Read new_tumbuka_bible Ezekiyele 3 Bible Online

Ezekiyele 3 - new_tumbuka_bible bible

Ezekiyele 3

¹Penepapo FUMU yikati kwa ine, “Mwana wa munthu, ryanga icho chapika kwa iwe. Ryanga buku ili, ndipo urute ukayowoye ku ŵaIsraele.”

²Ntheura nkhayasama, ndipo wakandipa buku lira kuti ndirye.

³FUMU yikati kwa ine, “Mwana wa munthu, ryanga buku ili, ilo nkhukupa kuti ukhute mu nthumbo mwako.” Penepapo nkharya buku lira, ndipo mu mlomo wane likanowa nga ndi uchi.

⁴FUMU yikati kwa ine, Mwana wa munthu, ruta ku fuko la Israele, ukaŵaphalire mazgu ghane.

⁵Pakuti nkhukutuma ku ŵanthu ŵa chiyowoyero cha chilendo na chinonono chara, kweni ku ŵanthu ŵa fuko la Israele.

⁶Ine kuti nkhukutuma ku mafuko ghakuru chara agho kayowoyero kawo nkha chilendo ndipo chiyowoyero chawo nchinonono, cheneicho mazgu ghakhe ungapulika chara. Nadi, ndikutumenge kwa iwo, mphanyi ŵangukupulika.

⁷Kweni ŵa fuko la Israele kuti ŵamkukupulika chara, pakuti ŵakakhumba kundipulika ine chara, chifukwa wose mba mutafu na ŵa mitima yinonono.

⁸Ine nditi ndikuzgore iwe kuŵa nga ndiwo. Uti uŵe wa mutafu na wa mtima unonono kwa iwo.

⁹Nditi ndinonofye mtima wako kuruska libwe la sangalawe. Ungopanga iwo chara nesi kuthika lusoko para ukuŵawona, pakuti ndi ŵanthu awo ŵali kundigarukira ine.

¹⁰FUMU yikarutilira kuyowoya yikati, “Iwe mwana wa munthu, mazgu ghose agho nditi ndiyowoye kwa iwe, ughapokerere mu mtima wako na kughapulikiska chomene.

¹¹Ruta ku ŵanthu ŵa ku kwinu awo ŵali ku umikori, ukaŵaphalire kuti: FUMU Chiuta wakuti, ‘Manyi muti mupulike panji mureke kupulika.’ ”

¹²Penepapo Mzimu wakandiwuska, ndipo kumanyuma kwane nkhapulika mphomo ya mazgu ghakuru ghakuti, “Urumbike uchindami wa FUMU kweneuko iyo yikukhara.”

¹³Uku kukaŵa kupoma kwa mapapindo gha vilengiwa vira uko kukakhwaskananga, na mphomo ya mikombero yeneiyo yikaŵa mu mphepete mwawo, iyo yikapulikikwanga nga ndi chindindindi chikuru.

¹⁴Penepapo Mzimu wakandiwuskira muchanya ndipo wakanditorera kutali. Nkharuta na mtima wakuŵa, pakuti FUMU yikandizira na nkhongono.

¹⁵Nkhaya kafika ku Tele Abibu, pafupi na mronga wa Kebara uko ŵakakharanga ŵamikori. Nkhakhara mukati mwawo pa mazuŵa ghankhonde na ghaŵiri na wakuzukuma waka.

¹⁶Ghakati ghajumphapo mazuŵa ghara ghankhonde na ghaŵiri, FUMU yikayowoya kwa ine yikati,

¹⁷“Iwe mwana wa munthu, ine ndakuzgora iwe kuŵa mulinda wa fuko la ŵaIsraele. Para ukupulika mazgu ghane, urutenge kwa iwo na kuŵachenjezga.

¹⁸Usange nkhumuphalira munthu muheni kuti, ‘Iwe uti ufwenge nadi,’ kweni iwe kuti ukumuchenjezga chara, nesi kumuphalira kuti wawereko ku nthowa zakhe ziheni mwakuti uthaske umoyo wakhe, wati wafwenge wachali wakwananga. Ndipo ine nditi ndikupe mrandu chifukwa chakufwa kwakhe.

¹⁹Kweni usange wamuchenjezga muheni yura, ndipo iyo wakurutilira kwenda mu nthowa zakhe ziheni, wati wafwenge wachali wakwananga, kweni iwe uti uponoske umoyo wako.”

²⁰“Cha chiŵiri, usange munthu murunji wakuwerako kukuchita urunji, ndipo wakuchita ubendezi, ndipo ine nkhumuŵikira chikhuŵazgo panthazi pakhe, wati wafwenge usange iwe ukureka kumuchenjezga. Wati wafwenge wachali mu kwananga kwakhe. Milimo yakhe ya urunji iyo wakachitanga pakudanga, kuti ndamkuyikumbuka chara. Ndipo ine nditi ndikupe mrandu chifukwa chakufwa kwakhe.

²¹Kweni usange wamuchenjezga murunji yura kuti wareke kwananga ndipo iyo wakureka nadi kwananga, wati waŵenge wa moyo, ndipo iwe nawe uti uponoske umoyo wako.”

²²Nkhongono ya FUMU yikaŵa pa ine, ndipo yikati kwa ine, “Wuka, urute ku chidika ndipo kwenekura ndiko ndamkuyowoya kwa iwe.”

²³Ntheura nkhawuka na kuruta ku chidika. Ndipo kwenekura nkhawona uchindami wa FUMU uwo ukaŵa nga ndi uchindami uwo nkhawuwona ku mronga wa Kebara. Ntheura nkhawa pasi kavunama.

²⁴Penepapo Mzimu wakanjira mwa ine na kundiyimika chiliri na malundi ghane. FUMU yikayowoya kwa ine yikati, “Rutanga ukajijalire mu nyumba yako.

²⁵Ndipo mwenemura, iwe mwana wa munthu, ŵamkukukaka na vingwe mwakuti ureke kufumira kuwaro ku ŵanthu.

²⁶Ine nditi ndidemerezge lulimi lwako ku chavu cha mlomo wako mwakuti uŵe wa mbuwu na wambula kumanya kuchenjezga ŵanthu ŵeneaŵa ŵachigaruka.

²⁷Kweni para nkhuyowoya kwa iwe, nditi ndisutule mlomo wako, ndipo iwe wamkuti kwa iwo, FUMU Chiuta wakuti, ‘Yose uyo wakukhumba kupulika, rekani wapulike, ndipo yose uyo wakukhumba kureka kupulika, rekani wakane kupulika, pakuti ŵeneaŵa ndi fuko la chigaruka.’ ”