Read new_tumbuka_bible Ezekiyele 30 Bible Online

Ezekiyele 30 - new_tumbuka_bible bible

Ezekiyele 30

¹Mazgu gha FUMU agho ghakiza kwa ine ndi agha:

²“Iwe mwana wa munthu, chima ndipo uyowoye kuti: FUMU Chiuta wakuti, ‘Tengerani ndipo muyowoye kuti, “Soka chifukwa cha zuŵa leneilo!”

³Zuŵa laneng'enera, zuŵa la FUMU liri pafupi. Liŵenge zuŵa la maŵingu nyengo ya soka ku ŵamitundu

⁴Nkhondo yamkwiza pa charu cha Eguputo, vyakuŵinya vyamkwiza pa charu cha Etiyopiya. Para ŵakukomeka ŵakugonerana mu charu cha Eguputo, para usambazi wakhe watoreka, malufura ghakhe yizamkupankhuka.’ ”

⁵Ŵasilikari awo ŵamkufuma ku Etiyopiya, ku Puti, ku Ludi, ku charu chose cha Arabiya, ku Libiya na ŵasilikari awo ŵakukoreranako nawo, wizamkukomeka pa nkhondo pamoza na Eguputo.

⁶“FUMU yikuti: ‘Awo ŵakuzomerezgana na charu cha Eguputo ŵamkukomeka, nkhongono zakhe izo wakujikuzga nazo zamkumara. Kufuma ku Migidoli mpaka ku Siyeni, ŵanthu ŵamkufwa na nkhondo.’ ” Ntheura ndimo FUMU Chiuta wakuyowoyera.

⁷“Vyaru vyeneivi vyamkuŵa mapopa, mukati mu vyaru vya ku mapopa. Misumba yawo yamkupankhuka, mukati mu misumba yakupankhuka.

⁸Para ndamkubuska moto pa charu cha Eguputo, ndipo awo ŵakumovwira wose ŵaphwanyika, ŵamkumanya kuti ine ndine FUMU.”

⁹“Para zuŵa leneilo liza, nthumi zamkwenda luŵiro kufuma kwa ine kuya kawofya charu cha Etiyopiya awo mbambula na kulorako. Urwirwi wamkwiza pa iwo pa zuŵa ilo Eguputo. Sono zuŵa leneilo laneng'enera.”

¹⁰“FUMU Chiuta wakuti, ‘Nditi nditume Nebukadinezara, karonga wa charu cha Babuloni, kumarizga usambazi wa charu cha Eguputo.

¹¹Iyo pamoza na ŵasilikari ŵakhe, ŵanthu ŵankhaza mukati mu mafuko, ŵamkwiza kuti ŵapankhure charu. Iwo ŵamkwiza na nkhondo pa charu cha Eguputo, na kukoma ŵanthu ŵanandi mu charu.’

¹²Ndamkomizga mronga wa Nayelo, na kuchiguriska charu ku ŵanthu ŵaheni. Na nkhongono ya ŵalendo, ndamkubwangandula charu na kose ako kali mwenemumo. Ine FUMU ndine ndayowoya.”

¹³“FUMU Chiuta wakuti, ‘Nditi ndiparanye ŵangoza, na kumarizga vikozgo vyawakawaka mu msumba wa Memufisi. Mwamkuŵavye wakuwusa mu charu cha Eguputo, ndipo ndamkuŵikamo wofi mu charu cha Eguputo.

¹⁴Msumba wa Patirosi wamkuŵa chiparamba, ndamkupemba moto mu msumba wa Zowani, na kufiska weruzgi wane pa msumba wa Tebesi.

¹⁵Ndamkupungulira ukari wane pa Pelusiyamu, weneuwo ndi linga la charu cha Eguputo, na kumarizga chiwuru cha ŵasilikari ŵa ku Tebesi.

¹⁶Ndamkupemba moto mu charu cha Eguputo, msumba wa Pelusiyamu wamkuŵa mu vyakuŵinya vikuru. Msumba Tebesi wamkusweka, malinga ghakhe ghamkubwangandukira pasi.

¹⁷Ŵanyamata ŵa msumba wa Oni na wa Pibeseti, ŵamkukomeka na nkhondo, ndipo ŵanakazi ŵamkuyorekera ku umikori.

¹⁸Lamkuŵa zuŵa la mdima ku msumba wa Tapanesi, para ndamkumarizga mazaza gha charu cha Eguputo, kujikuzga kwa nkhongono zakhe kwamkumara. Bingu lamkubenekerera charu, ŵanthu ŵakhe ŵamkutorekera ku umikori.

¹⁹Ntheura ndamkufiska weruzgi wane mu charu cha Eguputo, ndipo ŵamkumanya kuti ine ndine FUMU.’ ”

²⁰Mu chirimika cha 11 cha umikori withu, pa zuŵa la chinkhonde na chiŵiri mu mwezi wakudanga, mazgu gha FUMU agho ghakiza kwa ine ghakati,

²¹“Iwe mwana wa munthu, ndaphyora woko la Faro, karonga wa charu cha Eguputo. Palije na yumoza uyo wakakapo, nesi kuŵikapo kasalu kuti lipore mwakuti likore lupanga.”

²²“Ntheura FUMU Chiuta wakuti, ‘Nditi ndimikane na Faro, karonga wa charu cha Eguputo. Nditi ndiphyore mawoko ghakhe ghose ghaŵiri, lakuphyoka na lambula kuphyoka lira, ndipo lupanga ulo luri ku woko lakhe luwenge pasi.

²³Nditi ndimbininiske ŵaEguputo mukati mu ŵamitundu. Nditi ndiŵabarariskire ku vyaru vyakupambanapambana.

²⁴Ndamkukhozga mawoko gha karonga wa charu cha Babuloni na kuŵika lupanga lwane mu mawoko ghakhe. Kweni ndamkuphyora mawoko gha Faro, ndipo wamkugona pasi wakupwetekeka ndipo wamkutampha panthazi pa iyo.

²⁵Ndamkukhozga mawoko gha karonga wa charu cha Eguputo, kweni mawoko gha Faro, ghamkuŵavye nkhongono. Pamanyuma ŵamkumanya kuti ine ndine FUMU, para ndamkuŵika lupanga lwane mu mawoko karonga wa charu cha Babuloni, na kuwuskira lupanga ulu pa charu cha Eguputo.

²⁶Nditi ndimbininiske ŵaEguputo mukati mu ŵamitundu na kuŵabarariska mu vyaru vyakupambanapambana. Ntheura ŵamkumanya kuti ine ndine FUMU.’ ”