Read new_tumbuka_bible Ezekiyele 24 Bible Online

Ezekiyele 24 - new_tumbuka_bible bible

Ezekiyele 24

¹Mu chirimika cha chinkhonde na chinayi, mu mwezi wa khumi, pa zuŵa la khumi la mwezi, mazgu gha FUMU ghakiza kwa ine ghakati,

²“Iwe mwana wa munthu, muhanya uno ulembe zina la zuŵa ili. Mu zuŵa leneili karonga wa charu cha Babuloni wakajarizga msumba wa Yerusalemu.

³Uyowoye ntharika ku nyumba ya chigaruka, ndipo uti kwa iwo: FUMU Chiuta wakuti, ‘Kharika chiŵiya pa moto, para wachikharika uthiremo maji,

⁴uŵikemo vipikita vya nyama, vipikita vyose viweme, chigha na mukhono. Uzuzgemo viwangwa viweme chomene.

⁵Utorepo chimoza cha vyakuŵeta icho nchiweme chomene, urundeko nkhuni kusi kwakhe. Uphike vipikita vyakhe, viwangwa vyakhe navyo vibwate mwenemumo.’ ”

⁶“Ntheura FUMU Chiuta wakuti, ‘Soka ku msumba wakunthiska ndopa, chiŵiya icho chili na murosko, murosko uwo undafumire kuwaro chara. Uwuskemo chipitika na chipitika, kwambula kurekapo na chimoza chara.

⁷Pakuti ndopa izo wali kuthiska zichali mwa iyo. Wali kuzithira pa jarawe, kuti wakazithira pasi kuti ziwundike na dongo chara.

⁸Pakuwuska ukari wane, na kuwezgera nduzga, ndopa izo uli kuthiska, ndazithira pa jarawe kuti zireke kuwundika.’

⁹Ntheura FUMU Chiuta wakuti, ‘Soka ku msumba uwo ukuthiska ndopa. Ine nane nditi ndirundepo nkhuni zinandi.

¹⁰Wunjika nkhuni, pemba moto, phika makora nyama ndipo uwuskemo musuni ndiposo viwangwa vyocheke.

¹¹Penepapo chiŵiya chambula kanthu uchiŵike pa makara mwakuti chithukire. Mkuŵa wakhe uphye chomene ndipo kufipirwa kwakhe kusongonoke mukati mwakhe, murosko wakhe umare.

¹²Ndajivuska pa waka. Murosko wakhe wakukhoma kuti ukufumamo na moto chara.

¹³Murosko wakhe ndi makhumbiro ghako gha ukazuzi. Nkhayezga kukutozga, kweni kuti ukatozgeka chara ku ukazuzi wako. Uti utozgekenge ku ukazuzi wako chara, ndisuke ndifiske ukari wane pa iwe.

¹⁴Ine FUMU Chiuta, ndine ndayowoya. Nyengo yiti yizenge, ndamkuchifiska. Kuti ndamkuwerera nyuma chara. Kuti ndamkuŵa na chitima nesi kugowoka chara. Wamkweruzgika kwakuyana na mendero na machitiro ghako.’ ” Ntheura ndimo yikuyowoyera FUMU Chiuta.

¹⁵Mazgu gha FUMU ghakiza kwa ine ghakati,

¹⁶“Iwe mwana wa munthu, ine ndili pafupi kuwuskapo mwa mabuchibuchi muwoli wako uyo maso ghako ghakucha nayo chomene. Ndipouli ungatengeranga chara, nesi kulira nanga nkhuthira masozi.

¹⁷Tampha, kweni ureke kukwezga mazgu. Ureke kutengera chifukwa cha ŵakufwa. Kaka chilemba chako ku mutu na kuvwara skapato ku malundi ghako. Ureke kujara ku maso nanga nkhurya chakurya cha awo ŵakutengera.”

¹⁸“Penepapo nkhayowoya ku ŵanthu na macherochero, ndipo ku na mise, muwoli wane wakafwa. Na machero ghakhe, nkhachita umo nkhalangulikira.”

¹⁹Ŵanthu ŵakandifumba ŵakati, “Kasi utiphalirenge chara icho vinthu ivi vikung'anamula kwa ise pakuchita ntheura?”

²⁰Penepapo nkhati kwa iwo, “Mazgu gha FUMU ghakiza kwa ine ghakati,

²¹‘Yowoya ku ŵaIsraele, uti kwa iwo, “FUMU Chiuta wakuti: Nditi ndikazuzge malo ghane ghakupatulika, kujikuzga kwa nkhongono zinu, malo agho maso ghinu ghakuthumbwiramo, ndiposo icho mitima yinu yikunwekera. Ŵana ŵinu ŵanarume na ŵanakazi awo muli kuŵareka kumanyuma ŵati wafwenge na nkhondo.

²²Imwe namwe mwamkuchita nga ndi umo ndachitira ine. Mureke kutengera, nesi kujara ku maso nanga nkhurya chakurya cha awo ŵakutengera.

²³Muvware vilemba ku mitu yinu, ndiposo na skapato ku malundi ghinu. Mwamkutengera chara, nesi kulira, kweni mwamkughanda chifukwa cha zakwananga zinu ndipo mwamkutamphirananga waka.

²⁴Ntheura ine Ezekiyele nditi ndiŵe chimanyikwiro kwa imwe. Mwamkuchita nga ndi umo ine ndachitira. FUMU yikuti para ivi vyachitika, mwamkumanya kuti iyo ndi FUMU Chiuta.” ’ ”

²⁵“Sono iwe mwana wa munthu, pa zuŵa ilo ndamkupokera linga lawo, ilo nchimwemwe na uchindami wawo, chinthu icho chikukondweska maso ghawo na icho mitima yawo ndiposo ŵana ŵawo ŵanarume na ŵanakazi ŵakunwekera,

²⁶pa zuŵa lira, yumoza uyo wamkuponapo, wamkwiza ndipo wamkukuphalira uthenga uwu.

²⁷Pa zuŵa lenelira ndipo mlomo wako wamkujurika kuti uyowoye na wakuponapo yura. Wamkuyowoya, ndipo kuti wamkuŵaso wa mbuwu chara. Ntheura wamkuŵa chimanyikwiro kwa iwo, ndipo iwo ŵamkumanya kuti ine ndine FUMU.”