Read new_tumbuka_bible Ezekiyele 36 Bible Online

Ezekiyele 36 - new_tumbuka_bible bible

Ezekiyele 36

¹FUMU yikati, “Iwe mwana wa munthu, chima ku mapiri gha Israele ndipo uyowoye kuti, ‘Imwe mapiri gha charu cha Israele, pulikani mazgu gha FUMU.’

²FUMU Chiuta wakuti, ‘Ŵarwani ŵinu ŵakuyowoya mwakujikuzga ŵakuti, “Eya, malo gha kale ghakukwera, sono ghazgoka kuŵa chiharo chithu.” ’ ”

³Ntheura iwe chima na kunena kuti FUMU Chiuta wakuti, “Apo ŵamitundu ŵakamuzgorani kuŵa mayiyi na kumugundizgani kosekose, mpaka imwe mukazgoka kuŵa chiharo cha mitundu yinyakhe, ŵanthu ŵakamunenaninge na kumusesani.”

⁴Ntheura imwe mapiri gha Israele, pulikani mazgu gha FUMU Chiuta. FUMU Chiuta wakuti ku mapiri na ku tumapiri, ku vinkhwawu na ku madambo, ku mahami na ku misumba yambula ŵanthu iyo yaskogheka na kusekeka na ŵamitundu awo ŵakukhara kuzingirizga imwe ndi ichi,

⁵“FUMU Chiuta wakuti, ‘Na mtima wa sanje mu kutukutwa kwane, nkhususkana na ŵamitundu awo ŵakharako, ndiposo na ŵanthu wose ŵa ku Edomu. Iwo ŵakajitorera charu chane kuŵa chiharo chawo na mtima wakukondwa pamoza na mtima wakupepura mwakuti ŵachipoke na kuchiskogha.’

⁶Ntheura uchime na vya charu cha Israele ndipo ku mapiri na ku tumapiri, ku vinkhwawu na ku madambo uti, ‘FUMU Chiuta wakuti, nkhuyowoya mu sanje na mu kutukutwa kwa mu mtima wane chifukwa ŵamitundu ŵamuyuyurani.’

⁷Ntheura FUMU Chiuta wakuti, ‘Nkhurapa nadi, kuti ŵamitundu awo ŵali kumuzingirizgani, nawo ŵamkutombozgeka nadi.’

⁸“Kweni imwe mwa mapiri gha Israele, mwamkusunda minthavi na kuŵapambira vipambi ŵanthu ŵane ŵaIsraele, pakuti ŵali pafupi kwiza ku kwawo.

⁹Wonani, ine nkhupwererako za imwe ndipo nditi ndimulengerani lusungu. Minda yinu yamkulimika na kupandika.

¹⁰Ndamkwandaniska ŵanthu pa imwe, ndiwo nyumba yose ya Israele. Mu misumba mwamkukhara ŵanthu, ndipo mahami ghamkuzengekaso.

¹¹Ndamkwandaniska ŵanthu ŵinu ndiposo na viŵeto vyinu. Vyamkwandana pakubaba ŵana. Ŵanthu ŵamkwandana nga ndi umo ŵakaŵira mu mazuŵa gha kale. Nditi ndimuchitireni uweme kuruska uwo nkhamuchitirani mu nyengo zakudanga. Ntheura muti mumanye kuti ine ndine FUMU.

¹²Nadi, nditi ndichite kuti ŵaIsraele ŵanthu ŵane ŵakhare mukati mwinu. Iwo ŵamkutora imwe, ndipo mwamkuŵa chiharo chawo ndipo imwe kuti mwamkuŵapokaso ŵana chara.

¹³“FUMU Chiuta wakuti: Ŵanthu ŵanji ŵakuyowoya vya iwe kuti, ‘Iwe ndiwe charu icho chikurya ŵanthu ŵakhe ndipo fuko lako likuŵa lambula ŵana.’

¹⁴Kweni kuti ŵamkuryaso ŵanthu ŵako chara, nesi kureka fuko lako lambula ŵana. Ntheura ndimo yikuyowoyera FUMU.

¹⁵Ndizomerezgengeso chara kuti upulike kutombozgeka nesi kusunjizgika kwa ŵamitundu, panji nesi iwe kukhuŵaliska fuko lako.” Ntheura ndimo FUMU Chiuta wakuyowoyera.

¹⁶Mazgu gha FUMU ghakiza kwa ine ghakati,

¹⁷“Iwe mwana wa munthu, para ŵaIsraele ŵakharanga mu charu chawo, ŵakachikazuzga na nthowa zawo ziheni ndiposo na machitiro ghawo ghaheni. Nthowa zawo ziheni zikaŵa nga ndi kukazuzgika kwa mwakanazi kwa mwezi uliwose panthazi pane.

¹⁸Ntheura nkhafumiskira ukari wane pa iwo chifukwa cha ndopa izo ŵakathiska pa charu, ndiposo na umo ŵakachikazuzgira na vikozgo vyawo.

¹⁹Nkhaŵambininiska mukati mu ŵamitundu ndipo ŵakaparanyikira ku vyaru vya mitundumitundu. Nkhaŵeruzga kwakuyana na nthowa zawo ziheni ndiposo na milimo yawo yiheni.

²⁰Ndipo kose uko ŵakaruta mukati mu ŵamitundu, ŵakakazuzga zina lane lituŵa, chifukwa ŵanthu ŵakayowoyanga kuti, ‘Aŵa ndi ŵanthu ŵa FUMU, ndipouli ŵakafumiskika mu charu chakhe.’

²¹Ine nkhenjerwa chifukwa cha zina lane lituŵa leneilo ŵaIsraele ŵakalikazuzga mukati mu ŵamitundu uko ŵakaruta.”

²²“Ntheura uŵayowoyere ŵaIsraele, uti kwa iwo: FUMU Chiuta wakuti, ‘Imwe ŵaIsraele, ine nkhuchita ichi chifukwa cha imwe chara, kweni chifukwa cha zina lane lituŵa ilo mwalikazuzga mukati mu ŵamitundu uko muli kuruta.

²³Ine nditi ndirongore kupatulika kwa zina lane likuru ilo lakazuzgika mukati mu ŵamitundu, zina ilo imwe mwalikazuzga mukati mwawo. Para ndarongora kupatulika kwa zina lane, ŵamitundu ŵamkumanya kuti ine ndine FUMU. Ntheura ndimo yikuyowoyera FUMU.

²⁴Pakuti ine ndamkumufumiskani mu vyaru vya ŵamitundu. Ndamkumuwunjikani kufuma mu vyaru vyose na kwiza namwe mu charu chinu na chinu.

²⁵Ndamkumija maji ghaweme pa imwe ndipo imwe mwamkutowa. Ndamkumutozgani kufuma ku ukazuzi winu wose na ku vikozgo vyinu vyose.

²⁶Ndamkumupani mtima uphya na kuŵika mzimu uphya mwa imwe. Ndamkufumyamo mtima unonono nga ndi libwe mwa imwe na kumupani mtima utechi nga ndi munofu.

²⁷Ndamkuŵika mzimu wane mwa imwe na kumuchiskani kuti murondezge vilayizgo vyane na kusunga makora marango ghane.

²⁸Ntheura mwamkukhara mu charu icho nkhapereka ku ŵawiskemwekuru. Mwamkuŵa ŵanthu ŵane ndipo ine nane ndamkuŵa Chiuta winu.

²⁹Ndimuthaskani ku ukazuzi winu wose. Ndamkwandaniska tirigu ndipo wamkuŵaso na njara chara.

³⁰Ndamkwandaniska vipambi vya makuni na vya mbuto ya minda yinu, mwakuti mureke kulengeskeka na njara mukati mu ŵamitundu.

³¹Penepapo mwamkukumbuka nthowa zinu ziheni na milimo yinu iyo kuti yikaŵa yiweme chara. Ndipo mwamkunyanyara mwekha chifukwa cha kwananga kwinu na maukazuzi ghinu.’

³²FUMU Chiuta wakuti, ‘Nkhukhumba kuti imwe mumanye kuti ine nkhuchita ichi chifukwa cha imwe chara. Mwe ŵaIsraele, muŵe na soni na kulengeskeka chifukwa cha nthowa zinu ziheni.’ ”

³³“FUMU Chiuta wakuti, ‘Pa zuŵa ilo ndamkumutozgerani ku zakwananga zinu zose, ndilo zuŵa ndamkumukhazikirani mu misumba ghinu ndipo mahami ghinu ghamkuzengeka.

³⁴Charu icho chikaŵa chambula kulimika panthazi pa wose awo ŵakajumphangapo, chamkulimika.’

³⁵Ŵanthu ŵamkuyowoya kuti, ‘Charu ichi, cheneicho chikaŵa cha mayiyi sono chazgoka nga ndi munda wa Edeni. Misumba iyo yikapasuka yambula ŵanthu na kubwanganduka, sono mukukhara ŵanthu ndipo yili na malinga.’

³⁶Penepapo ŵamitundu awo ŵakharako kuzingirizga imwe, ŵamkumanya kuti ine FUMU ndine nkhuzengaso misumba iyo yikapankhuka na kumezga vyakumera mu malo ghakwanangika. Ine FUMU ndayowoya ndipo nditi ndichichite.”

³⁷“FUMU Chiuta wakuti, ‘Nditi ndiŵazomerezgeso ŵaIsraele kuti ŵandirombe ivyo ŵakukhumba kuti ndiŵachitire. Ndamkwandaniska ŵanthu ŵawo kuŵa ŵanandi nga ndi mberere.

³⁸Ŵamkuŵa ŵanandi nga ndi mberere na mbuzi izo zikuperekeka kuŵa sembe mu Yerusalemu mu nyengo za viphikiro vyakhe vyakwimikika. Ntheura misumba iyo yili kupankhuka yamkuzura na ŵanthu ŵanandi chomene. Penepapo iwo ŵamkumanya kuti ine ndine FUMU.’ ”