Read new_tumbuka_bible Ezekiyele 34 Bible Online

Ezekiyele 34 - new_tumbuka_bible bible

Ezekiyele 34

¹Mazgu gha FUMU ghakiza kwa ine ghakati,

²“Iwe mwana wa munthu, chima kususka ŵaliska ŵa charu cha Israele. Pakuchima uti kwa iwo: FUMU Chiuta wakuti, ‘Soka ku ŵaliska ŵa charu cha Israele ŵeneawo ŵakujipwererera ŵekha. Asi ŵaliska ŵakwenera kupwererera mberere?

³Imwe mukumwa mkaka wakhe. Mukujivwarika vyakufuma mu maweya ghakhe, mukukoma na kurya twana twawo twakututuŵa, kweni kuti mukuzipwererera mberere chara.

⁴Mberere zakutomboroka kuti mwazikhozga chara, zakurwara kuti mwazichizga chara, zakupwetekeka kuti mwazikaka kasalu chara, zakupuruka kuti mwaziwezga chara, zakuzgeŵa kuti mwazipenja chara, ndipo mwaziliska mwakuchichizga na mwankhaza.

⁵Ntheura zikaparanyikana chifukwa zikaŵavye muliska ndipo zikazgoka chakurya cha vikoko vyose.

⁶Mberere zane zikaparanyika na kuyingayinga mu mapiri ghose na mu tumapiri tose tutali. Mberere zane zikambininikira pa charu chose cha pasi ndipo pakaŵavye na yumoza wakazirondezga nesi kuzipenja.’ ”

⁷“Ntheura imwe ŵaliska, pulikani mazgu gha FUMU.

⁸FUMU Chiuta wakuti, ‘Nkhurapa nadi, chifukwa mberere zane zazgoka kuŵa nyama ndipo zazgoka kuŵa chakurya cha vikoko vyose vya mu thengere, pakuti zikaŵavye muliska, ndiposo chifukwa ŵaliska ŵane kuti ŵakazipenja mberere zane chara, kweni ŵakajiliska iwo ŵekha, ndipo ŵalije kuziliska mberere zane,’

⁹ntheura imwe ŵaliska, pulikani mazgu gha FUMU.

¹⁰FUMU Chiuta wakuti, ‘Nkhwimikana na ŵaliska. Nditi ndiŵapoke mberere zane ndipo ŵaziriskengeso chara. Nditi ndiŵarekeske kuliska mberere, ndipo ŵizamkureka kupwerera vya iwo ŵekha. Nditi ndithaske mberere zane ku milomo yawo mwakuti zireke kuŵa chakurya chawo.’ ”

¹¹“FUMU Chiuta wakuti, ‘Ine ndekha ndine ndamkuzirondezga na kuzipenja mberere zane.

¹²Nga ndi umo muliska wakupwererera mskambo wakhe para mberere zinyakhe zaparanyika kutali pakuya kazipenja, ntheura ine nane nditi ndirute kuya kazipenja mberere zane. Ndamkuzithaska kulikose uko zili kuparanyikira pa nyengo ya maŵingu na pa nyengo ya mdima.

¹³Ndamkuzisokorora kufuma mu ŵamitundu na kuziwungana kufuma mu vyaru vya chilendo na kuziŵika mu charu chawo na chawo. Ndamkuziliskira mu mapiri gha mu charu cha Israele pafupi na tumironga, na mu malo ghose umo mukukhara ŵanthu.

¹⁴Ndamkuziliskira mu maluhari ghaweme na mu mapiri ghatali gha charu cha Israele. Mwenemura zamkupumulanga mu maluhari ghaweme na kuryanga luhari lwakutikitira mu mapiri gha charu cha Israele.

¹⁵Ine ndekha ndamkuŵa muliska wa mberere zane, ndipo ndamkuzisangira malo ghakupumula. Ntheura ndimo FUMU Chiuta wakuyowoyera.

¹⁶Ndamkuzipenja izo zili kusoŵa, ndamkuziwezga izo zili kupuruka, ndamkuzikaka vilonda vyawo izo zili kupwetekeka. Izo nzakutomboroka ndamkuzikhozga, kweni izo nzakututuŵa na za nkhongono ndamkuziparanya. Ndamkuziriska mberere zane mu urunji.’ ”

¹⁷“Kwakuyana na imwe, mskambo wane, FUMU Chiuta wakuti, ‘Wonani, ine ndamkweruzga pakati pa mberere yimoza na yinyakhe, pakati pa mberere zanarume na ŵapepe.

¹⁸Kasi chikuŵa chakukhutiska chara kwa imwe kurya luhari luweme? Kasi nchifukwa uli mukukandirizgira pasi na malundi ghinu ivyo mukurya chara? Kasi mukukhorwa chara para mukumwa maji ghaweme? Kasi nchifukwa uli maji agho mukureka kumwa mukughavundura na malundi ghinu?

¹⁹Kasi mberere zane ziryenge ivyo mwavikandirizgira pasi na malundi ghinu, na kumwa maji agho mwaghavundura na malundi ghinu?’ ”

²⁰“Ntheura FUMU Chiuta wakuti, ‘Wonani, ine ndekha ndamkweruzga pakati pa mberere zakututuŵa na zakughanda.

²¹Imwe mukuzikanchizgira kutali mberere zakutomboroka na viŵegha vyinu, ndipo zakurwara mukuzibwanyula na masengwe ghinu mpaka ziparanyikire kutali.

²²Nditi ndithaske mskambo wane, kuti zamkuŵaso chakurya cha vikoko chara. Ine ndamkweruzga pakati pa mberere yimoza na yinyakhe.

²³Nditi ndizimikire muliska yumoza wakuŵa nga ndi Davide, muteŵeti wane, uyo wamkuzipwererera na kuŵa muliska wawo.

²⁴Ine FUMU, ndamkuŵa Chiuta wawo ndipo Davide, muteŵeti wane wamkuŵa karonga wawo mukati mwawo. Ine FUMU ndine ndayowoya.’ ”

²⁵“Ndamkuchita phangano na mberere zane kuti ziŵe pa mutende na mu kufwasa. Ndamkuchimbizgamo vikoko mu charu mwakuti zikharenge mu mapopa na kugona mu thengere kwambula kopa.

²⁶Ndamkuziŵika pafupi na phiri lane ndipo ndamkuzirokweskera vura pa nyengo yakwenerera. Yamkuŵa vura ya vitumbiko.

²⁷Makuni gha mu minda yamkupambika vipambi vyawo ndipo minda yamkuŵa na vuna yakhe. Ŵanthu ŵane ŵamkukhara mu kufwasa mu charu chawo. Para ndamkubanthura vikondo vya goliwoli lawo na kuŵathaska ku awo ŵakaŵatorera ku umikori, ŵamkumanya kuti ine ndine FUMU.

²⁸Ŵamitundu kuti ŵamkuskoghaso ŵanthu ŵane chara, nesi kuŵa chakurya cha vikoko chara. Ŵamkukhara mu kufwasa chomene ndipo kwamkuŵavye na yumoza wakuŵachuruska.

²⁹Ndamkuŵapa minda yiweme ya vyakurya mwakuti ŵareke kufwa na njara mu charu chenechira, nanga nkhuyuyurika na ŵamitundu.

³⁰Ntheura ŵamkumanya kuti ine FUMU, Chiuta wawo ndili mukati mwawo ndipo iwo ŵaIsraele mbanthu ŵane.” Ntheura ndimo FUMU Chiuta wakuyowoyera.

³¹“Imwe ndimwe mberere zane. Ndimwe ŵanthu ŵane, mberere za mu luhari lwane. Ine ndine Chiuta winu.” Ntheura ndimo FUMU Chiuta wakuyowoyera.