Read new_tumbuka_bible Ezekiyele 31 Bible Online

Ezekiyele 31 - new_tumbuka_bible bible

Ezekiyele 31

¹Mu chirimika cha 11 cha umikori withu, mu mwezi wa chitatu, pa zuŵa lakudanga, mazgu gha FUMU ghakiza kwa ine, ghakati,

²“Iwe mwana wa munthu, yowoya kwa Faro, karonga wa charu cha Eguputo, na ku ŵanthu ŵakhe, uti kwa iwo, ‘Kasi ukuru wako ukuwuyaniska na njani?

³Wona, nditi ndikulinganizgenge na khuni la milanje la mu charu cha Lebanoni. Minthavi yakhe yikaŵa yiweme chomene, ndipo yikapereka mufwiri mu nkhorongo. Likakura kuŵa litali, mpaka songa zakhe zikafika ku maŵingu.

⁴Maji ndigho ghakawukuzga, ndimba ya maji ndiyo yikawutalikiska. Mironga yakhe yikwenda kulizingirizga, na kutuma tumironga twakhe ku khuni lose la mu thengere.

⁵Ntheura likakura kuŵa litali, kuruska makuni ghose gha mu thengere. Minthavi yakhe yikaŵa yitali, chifukwa yikaŵa na maji ghanandi.

⁶Viyuni vyose vya mudera, vikazenga vivimbo vyawo mu minthavi yakhe. Vikoko vyose vya mu thengere, vikababiranga kusi ku minthavi yakhe. Mafuko ghakurughakuru ghose, ghakakharanga mu mufwiri wakhe.

⁷Likaŵa khuni lakutowa mu ukuru wakhe, na mu utali mu minthavi yakhe. Pakuti misisi yakhe yikanjira pasi, ku maji ghanandi.

⁸Milanje ya mu munda wa Chiuta kuti yikulingana na khuni ili chara, nanga ndi mulombwa, kuti ukulingana na minthavi yakhe chara. Mukaŵavye khuni la mukarakate ilo likaŵa na minthavi ya ntheura. Mu munda wa Chiuta mukaŵavye khuni lakutowa, ilo likalingana na leneili.

⁹Ndine nkhalitozga khuni ili, pakulipa minthavi yinandi. Makuni ghose mu Edeni, munda wa Chiuta, ghakadokeranga kuŵa nga ndilo.’ ”

¹⁰“Ntheura FUMU Chiuta wakuti, ‘Chifukwa likakura kuŵa muchanya mpaka songa zakhe zikafika ku maŵingu, ndiposo chifukwa chakuti likajikuzga na utali wakhe,

¹¹nditi ndilipereke mu mawoko gha murongozgi uyo ngwa nkhongono chomene mukati mu ŵamitundu kuti wachite nalo nchito kwakuyana na ubendezi wakhe. Ine ndalitaya.

¹²Vyaru vya chilendo, vya nkhaza chomene mukati mu mafuko gha ŵamitundu, vyamkulidumulira pasi na kulitaya waka. Minthavi yakhe yamkuwira mu mapiri na mu madambo ghose, ndipo minthavi yakhe yakuphyoka yamkuŵa mu tumironga tose twa mu charu. Ŵanthu ŵa mu charu ŵamkufumamo mu mufwiri wakhe na kulireka lekha.

¹³Pa khuni lakuwa leneili, pakharenge viyuni vyose vya mudera, ndipo vikoko vyakhe vyose vya mu thengere vyamkukhara mu minthavi yakhe.

¹⁴Ichi chamkuŵa ntheura mwakuti paŵavye khuni na limoza la mu mphepete mwa maji ilo lamkumera mpaka muchanya panji kukwera songa zakhe mpaka ku maŵingu. Paŵavyeso khuni na limoza ilo likupokera makora maji, leneilo utali wakhe ungakafika kuchanya ku maŵingo. Pakuti makuni ghose ghali kupimikira kufwa, ku malo gha kusi kwa charu, mukati mu ŵanthu, pamoza na awo ŵakukhirira mu malo gha ŵakufwa.’ ”

¹⁵“FUMU Chiuta wakuti, ‘Pa zuŵa ilo khuni lamkuwira kuya kusi ku malo gha ŵakufwa, ndamkuzgora ndimba ya nyanja kuti yitengerere khuni ili. Ndamkomizga maji ghakhe ghanandinandi, tumironga twakhe, nkhorongo ya Lebanoni yamkuŵa mu mdima chifukwa cha leneili, ndipo makuni ghose gha mu thengere yamkomira.

¹⁶Ŵamitundu ŵamkumbwambwantha pa mphomo ya kuwa kwakhe, para ndaliponya pasi ku malo gha ŵakufwa pamoza na awo ŵakukhilira ku dindi. Makuni ghose gha mu munda wa Edeni, ghakusankhika na ghaweme chomene gha mu charu cha Lebanoni, na ghose agho ghakuthiririka makora, ghamkusanguruskika kusi kwa charu cha pasi.

¹⁷Ghose ghati ghakhilire kusi ku malo gha ŵakufwa kuŵa pamoza nagho, kuya ku awo ŵali kukomeka na lupanga. Nadi wose awo ŵakakharanga mukati mu ŵamitundu kusi ku mufwiri wakhe ŵamkumara petu.’ ”

¹⁸“Kasi pa makuni gha mu munda wa Edeni, ndi khuni ndi ilo lingayana na iwe mu uchindami na mu ukuru. Pakaŵavye khuni lirilose mu Edeni ilo likaŵa litali na lakukondweska. Ndipouli nga ndi makuni gha mu Edeni, nalo lamkukhilira kusi ku charu cha pasi na kuŵa pamoza na awo mbambula kukotoreka awo ŵali kukomeka na lupanga.” “Uyu ndiyo Faro na wose awo ŵakuzomerezgana nayo.” Ntheura ndimo FUMU Chiuta wakuyowoyera.