Read new_tumbuka_bible Ezekiyele 25 Bible Online

Ezekiyele 25 - new_tumbuka_bible bible

Ezekiyele 25

¹Mazgu gha FUMU ghakiza kwa ine ghakati,

²“Iwe mwana wa munthu, razgira chisko chako ku ŵaAmoni ndipo uchime vyakuŵasuska iwo.

³Uŵaphalire ŵaAmoni kuti ŵapulike mazgu gha FUMU Chiuta. FUMU Chiuta wakuti, ‘Imwe mukayowoya kuti, “Eya” para mukawona kuti malo ghane ghakupatulika ghakukazuzgika, para mukawona kuti charu cha Israele chikuzgoka mapopa, ndipo ŵaYuda ŵakuyorokera ku umikori.

⁴Pa chifukwa ichi nditi ndimuperekani mu mawoko gha ŵanthu ŵa ku mafumiro gha dazi kuti muŵe chiharo chawo. Iwo ŵamkuzenga misasa na nyumba zawo mukati mwinu na kukhara mwenemumo. Ŵamkurya vipambi vyinu na kumwa mkaka winu.

⁵Ndamkuzgora msumba wa Raba kuŵa luhari lwa ŵangamila ndipo misumba ya ŵa Amoni kuŵa viŵaya vya vyakuŵeta. Ntheura mwamkumanya kuti ine ndine FUMU.’ ”

⁶Pakuti FUMU Chiuta wakuti, “Chifukwa chakuti mwakuŵa mawoko na kudukaduka kusekerera na charu cha Israele na mtima wa bina,

⁷Ine nditi ndinyoroske nkhongono yane kwimikana namwe. Ndamkumuperekani ku ŵamitundu kuti ŵamuskoghani. Ndamkumuwuskanimo mukati mu mafuko gha ŵanthu na kumusisitanimo mu vyaru vira. Ndamkumumarizgani nadi, ndipo mwamkumanya kuti ine ndine FUMU.”

⁸FUMU Chiuta wakuti, “Chifukwa chakuti ŵaMowabu[1] ŵakuti, ‘ŴaYuda ŵakuyana waka na mafuko ghanyakhe.

⁹Pa chifukwa ichi, ndamkubwangandula chigaŵa chinyakhe cha Mowabu kwamba ku misumba ya mu mphaka zakhe, iyo ndi misumba yakuchindikika mu charu, yeneiyo ndi Beti Yeshimoti, Baala Meyoni, na Kiriyatayimu.

¹⁰Nditi ndipereke ŴaMowabu na ŵaAmoni ku ŵamitundu ŵa ku mafumiro gha dazi kuŵa chiharo chawo, mwakuti ŵaAmoni ŵareke kukumbukika na mtundu uliwose wa ŵanthu.

¹¹Nditi ndilange ŵaMowabu mwakuti ŵati ŵamanye kuti ine ndine FUMU.’ ”

¹²“FUMU Chiuta wakuti, ‘Chifukwa chakuti ŵanthu ŵa ku Edomu ŵakawezgera nduzga pa ŵaYuda, ŵakajitorera mrandu pakuchita ntheura.’ ”

¹³“Ntheura FUMU Chiuta wakuti, ‘Nditi ndinyoroskere nkhongono yane kwimikana na charu cha Edomu, kusisitamo ŵanthu na vinyama ndipo kuzgora charu kuŵa mahami kufuma ku msumba wa Temani mpaka ku msumba wa Dedani. Ŵanthu ŵati ŵakomekenge na lupanga.

¹⁴Nditi ndiwezgere nduzga pa ŵaEdomu na nkhongono ya ŵanthu ŵane ŵaIsraele. Iwo ŵamkuchita nacho charu ichi kwakuyana na umo ukari na kutukutwa kwane kwaŵira, ndipo ŵamkumanya umo kuwezgera nduzga kwane kwaŵira.’ ” Ntheura ndimo FUMU Chiuta wakuyowoyera.

¹⁵“FUMU Chiuta wakuti, ‘Chifukwa chakuti ŵaFilisiti ŵakachita mwakuwezgera nduzga, ndipo ŵakawezgera nduzga na mtima wa nkhaza kuti ŵaparanye kufiska tinkho lawo lambula kumara.’

¹⁶Ntheura FUMU Chiuta wakuti, ‘Wonani nditi ndinyoroske woko lane kwimikana na ŵaFilisiti. Nditi ndiŵasisite ŵaKereti, ŵeneawo mbaFilisiti, na kuŵamara awo ŵakharako mu mphepete mwa nyanja.

¹⁷Nditi ndiwezgere nduzga yikuru na kuŵalangira mu ukari. Ntheura ŵamkumanya kuti ine ndine FUMU para ndawezgera nduzga pa iwo.’ ”