Read new_tumbuka_bible Ezekiyele 29 Bible Online

Ezekiyele 29 - new_tumbuka_bible bible

Ezekiyele 29

¹Mazgu gha FUMU agho ghakiza kwa ine pa zuŵa la 12 la mwezi wa khumi mu chirimika cha khumi ghakaŵa agha:

²“Iwe mwana wa munthu, razgira chisko chako kwa Faro, karonga wa charu cha Eguputo, ndipo uchime pakumususka iyo na charu chose cha Eguputo.

³Uyowoye kwa iyo uti: FUMU Chiuta wakuti, ‘Nditi ndimikane na iwe, Iwe Faro, karonga wa charu cha Eguputo, iwe chinjoka chikuru cha mu nyanja, wa mweneiwe ukugona mu mironga yakhe, iwe ukuyowoya kuti, “Mronga wa Nayelo ngwane, ine ndine nkhawulenga.” ’

⁴Nditi ndinjizge mbeja mu njegheyeghe zako, ndipo somba za mu tumironga twako, ndamkuzidemerezga mu mamba ghako. Nditi ndikuzuwure kufuma mu tumironga twako, pamoza na somba zose za mu mamba ghako.

⁵Nditi ndikutayire kuwaro ku mapopa, iwe pamoza na somba zose za mu tumironga twako. Wamkuwira pasi ku thengere, kwambula na yumoza wakukutora nesi kukusunga. Wamkuŵa chakurya cha vikoko na viyuni vya mudera.”

⁶“Penepapo wose awo ŵakukhara mu charu cha Eguputo ŵamkumanya kuti ine ndine FUMU. Iwe charu cha Eguputo, wanguŵa nga ndi ndodo ya thete ku mbumba ya Israele.

⁷Para ŵakakukora, iwe ukaphyoka na kuhemba viŵegha vyawo vyose. Ndipo para ŵakuyagamira pa iwe, iwe ukuphyoka ndipo viwuno vyawo vyose vikusunkhunyika.

⁸Ntheura FUMU Chiuta wakuti, ‘Nditi ndikwizire na nkhondo ndipo yizamkukomamo ŵanthu na vikoko.

⁹Charu cha Eguputo chamkuŵa cha mahami, chambula ŵanthu. Ntheura ŵamkumanya kuti ine ndine FUMU.’ ” “Chifukwa chakuti ukuyowoya kuti, ‘Mronga wa Nayelo ngwane. Ine ndine nkhaulenga,’

¹⁰ntheura ine nditi ndimikane nawe iwe na mronga wa Nayelo. Nditi ndizgore charu cha Eguputo kuŵa cha mahami, chambula ŵanthu kufuma ku Migidoli mpaka ku msumba wa Siyeni, na kuya kafikaso ku mphaka za charu cha Etiyopiya.

¹¹Kwamkuŵavye munthu nesi chinyama kusorotamo mu charu ichi. Chamkuŵa chambula ŵanthu kwa virimika 40.

¹²Ndamkuzgora charu cha Eguputo kuŵa cha mapopa mukati mu vyaru vya mapopa. Misumba yakhe yamkuŵa yambula ŵanthu mukati misumba yambula ŵanthu kwa virimika 40. Ndamkuŵambininiska ŵaEguputo mukati mu mafuko gha ŵanthu. Nditi ndiŵaparanye mukati mu vyaru.”

¹³“FUMU Chiuta wakuti, ‘Pa umaliro wa virimika 40, ndamkuŵasosomora ŵaEguputo kufuma ku mafuko agho ŵakambininikiramo.

¹⁴Nditi ndiwezgere mauweme gha charu ichi na kwiza na ŵanthu ŵakhe kufuma ku umikori kwiza kakhara ku Patirosi uko ŵakakharanga kale. Kwenekuko ŵamkuŵa na ufumu wakuyuyuka.

¹⁵Ufumu uwu wamkuŵa wakuyuyuka chomene mukati mu mafuko ghose, ndipo wamkujikuzgaso chara mukati mu mafuko ghose. Nditi ndiŵachefye chomene mwakuti ŵareke kuwusaso mafuko ghanyakhe.

¹⁶Charu cha Eguputo chamkuŵaso chara charu icho ŵaIsraele ŵamkuchigomezga, kweni chamkuŵa charu chakuŵambuska uheni wawo wakuruta ku charu cha Eguputo kuya kapenja wovwiri. Ntheura ŵamkumanya kuti ine ndine FUMU Chiuta.’ ”

¹⁷Mu chirimika cha 27 cha umikori withu, pa zuŵa lakudanga la mwezi wakudanga, mazgu gha FUMU ghakiza kwa ine, ghakati,

¹⁸“Iwe mwana wa munthu, Karonga Nebukadinezara wa charu Babuloni wakawuska ŵasilikari ŵakhe kwimikana na msumba wa Ture, mpaka mitu ya ŵanthu wose yikaŵa chipara ndipo viŵegha vyawo vikafyopoka. Ndipouli, nanga wakaŵa iyo nesi ŵasilikari ŵakhe kuti ŵakatorapo kanthu chara kufuma mu msumba wa Ture kulipira nchito iyo ŵakateŵeta mu msumba uwu.”

¹⁹Ntheura FUMU Chiuta wakuti, “Nditi ndipereke charu cha Eguputo kwa Nebukadinezara, karonga wa charu cha Babuloni. Iyo wizamkutora usambazi wakhe, wizamkuwuskogha na kuwupoka. Ivi ndivyo vyamkuŵa malipiro gha ŵasilikari ŵakhe.

²⁰Ndamupa Nebukadinezara charu cha Eguputo kuŵa malipiro gha nchito yakhe chifukwa iyo na ŵasilikari ŵakhe ŵakateŵeteranga ine.” Ntheura ndimo FUMU Chiuta wakuyowoyera.

²¹“Pa zuŵa leneilo ndamkuwezgeraso nkhongono za ŵaIsraele ndipo ndamkukupa iwe Ezekiyele nkhongono za kuyowoyera kwa iwo. Penepapo ŵamkumanya kuti ine ndine FUMU.”