Read new_tumbuka_bible Ezekiyele 23 Bible Online

Ezekiyele 23 - new_tumbuka_bible bible

Ezekiyele 23

¹Mazgu gha FUMU ghakizaso kwa ine ghakati,

²“Iwe mwana wa munthu, kukaŵako ŵanakazi ŵaŵiri, ŵeneawo nyinawo wakaŵa yumoza.

³Ŵanakazi aŵa ŵakachitanga uzaghali mu charu cha Eguputo pa uwukirano wawo. Kwenekura ŵanthu ŵakaŵatofyanga maŵere ghawo na kuŵakorakora pa vifuŵa vya kulangwa kwawo.

⁴Murara wakaŵa Ohola, ndipo munung'una wakaŵa Oholiba. Wose ŵakazgoka kuŵa ŵane, ndipo ŵakababa ŵana ŵanarume na ŵana ŵanakazi. Mu mazina agha Ohola ndi msumba wa Samariya, Oholiba ndi msumba wa Yerusalemu.”

⁵“Ohola wakachita uzaghali apo wakaŵa wane na kale, ndipo mtima wakhe ukanwekeranga ŵakutemweka ŵakhe ŵa ku Asiriya,

⁶ŵasilikari awo ŵakavwaranga vyakururupira, nduna na ŵarongozgi ŵa ŵasilikari. Wose ŵakaŵa ŵanyamata ŵakutowa, ŵakukwera pa mahachi.

⁷Wakajisaska kwa iwo, ŵanthu ŵakutowa chomene mu ŵaAsiriya, ndipo ŵakujikazuzga na ŵangoza ŵawo wose kose uko kurakaraka kwakhe kukamurongozgera.

⁸Kuti wakareka uzaghali wakhe chara weneuwo wakachitanga kufuma mu mazuŵa agho wakaŵa mu charu cha Eguputo, chifukwa mu uwukirano wakhe ŵanarume ŵakaleŵananga nayo na kukora maŵere ghakhe gha umwali ndipo ŵakafiskiranga pa iyo kurakaraka kwawo.

⁹Ntheura nkhamupereka mu nkhongono za ŵakutemweka ŵakhe, mu nkhongono za ŵaSiriya, ŵeneawo wakaŵanwekanga.

¹⁰Ŵanthu aŵa ŵakamuvura malaya ghakhe na kuŵa nkhule. Ŵakakora ŵana ŵakhe ŵanarume na ŵanakazi, ndipo iyo ŵakamukoma na lupanga. Iyo wakazgoka kuŵa chinthanguni mukati mu ŵanakazi, apo wakati weruzgika.”

¹¹“Munung'una wakhe Oholiba wakachiwona ichi, ndipouli ndiyo wakanangika chomene kuruka mukuru wakhe.

¹²Wakaŵatemwa chomene ŵaAsiriya, nduna, ŵarongozgi ŵasilikari na ŵasilikari ŵakuvwara vya nkhondo, ŵanthu ŵakukwera pa mahachi, wose ŵanyamata ŵakutowa.

¹³Ndipo nkhawona kuti iyo wakakazuzgika. Wose ŵaŵiri ŵakatora nthowa yimoza pera.

¹⁴Kweni wakarutilira na uzaghali wakhe. Iyo wakawona vithuzithuzi vya ŵanarume vyalembeka pa chimati, ndiposo na vikozgo vya ŵaBabuloni vyalembeka na kuroŵeka na utoto uswesi.

¹⁵Vithuzithuzi ivi vikavwarikika ŵalamba mu viwuno vyawo, pamoza na vilemba vyakusoneka mwa unkhwantha pa mitu yawo. Vyose vikawonekanga nga mbarongozgi ŵa nkhondo ndipo vikawonekanga nga mbaBabuloni, ŵeneawo charu chawo chikaŵa cha Babuloni.

¹⁶Wakati waŵawona wakarongora kutemwa kwakhe, ndipo wakaŵatumira zinthumi ku Babuloni.

¹⁷ŴaBabuloni ŵara ŵakiza kwa iyo kuti ŵaleŵane nayo ndipo ŵakamukazuzga na kurakaraka kwawo, ŵakati ŵamukazuzga iyo wakaŵagarukira na kuŵamyangura.

¹⁸Wakati warutilira mu uzaghali wakhe na kuŵika pakweru nkhule yakhe kwambula soni, mukunyanyara nkhazgokako nga ndi umo nkhanyanyalira pa munung'una.

¹⁹Ndipouli wakakuzgirako uzaghali wakhe, pakukumbuka mazuŵa gha uwukirano wakhe, para wakachitanga uzaghali mu charu cha Eguputo,

²⁰na kurongora kutemwa kwakhe ku ŵanarume ŵeneawo mavwaro ghawo ghakaŵa nga ndi zimbunda, ndipo mbuto yawo yikathikanga waka nga nja mahachi.

²¹Ndimo ukanwekeranga uzaghali wa mu uwukirano wako, para ŵaEguputo ŵakakukora pa nganga na kutofya maŵere ghako gha umwali.”

²²“Iwe Oholiba, FUMU Chiuta wakuti, ‘Nditi ndikuwuskire ŵakutemweka ŵako ŵeneawo ukuŵatinkha, kuti ŵimikane nawe, nditi ndize nawo kufuma kosekose.

²³Ndizamkuchema ŵaBabuloni na ŵanthu ŵanyakhe wose, ndiposo na ŵa mu vyaru ivi, Pekodi, Showa na Kowa pamoza na ŵaAsiriya wose, ŵanyamata ŵakukhumbirika, nduna, ŵarongozgi na ŵasilikari ŵankhondo, na wose ŵakukwera pa mahachi.

²⁴Ndipo ŵamkwiza kufumira ku mpoto na magareta gha nkhondo na magareta gha ŵakatundu, na wumba wa ŵanthu, kwiza karwa nawe kufumira kosekose uku ŵakorera zimbata na nguru ndiposo ŵavwara vipewa, ndamkupereka weruzgi mu mawoko ghako, ŵamkukweruzga iwe kwakuyana na umo ŵangeruzgira.

²⁵Ndamkufumiskira ukari wane pa iwe, mwakuti ŵakuchitire mu ukari. Ŵamkukudumula mphuno na makutu ndipo awo ŵakharako ŵa mwa iwe ŵamkukomeka na nkhondo. Ŵamkukwapura ŵana ŵako ŵanarume na ŵanakazi, ndipo awo ŵakharako mwa iwe moto wamkuŵamyangura.

²⁶Ŵamkukuvura vyakuvwara vyako na kuwuskako vitowelo vyako viweme.

²⁷Ntheura ndamkumarizga kurakaraka kwako na uzaghali wako, vyeneivyo ukafuma navyo mu charu cha Eguputo, mwakuti na mtima wakurakaraka ureke kwinuskiraso maso ghako ku charu cha Eguputo nanga nkhukumbuka ivyo ukachitanga.’ ”

²⁸Chifukwa FUMU Chiuta wakuti, “Wona, ndamkukupereka mu nkhongono ya ŵanthu awo ukuŵatinkha, ŵeneawo ukaŵagarukira na kuŵanyanyara.

²⁹Ndiwo ŵamkukuchitira mwa nkhaza na kukupoka vyose ivyo ukavitokatokeranga. Ŵamkukureka nkhule wambula na kanthu, ndipo nkhule ya uzaghali wako yamkuŵikika pakweru. Ukazuzi wako na uzaghali wako,

³⁰ndivyo vyakutorera ivi, chifukwa ukachita uzaghali na mitundu yinyakhe, na kujikazuzga na ŵangoza ŵawo.

³¹Iwe warondezga mendero gha mukuru wako. Ntheura nkhombo ya visuzgo vyakhe nditi ndiyiŵike pa iwe.”

³²FUMU Chiuta wakuti, “Uti umwenge nkhombo ya visuzgo ya mukuru wako, yeneiyo njikuru na yakuzonthoka. Uti usekekenge na kuŵa chimuhoyere, chifukwa muli visuzgo vinandi.

³³Uti uroŵere na kuŵa na chitima chikuru. Nkhombo ya visuzgo ya mukuru wako Samariya ndi nkhombo ya chofyo na phasulo.

³⁴Uti umwe nkhombo ya visuzgo mpaka uyikwangule. Viti vimare na sisi lako wuwo, na kuparura maŵere ghako. Pakuti ine ndine ndachiyowoya.” Ntheura ndimo FUMU Chiuta wakuyowoyera.

³⁵Ntheura FUMU Chiuta wakuti, “Chifukwa wandiruwa ine, na kunditaya kunyuma zako, pa chifukwa ichi utu uvimyanthe vyakufumira mu kurakaraka kwako na mu uzaghali wako.”

³⁶FUMU yikandiphalira yikati, “Iwe mwana wa munthu, kasi uti umweruzge Ohola na Oholiba? Ipo uŵaphalire milimo yawo ya ukazuzi.

³⁷Chifukwa wachita uleŵe, ndipo mrandu wakuthiska ndopa uli pa iwo. Ŵachita uleŵe na ŵangoza ŵawo ndipo ŵana ŵawo ŵanarume, ŵeneawo ŵandibabira, ŵaŵapereka ku ŵangoza kuŵa sembe yakocha nga nchakurya.

³⁸Na kwenenako ŵachitaso ichi kwa ine: ŵakazuzga malo ghane ghakupatulika na kunangiska maSabata ghane.

³⁹Chifukwa ŵakati ŵaŵakoma ŵana ŵawo na kuŵapereka kuŵa sembe ku ŵangoza ŵawo, pa zuŵa leneilo ŵakiza kwiza kanangiska malo ghane ghakupatulika. Ichi ndicho ŵakachita mu nyumba yane.

⁴⁰Ŵakatuma na zinthumi wuwo kuya kachema ŵanthu kufumira ku vyaru vya kutali, ndipo nadi ŵakiza. Chifukwa cha iwo ukageza, ukaroŵa maso ghako, ndipo ukajitozga na vitoweskero.

⁴¹Ukakhara pa chitara cha nchindi, thebulu likaŵikika panthazi pako penepapo ukaŵika vyakununkhira vyane na mafuta ghane.

⁴²Mphomo ya mzinda wa ŵanthu ŵambula kulorako yikapulikikwa. Pamoza na ŵanthu waka pakizaso ŵaloŵevu kufuma ku mapopa. Iwo ŵakaŵavwarika ŵanakazi makoza pa mawoko, na mphumphu zakutowa pa mitu yawo.”

⁴³“Ntheura ine nkhati, ‘Asi ŵanarume ŵakuleŵa apo ŵakuchita nayo uzaghali, mwanakazi uyo wali kumalirathu na uzaghali?

⁴⁴Ŵakanjira mwa iyo nga nkhu mwanakazi uyo ndi muhule. Ntheura ŵakanjira mwa Ohola na mwa Oholiba, ŵanakazi ŵakazuzi ŵara.

⁴⁵Kweni ŵarunji ŵati ŵeruzge iwo pakuŵapa mrandu wa uleŵe, na mrandu wa ŵanakazi awo ŵakuthiska ndopa, chifukwa mbanakazi ŵaleŵe, ndipo mawoko ghawo ghathiska ndopa.’ ”

⁴⁶Pakuti FUMU Chiuta wakuti, “Muŵatorere wumba wakwimikana nawo, ndipo muŵazgore kuŵa chinthu chakofya na skoghi.

⁴⁷Ndipo wumba uti uŵadine na mawe na kuŵakoma na malupanga, ŵati ŵakome ŵana ŵawo ŵanarume na ŵanakazi, na kocha na moto nyumba zawo.

⁴⁸Ntheura ndamkumarizga ukazuzi wawo mu charu, mwakuti ŵanakazi wose ŵachenjererepo, kuti ŵareke vya ukazuzi nga ndi umo mwachitira imwe.

⁴⁹Ndipo chilango cha ukazuzi winu chamkwiza pa imwe, mwamkulangika chifukwa cha kusopa ŵangoza kwinu. Ntheura mwamkumanya kuti ine ndine FUMU Chiuta.”