Read new_tumbuka_bible Ezekiyele 27 Bible Online

Ezekiyele 27 - new_tumbuka_bible bible

Ezekiyele 27

¹Mazgu gha FUMU ghakiza kwa ine ghakati,

²“Iwe mwana wa munthu, chemerezga chitengero kulirira msumba wa Ture

³Uyowoye ku msumba wa Ture, uwo uli pa chipata chakuya ku nyanja, weneuwo ukuchita malonda na vyaru vinandi ivyo vili mu mphepete mwa nyanja, kuti FUMU Chiuta wakuti, ‘Iwe msumba wa Ture, ukuti, “Ine ndine wakutowa chomene.”

⁴Mphaka zako zili mukati mu zinyanja. Awo ŵakakuzenga ndiwo ŵakanozga utozi wako wakufikapo.

⁵Ŵakanozga mathabwa ghako ghose na makuni gha mulombwa gha ku Seniri. Ŵakatora makuni gha milanje gha ku Lebanoni, kuti ŵakunozgere mulongoti.

⁶Ŵakapanga nkhafyu zako, na makuni gha misoro gha ku Bashani. Ŵakanozga malo ghako gha pachanya na mathabwa gha khuni la mupapa, kufuma ku chirwa cha Kipuro, ndipo ghakabatikika na minyanga ya zovu.

⁷Salu za bafuta muweme zakuroŵeka makora zakufuma ku Eguputo ndizo zikaŵa thanga zako, zikakaŵa ndembera zako. Salu zako zakujara pachanya, zikaŵa za bululu na zichesamu, zakufuma ku chirwa cha Kipuro.

⁸Ŵanthu ŵa ku msumba wa Sidoni na wa Arivadi, ndiwo ŵakavuŵanga ngaraŵa zako. Iwe Ture, nkhwantha zako, ndizo zikendeskanga ngaraŵa zako.

⁹Ŵararaŵarara ŵa ku Gebala na nkhwantha zakhe ŵakaŵa mwa iwe, ndipo ndiwo ŵakajaranga vidorozi mu ngaraŵa zako. Ngaraŵa zose za mu nyanja na ŵendeski ŵakhe ŵakizanga kwa iwe kuchita nawe malonda.

¹⁰Ŵanthu kufuma ku Peresiya, Ludi na Puti, ndiwo ŵakakuteŵeteranga kuŵa ŵasilikari. Iwo ŵakapayikanga nguru na visoti vyawo pa iwe, ndipo ndi ŵeneaŵa awo ŵakakupa uchindami.

¹¹Ŵasilikari kufuma ku Arivadi na Heleki, ndiwo ŵakavikiriranga malinga ghako zingirizge. Ŵasilikari ŵa mu charu cha Gamadi, ndiwo ŵakalondanga vigongwe vyako. Iwo ŵakapayikanga nguru zawo mu malinga ghako zingirizge. Iwo ndiwo ŵakakupa utozi wakufikapo.

¹²“ ‘Charu cha Tarishishi chikachitanga malonda na iwe chifukwa cha usambazi wako wa mitundumitundu. Iwo ŵakizanga na siliva, chisulo, chithini na muthovu, ndipo iwe ukaŵapanga usambazi wako.

¹³Charu cha Yavani, cha Tubala na cha Mesheki ndivyo vikachitanga malonda na iwe. Ŵakizanga na ŵanthu kuŵa ŵazga, ndiposo na viteŵetero vya mkuŵa. Iwe ukaŵapanga usambazi wako.

¹⁴Ŵanthu ŵa ku Beti Togarima ŵakasinthiskanga malonda ghako na mahachi gha nchito, mahachi gha nkhondo na myulu.

¹⁵Ŵanthu ŵa ku chirwa cha Roda nawo ŵakachitanga malonda na iwe. Ŵanthu ŵa mu mphepete mwa nyanja ŵanandi ŵakizanga na mithulo ya minyanga ya zovu ndiposo na ya khuni la mphingwe. Iwe ukaŵapanga usambazi wako.

¹⁶Charu cha Aramu chikachitanga malonda na iwe chifukwa cha unandi wa usambazi wako. Pa ŵakatundu ŵako iwo ŵakasinthiskanga na mawe gha emeradi, salu zichesamu, salu zakuroŵa, salu za bafuta muweme, mawe gha korala na mawe gha rube. Iwe ukaŵapanga usambazi wako.

¹⁷Charu cha Yuda na cha Israele vikachita malonda na iwe. Pa malonda ghako vikasinthananga nawe tirigu, vipambi vya maolive, vikuyu vyakudanga kucha, uchi, mafuta gha maolive na munkhwara wakuphaka.

¹⁸Ŵanthu ŵa ku Damaseko ŵakachitanga malonda ghanandi na iwe chifukwa ukaŵa na usambazi unandi wa mtundumtundu. Iwo ŵakizanga na vinyo kufuma ku Heliboni na weya utuŵa wa mberere.

¹⁹Ŵakizangaso na vinyo kufuma ku Uzala, chisulo chakufulika, kasiya na zinde na kusinthiska na malonda ghako.

²⁰Charu cha Dedani chikachitanga malonda na iwe pakwiza na salu za viskaro vya pa ŵakavalo.

²¹Ŵanthu ŵa charu cha Arabiya na nduna zose za charu cha Kedara ŵakachitanga malonda na iwe. Iwo ŵakizanga na ŵana-mberere, mberere zanarume na mbuzi.

²²Ŵanthu ŵamalonda kufuma ku msumba wa Sheba na Raama ŵakachitanga malonda na iwe. Iwo ŵakizanga na vyakununkhira vyose viweme vya mtundumtundu, mawe ghose ghakuzirwa na golide.

²³Ŵamalonda ŵa ku misumba ya Harani, Kane na Edeni, Sheba, Ashuru na Kilimadi ŵakachitanga malonda na iwe.

²⁴Ŵanthu aŵa ŵakaguliskananga nawe vyakuvwara viweme, salu za bululu na salu zakuroŵekaroŵeka, ndiposo na mikeka yakuroŵeka iyo ŵakayikaka na vingwe na kuyikhozga chomene. Ivi ndivyo ŵakagulananga nawe.

²⁵Ngaraŵa za ku Tarishishi ndizo zikayeghanga malonda ghako. Ntheura iwe ukaŵa nga ndi ngaraŵa pakati pa nyanja yakuzura na katundu muzitu.

²⁶Ŵakuvuŵa ŵako ndiwo ŵakufumiska, kufuma mukati mu maji ghanandi. Kweni mphepo za kumafumiro gha dazi, zikabizga mukati mu zinyanja.

²⁷Usambazi wako, katundu wako, malonda ghako, ŵendeski na ŵarongozgi ŵa ngaraŵa, ŵakujara vidorozi na ŵa malonda ŵako, ŵasilikari wose awo ŵali na iwe, wose awo ŵakaŵa na iwe mu ngaraŵa, vyose vikabira mu nyanja, pa zuŵa la kubwanganduka kwako.

²⁸Charu cha mu mphepete mwa nyanja chizamkusunkhunyika, para ŵendeski ŵa ngaraŵa ŵako ŵizamkutengera.

²⁹Wose awo ŵakukora nkhafyu, ŵamkuzireka ngaraŵa zawo. Awo ŵakwenda pa nyanja na awo ŵakwendeska ngaraŵa ŵamkwimilira pa mtunda.

³⁰Iwo ŵamkutengera iwe, ndipo ŵamkulira chomene. Ŵamkujithilira fuvu ku mitu yawo, na kukunkhura pa vyoto.

³¹Ŵamkujimeta masisi chifukwa cha iwe, ndipo ŵamkuvwara vigudulu. Ŵamkukutengerera na mtima wakupweteka, ndipo ŵamkukulirira chomene.

³²Mu kulira kwawo ŵamkuwuska chitengero kukulira iwe kuti, “Kasi ndi njani uyo wali kupankhukako ntheura, nga ndi charu cha Ture mukati mu nyanja?

³³Para malonda ghako ghamkufumiranga mu nyanja, wamkukhorweska mafuko ghanandi. Na kuzara kwa usambazi wako na malonda ghako, ukasambazga ŵakaronga ŵa mu charu cha pasi.

³⁴Kweni sono wabwanganduka na majigha gha zinyanja, mu ndimba ya maji ghanandi. Malonda ghako na wose ŵakwendeska ngaraŵa, ŵabira pamoza na iwe.

³⁵Wose awo ŵakukhara mu mphepete mwa nyanja, ŵizamkuzukuma na iwe. Ŵakaronga ŵawo wose ŵamkutenthema chomene, visko vyawo vyabwanthuka na wofi.

³⁶Ŵamalonda mukati mu ŵamitundu ŵakukuseka. Iwe wafika ku umaliro wakofya chomene, ndipo uŵengekoso chara kwa muyirayira.” ’ ”