Read new_tumbuka_bible Ezekiyele 35 Bible Online

Ezekiyele 35 - new_tumbuka_bible bible

Ezekiyele 35

¹Mazgu gha FUMU ghakiza kwa ine ghakati,

²“Iwe mwana wa munthu, razgira chisko chako ku charu cha mapiri cha Edomu ndipo uchime pakuchisuska.

³Uchime uti: FUMU Chiuta wakuti, ‘Nkhukususka iwe charu cha mapiri cha Edomu, ndipo nditi ndinyoroske woko lane kwimikana nawe, na kukuzgora iwe kuŵa mapopa na mayiyi.

⁴Ndamkupankhura misumba yako, ndipo iwe wamkuzgoka kuŵa phasulo.’ Ntheura mwamkumanya kuti ine ndine FUMU.

⁵“Imwe mukarongora tinkho lambula kumara, ndipo ŵaIsraele mukaŵapereka ku nkhondo pa nyengo ya soka lawo, nyengo ya kulangika kwawo kwa umaliro.

⁶Ntheura FUMU Chiuta wakuti, ‘Nkhurapa nadi, nditi ndithiske ndopa mukati mwinu ndipo kuthiska ndopa kuti kumurondezganinge. Pakuti imwe muli na mrandu wakuthiska ndopa ntheura kuthiska ndopa kuti kumurondezganinge.

⁷Ndamkuzgora charu cha mapiri cha Edomu kuŵa mapopa na mayiyi. Ndamkumaramo wose awo ŵakwizamo na awo ŵakufumamo.

⁸Mapiri ghakhe ndamkughazuzga na vitanda. Vitanda vya ŵanthu awo ŵakomeka na nkhondo vyamkuŵa pa tumapiri twako, madambo ghako ndiposo na mu vinkhwawu vyako.

⁹Ndamkuzgora iwe kuŵa mayiyi kwa muyirayira, ndipo misumba yamkuŵa yambula ŵanthu. Penepapo mwamkumanya kuti ine ndine FUMU.’

¹⁰“Imwe mukuyowoya kuti, ‘Mafuko ghaŵiri, Yuda na Israele, pamoza na vyaru vyawo, viti viŵenge vyithu, nangauli FUMU yikaŵa mwenemumo.’

¹¹Ntheura FUMU Chiuta wakunena kuti pa chifukwa ichi nkhurapa nadi kuti ndamkumuchitirani mu ukari na bina, kwakuyana na kutukutwa na sanje, ivyo mukarongora pa chifukwa cha kuŵatinkha. Ndipo ndamkuŵa wakumanyikwa kwa imwe para nkhumweruzgani.

¹²Penepapo mwamkumanya kuti ine FUMU ndili kupulika kutuka kwinu uko mukachitanga kususka mapiri gha Israele apo mukatenge, ‘Mapiri gha Israele ghazgoka mapopa ndipo ghaperekeka kwa ise kuti tighaskoghe.’

¹³Imwe mukujikuzga mukuyowoya kwinu pakwimikana nane ndipo mwayowoya mazgu ghanandi ghakwimikana nane. Ine ndekha ndaghapulika mazgu gheneagha.”

¹⁴FUMU Chiuta wakuti, “Nditi ndikuzgore kuŵa mapopa mwakuti charu chose cha pasi chikondwe chifukwa cha kuwa kwako.

¹⁵Ine nditi ndimuchitirani nga ndi umo imwe mukachitira para mukakondwa pakuwa kwa ŵanthu ŵane ŵaIsraele. Charu cha mapiri cha Edomu chamkuŵa mapopa. Ntheura mwamkumanya kuti ine ndine FUMU.”