzga vinthu vyane vyakupatulika. Ŵalije kupatula pakati pa chinthu icho nchakupatulika na chambula kupatulika, nanga nkhusambizga ŵanthu mphambano pakati pa chinthu chakuphotoka, na chambula kuphotoka, ndiposo kuti ŵaghachindika maSabata ghane chara. Ntheura ndine wakuyuyurika mukati mwawo.

²⁷Nduna izo zili mukati mwakhe zili nga ndi mphumphi izo zikukwapura, zikuthiska ndopa, zikukoma ŵanthu kuti zipoke chandulo mu nthowa yambula kwenerera.

²⁸Ndipo nchimi zakhe zaphakapo utoto pa zakwananga zawo na mboniwoni za utesi ndiposo na kuroska vya utesi, pakuŵayowoyera ŵanthu kuti, ‘Ndimo FUMU Chiuta wakuyowoyera’ apo FUMU kuti yili kuyowoyapo chara.

²⁹Ŵenecharu ŵakusangira vinthu mu nthowa yambula kwenerera, ndiposo ŵakukwiba vinthu vya ŵanthu, ŵakusuzga ŵakavu na ŵasokwano, ndipo ŵakuyuzga ŵalendo kwambula kuchitira mu urunji.

³⁰Ndipo nkhapenja munthu mukati mwawo mweneuyo wangamanya kuzenga chiliŵa na kwimilira apo chiliŵa chasweka panthazi pane, kuthaska charu mwakuti ndireke kuchipasura, kweni kuti nkhumusangamo chara.

³¹Ntheura ndafumiskira ukari wane pa iwo ndipo ndaŵamyangura na moto wa ukari wane. Ndaŵalanga kwakuyana na machitiro ghawo ghaheni.” Ntheura ndimo FUMU Chiuta wakuyowoyera.