Read new_tumbuka_bible Ezekiyele 33 Bible Online

Ezekiyele 33 - new_tumbuka_bible bible

Ezekiyele 33

¹Mazgu gha FUMU ghakiza kwa ine ghakati,

²“Iwe mwana wa munthu, yowoya ku ŵanthu ŵa ku kwinu ndipo uti kwa iwo, ‘Usange nkhwiza na nkhondo mu charu, ndipo ŵanthu ŵa mu charu chira ŵakusankha munthu yumoza mukati mwawo kuŵa mulinda wawo,

³usange iyo wakuwona nkhondo yikwiza mu charu chakhe, na kulizga mbata kuchenjezga ŵanthu,

⁴ndipo usange yunji wakupulika kulira kwa mbata yira, kweni kuti wakulorako na nchenjezgo ya mbata yira chara, wati wakomeke na nkhondo yira. Mrandu wa nyifwa iyi wamkuŵa pa iyomwene.

⁵Usange wakapulika kulira kwa mbata yira, kweni kuti wakalorako nchenjezgo yira chara, mrandu wa nyifwa iyi wamkuŵa pa iyomwene. Usange wapulikirenge nchenjezgo iyi, mphanyi wanguponoska umoyo wakhe.

⁶Usange mulinda wakuwona nkhondo yikwiza ndipo kuti wakulizga mbata chara kuti ŵanthu ŵachenjezgeke, ndipo nkhondo yikwiza na kukoma waliyose wa iwo, munthu yura wamkufwira mu kwananga kwakhe. Ine ndamkuŵika mrandu wa nyifwa ya munthu uyu pa mulinda.’ ”

⁷“Sono iwe mwana wa munthu, ine ndakwimika iwe kuŵa mulinda wa ŵaIsraele. Nyengo yose para wapulika mazgu kufuma kwa ine, uŵachenjezge ŵanthu.

⁸Para nkhuyowoya kwa munthu wakwananga kuti, ‘Iwe munthu wakwananga, uti ufwenge nadi’, ndipo iwe kuti ukumuchenjezga chara munthu wakwananga yura kuti wawereko ku mendero ghakhe ghaheni, munthu wakwananga yura wati wafwenge mu kwananga kwakhe, kweni mrandu wa nyifwa yakhe wamkuŵa pa iwe.

⁹Kweni usange wamuchenjezga munthu wakwananga yura, kuti wawereko ku mendero ghakhe ghaheni, ndipo iyo kuti wakuwerako chara ku mendero ghakhe ghaheni, wati wafwenge mu kwananga kwakhe, kweni iwe uti uponoske umoyo wako.”

¹⁰“Iwe mwana wa munthu, uŵaphalire ŵaIsraele ndipo uti kwa iwo: Imwe mwayowoya kuti, ‘Majuvyo ghithu na kwananga kwithu vili pa ise ndipo tikughanda navyo, kasi tingaŵa nayo uli umoyo?’

¹¹Uŵaphalire ŵanthu uti kwa iwo: FUMU Chiuta wakuti, ‘Nkhurapa nadi, ine kuti nkhukondwa na nyifwa ya munthu wakwananga chara. Kweni nkhukondwa kuti wakwananga wawereko ku mendero ghakhe ghaheni, waŵe na umoyo. Wererani! Wererani ku mendero ghinu ghaheni, kasi muti mufwirengechi imwe ŵaIsraele?’ ”

¹²“Sono, iwe mwana wa munthu, uŵaphalire ŵanthu ŵa ku kwinu uti kwa iwe, ‘Urunji wa munthu murunji kuti wamkumuthaska chara para wakwananga. Ndipo kwananga kwa munthu muheni kuti kwamkumunjizga mu nyifwa chara usange wakuwerako ku uheni wakhe. Para munthu murunji wakwananga, iyo kuti wamkuponoskeka chara chifukwa cha urunji wakhe.’

¹³Usange nkhumuphalira munthu murunji kuti waŵenge na umoyo nadi, ndipouli iyo wakugomezga mu urunji wakhe na kuchita uheni, palije mlimo wakhe wa urunji uwo wamkukumbukika chara. Kweni mu kwananga uko wachita, wati wafwenge nako.

¹⁴Ndipo usange nkhumuphalira wakwananga kuti, ‘Uti ufwenge nadi’, ndipo usange iyo wakuwerako ku kwananga kwakhe na kuchita icho nchiweme na cha kunyoroka,

¹⁵ndipo wakuwezga icho wakatora na icho wakiba, usange wakurondezga marango agho ghakupereka umoyo ndipo wakureka kwananga, munthu uyu wati waŵenge na umoyo nadi, kuti wati wafwenge chara.

¹⁶Palije kwananga kwakhe kose uko wakachitanga uko kuti kukumbukikenge. Chifukwa chakuti wakuchita icho nchakunyoroka na chiweme, wati waŵenge na umoyo.”

¹⁷“Ndipouli ŵanthu ŵa ku kwinu ŵakuti, ‘Nthowa za FUMU kuti ndi zakunyoroka chara’. Kweni ndi nthowa zawo izo kuti ndi zakunyoroka chara.

¹⁸Usange munthu murunji wakureka kuchita icho ncha urunji, wakuchita icho nchiheni, wati wafwenge chifukwa cha uheni uwo wakuchita.

¹⁹Usange munthu wakwananga wakureka kukuchita uheni ndipo wakuchita icho nchakunyoroka na chiweme, wati waŵenge na umoyo chifukwa chakuchita icho nchiweme.

²⁰Kweni imwe ŵaIsraele mukuti, ‘Nthowa za FUMU kuti ndi zakunyoroka chara.’ Ine ndamkweruzga munthu waliyose kwakuyana na machitiro ghakhe.”

²¹Pa zuŵa la chinkhonde la mwezi wa khumi mu chirimika cha 12 cha umikori withu, munthu yumoza uyo wakachimbira kufuma ku Yerusalemu wakiza kwa ine ndipo wakati, “Msumba wawa.”

²²Na mise pambere munthu yura wandafike, nkhongono ya FUMU yikaŵa pa ine, ndipo FUMU yikajula mlomo wane pambere iyo wandafike kwa ine na mulenje. Ntheura mlomo wane ukaŵa wakujurika, kuti nkhaŵaso wa mbuwu chara.

²³Mazgu gha FUMU agho ghakiza kwa ine, ghakati,

²⁴“Iwe mwana wa munthu, ŵanthu awo ŵakukhara mu mahami gha charu cha Israele ŵakurutilira kuyowoya kuti, ‘Abrahamu wakaŵa yekha, ndipouli wakatora charu kuŵa chiharo chakhe. Kweni ise tili ŵanandi. Nadi, charu chikwenera kuŵa chiharo chithu.’

²⁵Ntheura uŵaphalire ŵaIsraele, uti kwa iwo: FUMU Chiuta wakuti, ‘Imwe mukurya nyama iyo yichali na ndopa, mukusopa vikozgo vyinu, ndipo mukukoma, kasi charu chingaŵa chinu uli?

²⁶Imwe mukugomezga mu nkhondo zinu, mukuchita vinthu vya ukazuzi, ndipo waliyose wa imwe wakukazuzga muwoli wa munyakhe. Kasi charu chingaŵa chinu uli?’ ”

²⁷“Uŵaphalire ndipo uti kwa iwo: FUMU Chiuta wakuti, ‘Nkhurapa nadi, awo ŵali mu mahami, ŵizamkukomeka na nkhondo, awo ŵamkuŵa ku thengere, ndamuŵapereka ku vikoko kuti ndivyo viŵarye, ndipo awo ŵamkuŵa mu malinga na mu zimphanji ŵamkufwa na nthenda yakofya.

²⁸Ndamkuzgora charu kuŵa cha mapopa, chambula ŵanthu ndipo nkhongono izo chikujikuzgirapo zamkumara. Mapiri gha charu cha Israele ghamkuŵa mapopa mwakuti kwamkuŵavye na yumoza wakuporotamo.

²⁹Para ndamkuzgora charu kuŵa cha mapopa chambula ŵanthu, chifukwa cha maukazuzi agho ŵali kuchita, ŵamkumanya kuti ine ndine FUMU.’ ”

³⁰“Kwakuyana na iwe mwana wa munthu, ŵanthu ŵa ku kwinu ŵakuwungana na kukusesa iwe para ŵali mu makhonde, na mu miryango ya zinyumba zawo ndipo ŵakuyowoyeskana kuti, ‘Tiyeni sono tikapulike mazgu ghakufumira kwa FUMU.’

³¹Ŵanthu ŵane ŵakwiza kwa iwe nga ndi umo ŵakuchitira nyengo zose, ndipo ŵakukhara panthazi pako kuti ŵapulike mazgu kufuma kwa iwe, kweni kuti ŵakuchita ivyo ŵakupulika chara. Pakuti na milomo yawo ŵakurongora kutemwa kukuru chomene, kweni mitima yawo ŵali kuŵika pakupoka chandulo.

³²Ndipo iwe, kwa iwo uli nga ndi uyo wakwimba sumu za kutemwa na mazgu ghakukondweska na kulizga makora kwa kalimba. Pakuti ŵakupulika ivyo ukuyowoya, kweni kuti ŵakuvichita chara.

³³Para mazgu ghako ghafiskika ndipo chawoneka nadi, ŵamkumanya kuti nchimi yanguŵa mukati mwawo.”