Read new_tumbuka_bible Ezekiyele 26 Bible Online

Ezekiyele 26 - new_tumbuka_bible bible

Ezekiyele 26

¹Mu chirimika cha 11 cha umikori withu, pa zuŵa lakudanga la mwezi, mazgu gha FUMU ghakiza kwa ine ghakati,

²“Iwe mwana wa munthu, pakuti ŵanthu ŵa mu msumba wa Ture ŵayowoya vya Yerusalemu kuti, ‘Eya! Msumba uwo ukaŵa chipata cha ŵamitundu wasweka. Vipata vyakhe vili mwazi panthazi pane. Tisambazgenge pakuti sono wazgoka mapopa.’ ”

³“Ntheura FUMU Chiuta wakuti, ‘Nditi ndimikane namwe imwe ŵanthu ŵa mu Ture. Nga ndi umo nyanja yikuwuskira majigha ghakhe, ntheura ndimo ine nditi ndiwuskire mafuko ghanandi kwimikana namwe.

⁴Iwo ŵizamkubwangandula malinga gha Ture, na kuwiskira pasi vigongwe vyakhe. Nditi ndikukure nyata yakhe yose, na kuzgora charu chakhe kuŵa jarawe lambula kumerapo kanthu.

⁵Msumba uwu wamkuŵa nga ndi chirwa mukati mu nyanja uko ŵanthu ŵakutandikako mikwawu yawo. Vyaru vya mitundumitundu vyamkuchiskogha. Ntheura ndimo FUMU Chiuta wakuyowoyera.

⁶Ndipo ŵanthu ŵakhe awo ŵakukhara mu vikaya vya mukati mu charu ŵamkukomeka na lupanga. Ntheura ŵamkumanya kuti ine ndine FUMU.’ ”

⁷FUMU Chiuta wakuti, “Wona, nditi ndize na Karonga Nebukadinezara, karonga wa charu cha Babuloni, karonga wa ŵakaronga kufuma ku mpoto kwimikana na Ture. Iyo wamkwiza na mahachi na magareta, ŵanthu ŵakukwera pa mahachi pamoza na ŵasilikari ŵanandi.

⁸Iyo wamkurwa na kukoma ŵanthu ŵako awo ŵakukhara mu vikaya vya mukati mu charu. Wamkuzenga vigongwe na vibumira vya nkhondo kulimbana nawe. Wamkuwuskira nguru zakhe za nkhondo pakulimbana nawe.

⁹Wizamkuwiska malinga ghako na visulo vyakugumulira ndipo na mbavi zakhe wizamkuwiskira pasi vigongwe vyako.

¹⁰Mahachi ghakhe ghamkuŵa ghanandi chomene mwakuti fuvu lawo lamkukubenekerera. Malinga ghako ghamkusunkhunyika na mphomezi ya mahachi ghakuyegha ŵakatundu ndiposo na ya mikombero ya magareta gha ŵasilikari ŵako para wakunjira mu chipata cha msumba wako nga ndi umo vikuchitikira para ŵakunjira mu msumba uwo wabwanganduka.

¹¹Misewu yako yose yizamkukandika na malundi gha mahachi ghakhe. Wizamkukoma ŵanthu ŵako na nkhondo, ndipo mizati yako ya nkhongono wizamkuwiskira pasi.

¹²Ŵarwani ŵako ŵizamkuskogha usambazi wako ndipo malonda ghako ghizamkukwapulika. Ŵizamkuwiskira pasi malinga ghako na kugumura nyumba zako zakutowa. Ŵamkuponya mawe ghako, mathabwa ghako ndiposo na dongo mukati mu nyanja.

¹³Ndamkuchetamiska mphomo ya sumu zako ndipo kulira kwa ŵabango ŵako kuti kwamkupulikikwa chara.

¹⁴Ndamkukuzgora kuŵa jarawe lambula na kanthu. Wamkuŵa malo uko ŵanthu ŵakutandikako mikwawu yawo, ndipo kuti wizamkuzengekaso chara. Ine FUMU ndine ndayowoya.” Ntheura ndimo FUMU Chiuta wakuyowoyera.

¹⁵“FUMU Chiuta wakuti ku msumba wa Ture, ‘Asi vyaru vya mu mphepete mwa nyanja vizamkusunkhunyika na mphomo yakuwa kwako, apo ŵakupwetekeka ŵizamkutampha ndipo apo ŵanthu ŵakukomeka mukati mwako.

¹⁶Ndipo nduna izo zili mu vyaru vya mu mphepete mwa nyanja zizamkuwukapo mu vizumbe vyawo, zamkuŵika pa mphepete minjilira yawo na kuvura malaya ghawo ghakuroŵeka ghara. Zamkuŵa na wofi ndipo zamkukhara pasi zikumbwambwantha kwambula kureka, kuzizwa ivyo vikuchitika kwa iwe.’

¹⁷Ndipo ŵamkuwuska chitengero kulirira iwe kuti: ‘Iwe msumba wa lumbiri, kasi waparanyika ntheura. Iwe pamoza na ŵanthu ŵako, mukaŵa ŵankhongono pa nyanja, mukaŵika chofyo chikuru mukati mu charu.

¹⁸Sono vyaru vya mu mphepete mwa nyanja vikutenthema, pa zuŵa la kuwira kwako. Nadi, virwa ivyo vili mu nyanja, vikuzizwa na kubwanganduka kwako.’ ”

¹⁹“FUMU Chiuta wakuti, ‘Para ndakuzgora iwe kuŵa msumba wakupankhuka, nga ndi misumba yambula ŵanthu, ndipo para ndakubenekerera na ndimba ya maji ndiposo para maji ghanandi ghakubizga iwe,

²⁰penepapo ndamkukuponyera pasi pamoza na awo ŵakukhilira ku dindi, ku ŵanthu ŵa kale. Ndamkukukharika ku charu cha kusi nga ndi ku mahami ghakale chomene pamoza na ŵanthu awo ŵakukhilira ku dindi. Ntheura kuti wamkuwerera chara nesi kusanga malo mu charu cha ŵamoyo.

²¹Nditi ndize na kupankhuka kwakofya pa iwe ndipo wamkumalirathu. Ŵanthu ŵamkukupenja, kweni kuti ŵamkukusanga chara.’ ” Ntheura ndimo FUMU chiuta wakuyowoyera.