Read new_tumbuka_bible Ezekiyele 28 Bible Online

Ezekiyele 28 - new_tumbuka_bible bible

Ezekiyele 28

¹Mazgu gha FUMU ghakiza kwa ine ghakati,

²“Iwe mwana wa munthu, yowoya kwa karonga ya charu cha Ture uti: FUMU Chiuta wakuti, ‘Mu kujikuzga kwako, iwe ukuyowoya ukuti, “Ine ndine chiuta. Ine nkhukhara pa chizumbe cha ŵachiuta, mukatikati mwa zinyanja.” Kweni iwe ndiwe munthu, kuti ndiwe chiuta chara, nangauli ukujipima kuti uli wa mahara nga ndi chiuta.

³Kasi uli wa vinjeru kuruska Daniyele? Kasi kulije kanthu kakubisika kwa iwe?

⁴Na vinjeru vyako ndiposo na umanyi wako, wajisangira usambazi, ndipo wawunganya golide na siliva, mu vyakusungiramo vyuma vyako.

⁵Na unandi wa mahara ghako mu malonda, wandaniska usambazi wako. Chifukwa cha usambazi wako, mtima wako wayamba kujikuzga.’ ”

⁶Ntheura FUMU Chiuta wakuti, “Chifukwa ukujipima wa mahara nga ndi chiuta,

⁷nditi ndize na ŵanthu ŵachilendo pa iwe, ŵamitundu ŵakofya chomene. Iwo ŵamkusorora malupanga ghawo, kwimikana na mahara ghako, na kukazuzga uchindami wako.

⁸Ŵizamkukuponya pasi mu dindi, wizamkufwa nyifwa yakofya, mukatikati mwa zinyanja.

⁹Kasi wamkuyowoya kuti, ‘Ndine chiuta,’ panthazi pa awo ŵakukukoma? Iwe ndiwe munthu, kuti ndiwe chiuta chara, mu mawoko gha awo ŵakukukoma.

¹⁰Wamkufwa nga ndi munthu wambula kukotoreka, mu mawoko gha ŵanthu ŵachilendo. Pakuti ine ndine ndayowoya, wakuti FUMU Chiuta.”

¹¹Mazgu gha FUMU ghakiza kwa ine ghakati:

¹²“Iwe mwana wa munthu, wuska chitengero kulirira karonga wa msumba wa Ture, ndipo uti kwa iyo: FUMU Chiuta wakuti, ‘Ukaŵa chimanyikwiro cha uweme wakufikapo, ukaŵa wa vinjeru vinandi, ukaŵa wakufikapo mu utozi.’

¹³Iwe ukaŵa mu Edeni, munda wa Chiuta, ukatozgeka na mawe ghakuzirwa gha mitundumitundu: mawe gha rubi, gha topazi na gha yasipara, gha kilisolite, gha berile na gha onike, gha safire, gha barekati na gha emeradi. Apo ŵakakuŵika na kukuzonga pakaŵa pa golide. Pa zuŵa ilo ukalengekera ndipo vikanozgekera.

¹⁴Nkhimika mukerubi kuŵa mulinda wako. Ukaŵa pachanya pa phiri lakupatulika la Chiuta. Iwe ukendanga mukati mu mawe gha moto.

¹⁵Ukaŵa wakufikapo mu nthowa zako, kufuma pa zuŵa ilo ukalengekera, mpaka apo uheni ukasangikira mwa iwe.

¹⁶Chifukwa cha unandi wa malonda ghako, nkhaza zikakakura mu mtima wako, ndipo kukakutorera kukwananga. Ntheura nga ndi nchambula kutozgeka, kufumapo pa phiri la Chiuta, Mukerubi uyo wakuvikiriranga wakakuchimbizga, kufuma pa mawe gha moto.

¹⁷Ukajikuzga chifukwa cha kutowa kwako, ukananga mahara ghako kuti ukuzge uchindami wako. Ntheura nkhakubwefulira pasi, kuti uwonekere pakweru kwa ŵakaronga.

¹⁸Kwananga kukakura mu malonda ghako gha upusikizgi, mwakuti ukakazuzga malo ghako ghakupatulika. Ntheura nkhapemba moto mukati mwako, ndipo ukakumyangura iwe. Nkhakuzgora kuŵa vyoto pa charu, panthazi pa wose awo ŵakakuwonanga.

¹⁹Awo ŵakukumanya mukati mu ŵamitundu, ŵakuzukuma na iwe. Iwe wafika ku umaliro wakofya chomene, ndipo uŵengekoso chara kwa muyirayira.”

²⁰Mazgu gha FUMU ghakiza kwa ine ghakati:

²¹“Iwe mwana wa munthu, razgira chisko chako ku msumba wa Sidoni ndipo uchime pakuwususka kuti:

²²FUMU Chiuta wakuti, ‘Iwe Sidoni, ndimikane nawe, ndipo ndirongore uchindami wane mukati mwako. Ŵanthu wizamkumanya kuti ine ndine FUMU, para nkhufiska weruzgi wane pa iyo, na kurongora kupatulika kwane mukati mwakhe.

²³Ndamkuwutumira nthenda yakofya, mu misewu yakhe ndamkwendeska ndopa. Ŵakukomeka ŵamkugonerana mukati mwakhe, na nkhondo iyo yamkulimbana nawo kufuma kosekose. Penepapo ŵanthu ŵizamkumanya kuti ine ndine FUMU.’ ”

²⁴“ŴaIsraele kuti ŵamkuŵakoso na ŵazengezgani ŵawo chara awo ŵamkuŵapepuranga na kuŵalasa nga ndi minga panji mikolankhanga yakuŵapara.” Ntheura ŵamkumanya kuti ine ndine FUMU, Chiuta.

²⁵“FUMU Chiuta wakuti, ‘Para ndamkuwunganya ŵaIsraele kufuma mu mafuko agho ŵali kumbininikiramo, ndamkurongora kupatulika kwane mwa iwe kuti wose ŵawone. Penepapo ŵaIsraele ŵamkukhara mu charu chawo icho nkhapereka kwa muteŵeti wane Yakhobe.

²⁶Ŵamkukhara mwenemumo mwakufwasa, ndipo ŵamkuzenga zinyumba na kulima minda ya mpheska. Para ndamkufiska weruzgi wane ku ŵazengezgani ŵawo wose awo ŵakaŵapepuranga, ŵamkukhara mu kufwasa. Ntheura ŵamkumanya kuti ine ndine FUMU, Chiuta wawo.’ ”