Read new_tumbuka_bible Ezekiyele 32 Bible Online

Ezekiyele 32 - new_tumbuka_bible bible

Ezekiyele 32

¹Mazgu gha FUMU ghakiza kwa ine pa zuŵa lakudanga la mwezi wa mu chirimika cha 12 cha umikori withu ghakati,

²“Iwe mwana wa munthu, wuska chitengero kulirira Faro, karonga wa charu cha Eguputo, ndipo uti kwa iyo, ‘Iwe ukujipima kuŵa nga ndi nkharamu, mukati mu ŵamitundu, kweni uli nga ndi chikoko chakofya cha mu nyanja. Ukuvundura maji gha mu mironga yako, ukubinkhiska maji na malundi ghako, na kunanga mironga na mathipa.’

³FUMU Chiuta wakuti, ‘Na chiwuru chikuru cha mafuko ghanandi, nditi ndiponye mukwawu wane pa iwe, ndipo ŵamkukuguzira pa mlima na mukwawu wane.

⁴Ndamkukutaya pasi, na kukubwefulira pa mutandasanya. Ndizenge na viyuni vya mudera kuti videke pa iwe, ndiposo na vikoko vyose vya mu charu kuti virye yako.

⁵Nyama yako ndamkuyiparanyira ku mapiri, na kuzuzga madambo na viwangwa vyako.

⁶Ndamkunyevya charu na ndopa zako zakwenda kuya kafika ku mapiri, ndipo vinkhwawu vyamkuzura na ndopa zako.

⁷Para ndamkukusisita, ndamkujara mtambo, ndipo ndamkufipiska nyenyezi zakhe. Ndamkujara dazi na bingu, ndipo mwezi kuti wamkuŵala chara.

⁸Vyakuŵala vyose vya ku mlengalenga, ndamkuvizimyiska pa iwe, ndamkwiza na mdima pa charu chako.’ ” Ntheura ndimo FUMU Chiuta wakuyowoyera.

⁹“Ndamkusuzga mitima ya ŵanthu ŵanandi para ndamkukutorera ku umikori mukati mu ŵamitundu, ku vyaru ivyo kuti ukuvimanya chara.

¹⁰Ndamkuchita kuti ŵanandi ŵazukume na iwe, ndipo ŵakaronga ŵawo ŵamkutenthema para ndamkuzungunya lupanga lwane panthazi pawo. Pa zuŵa la kubwanganduka kwako, ŵakaronga ŵawo ŵamkutenthema chifukwa cha umoyo wawo.”

¹¹“FUMU Chiuta wakuti, ‘Nkhondo ya karonga wa charu cha Babuloni yamkwiza kwa iwe.

¹²Ndamkuchitiska kuti chiwuru chako cha ŵasilikari chikomeke na malupanga gha vinkhara, vyeneivyo vyose nvyakofya chomene mukati mu ŵamitundu. Iwo ŵamkumarizga kujikuzga kwa charu cha Eguputo, chiwuru chakhe chose cha ŵasilikari chizamkumara.

¹³Ndazamkuparanya vikoko vyawo vyose, ivyo vikukhara mu mphepete mwa maji ghanandi. Kwamkuŵavye lundi la munthu, nesi la vikoko kughavunduraso maji agha.

¹⁴Ntheura ndamkuzgora maji ghawo kuti ghadame, na kwendeska mironga yawo nga ndi mafuta.’ ” Ntheura ndimo FUMU Chiuta wakuyowoyera.

¹⁵“Para ndamkuchizgora charu cha Eguputo kuŵa mapopa, na kuwuskamo chilichose icho chili mwenemumo, para ndakoma wose awo ŵakukhara mwenemumo, ŵamkumanya kuti ine ndine FUMU.”

¹⁶“Yeneiyi ndiyo yamkuŵa sumu ya chitengero. Ŵanakazi ŵa mu mafuko gha mu charu ŵamkuyiyimba. Ŵati ŵayimbire charu cha Eguputo na ŵanthu ŵakhe wose.” Ntheura ndimo FUMU Chiuta wakuyowoyera.

¹⁷Mu chirimika cha 12 cha umikori withu, pa zuŵa la 15 la mwezi wakudanga wenewura, mazgu gha FUMU ghakiza kwa ine ghakati,

¹⁸“Iwe mwana wa munthu, uŵatengerere ŵanthu ŵanandinandi ŵa ku Eguputo. Uŵatume, iwo pamoza na ŵanthu ŵa mu mafuko ghakuzirwa ku malo gha ŵakufwa, ku awo ŵali kuruta ku dindi.

¹⁹Uŵafumbe kuti, ‘Kasi ndimwe ŵakutowa kuruska wose? Muti mukhilire ku dindi, mukagone pamoza na awo mbambula kukotoreka.’ ”

²⁰“Ŵamkufwira pamoza na awo ŵali kukomeka na lupanga. Viwuru vyakhe vyose vizamkugona pamoza nawo.

²¹Mukati mu ŵakufwa, ŵarongozgi ŵankhongono ŵamkuyowoya vya iwo na awo ŵakuzomerezgana nayo kuti, ‘Ŵakhilira kusi ku malo gha ŵakufwa, ndipo ŵakugona pamoza na awo mbambula kukotoreka, ŵeneawo ŵakakomeka na lupanga.’ ”

²²“Kwenekura kuli Asiriya ndipo wali kuzingirizgika na madindi gha ŵasilikari ŵakhe. Wose ŵakakomeka mu nkhondo.

²³Madindi ghawo ghali pasi chomene mu malo gha ŵakufwa, ndipo chiwuru cha ŵasilikari ŵakhe chazingirizga dindi lakhe. Wose aŵa ŵakakomeka na nkhondo awo kale ŵakaperekanga wofi ku ŵanthu ŵamoyo.”

²⁴“Kwenekura kuli Elamu ndipo wali kuzingirizgika na madindi gha chiwuru cha ŵasilikari ŵakhe. Wose ŵakakomeka mu nkhondo ndipo ŵakaruta ku charu cha ŵakufwa kwambula kukotoreka. Iwo ŵakaperekanga wofi mu charu cha ŵamoyo kweni sono ŵakukhozgeka soni pamoza na ŵeneawo ŵali kukhilira ku dindi.

²⁵Elamu ŵakamusunga pakati pa ŵakukomeka pamoza na chiwuru chose cha ŵasilikari ŵakhe, kuzingirizga dindi lakhe. Wose aŵa mbambula kukotoreka ndipo ŵali kukomeka na lupanga. Pakuti ŵeneaŵa ŵakaperekanga wofi mu charu cha ŵamoyo, kweni sono ŵakukhozgeka soni pamoza na ŵeneawo ŵali kukhilira ku dindi. Iwo ŵali kusungika pamoza na awo ŵali kukomeka.”

²⁶“Kwenekura kuli Mesheki na Tubala ndipo ŵali kuzingirizgika na madindi gha chiwuru cha ŵasilikari ŵawo. Wose ŵakaŵa ŵambula kukotoreka ndipo ŵakakomeka mu nkhondo. Iwo ŵakaperekanga wofi mu charu cha ŵamoyo kweni sono ŵakukhozgeka soni pamoza na ŵeneawo ŵali kukhilira ku dindi.

²⁷“Ŵeneaŵa kuti ŵali kugona na vinkhara vya kale chara, vyeneivyo vili kukhilira ku malo gha ŵakufwa pamoza na mahomwa ghawo gha nkhondo. Malupanga ghawo ŵakaghaŵika kusi kwa mitu yawo, ndipo nguru zawo pachanya pa viwangwa vyawo. Kale chomene, vinkhara ivi vikofyanga ŵanthu mu charu cha ŵamoyo.

²⁸“Na iwe Faro, wamkuphyoka na kugona pamoza na ŵambula kukotoreka, ŵeneawo ŵakukomeka na lupanga.

²⁹“Kwenekura kuli charu cha Edomu pamoza na ŵakaronga na nduna zakhe zose. Nangauli ŵakaŵa vinkhara mu nkhondo, kweni ŵali kugona pamoza na awo ŵali kukomeka na lupanga. Ŵeneaŵa ŵali kukhilira ku malo gha ŵakufwa ndipo ŵakugona pamoza na awo mbambula kukotoreka.

³⁰“Kwenekura kuli ŵakaronga wose ŵa ku mpoto ndiposo na ŵanthu ŵa ku Sidoni, ŵeneawo na soni ŵali kukhilira ku dindi pamoza na awo ŵali kukomeka, pakuti, chifukwa cha nkhongono, ŵakaperekanga wofi ukuru. Kweni, kwambula kukotoreka, ŵali kugona pamoza na awo ŵali kukomeka mu nkhondo. Ŵakukhozgeka soni pamoza na ŵeneawo ŵali kukhilira ku dindi.

³¹“Faro wamkusanguruka pamoza na chiwuru cha ŵasilikari ŵakhe pakuwona kuti ndiyo yekha pera chara mweneuyo ŵasilikari ŵakhe ŵafwa para ŵamkuwona wose awo ŵakakomeka mu nkhondo.” Ntheura ndimo FUMU Chiuta wakuyowoyera.

³²“Nangauli Faro wakofyanga mu charu cha ŵamoyo, ndipouli iyo pamoza na ŵasilikari ŵakhe wose ŵamkusungika pamoza na awo ŵakakomeka na lupanga, ŵeneawo mbambula kukotoreka.” Ntheura ndimo FUMU Chiuta wakuyowoyera.