Read new_tumbuka_bible Ezekiyele 37 Bible Online

Ezekiyele 37 - new_tumbuka_bible bible

Ezekiyele 37

¹Nkhongono ya FUMU yikaŵa pa ine ndipo Mzimu wakhe ukandiyeghera na kwiza kandiŵika pasi mukati mwa dambo ilo likazura na viwangwa.

²FUMU yikandiyendeska mukati mu viwangwa vira zingirizge. Vikaŵa vinandi chomene mu dambo lira ndipo vikaŵa vyakomira.

³FUMU yikati kwa ine, “Iwe mwana wa munthu, kasi viwangwa ivi vingaŵa na umoyo?” Ine nkhati, “Mwe FUMU Chiuta, imwe pera ndimwe mukumanya.”

⁴FUMU yikati kwa ine, “Uchime ku viwangwa ivi ndipo uviphalire uti, ‘Imwe mwa viwangwa vyakomira, pulikani mazgu gha FUMU.’

⁵FUMU Chiuta wakuti ku viwangwa ivi, ‘Nditi ndithutire muvuchi mwa imwe, ndipo muti muŵenge ŵamoyo.

⁶Nditi ndiŵike misipa mwa imwe, kuwezgeramo munofu na kubenekerera chikumba. Nditi ndithutire muvuchi mwa imwe ndipo muti muŵenge ŵamoyo. Penepapo mwamkumanya kuti ine ndine FUMU.’ ”

⁷Ntheura nkhamba kuchima nga ndi umo nkhalangulikira. Ndipo apo nkhachimanga, nkhapulika kamphomezi ka kusunkhunyika kwa viwangwa ndipo vyose vikalungana pamoza, chinyakhe na chinyakhe.

⁸Apo nkhalaŵiskanga, vikaŵa na misipa ndipo minofu yikiza pa ivyo, ndipo chikumba chikavibenekerera. Kweni muvuchi kuti ukaŵamo mwa ivyo chara.

⁹Ntheura FUMU yikati kwa ine, “Iwe mwana wa munthu, chima ku mphepo uti kwa iyo: FUMU Chiuta wakuti, ‘Imwe mphepo, zaninge kufumira ku mphepo zinayi ndipo muthutire ku ŵakukomeka aŵa mwakuti ŵaŵeso ŵanthu ŵamoyo.’ ”

¹⁰Ndipo ine nkhachima nga ndi umo FUMU yikandilangulira. Muvuchi ukanjira mwa iwo, ŵakaŵaso ŵanthu ŵamoyo, ŵakimilira ndipo pakaŵa mzinda ukuru chomene.

¹¹FUMU yikati kwa ine, “Iwe mwana wa munthu, viwangwa ivi ndiwo ŵanthu wose ŵa fuko la Israele. Iwo ŵakuti, ‘Viwangwa vyithu vili komira, ndipo chigomezgo chithu nacho chamara. Sono tamalirathu.’

¹²Ntheura uchime, ndipo uviphalire uti kwa ivyo: FUMU Chiuta wakuti, ‘Imwe ŵanthu ŵane, ndamkujula madindi ghinu na kumuwuskanimo, ndipo ndamkumuwezgerani mu charu chinu cha Israele.

¹³Para ndamkujula madindi ghinu na kumuwuskanimo, ndipo imwe ŵanthu ŵane, mwamkumanya kuti ine ndine FUMU.

¹⁴Ndamkuŵikamo Mzimu wane mukati mwa imwe, ndipo mwamkuŵa ŵamoyo. Ndamkumukhazikani mu charu chinu na chinu. Penepapo ndipo mwamkumanya kuti ine FUMU ndine ndayowoya ndipo ndachichita nadi. Ntheura ndimo yikuyowoyera FUMU.’ ”

¹⁵Mazgu gha FUMU ghakiza kwa ine ghakati,

¹⁶“Iwe mwana wa munthu, tora ndodo ndipo ulembepo kuti, ‘Nja Yuda na fuko la Israele pamoza nayo.’ Utoreso ndodo yinyakhe ndipo ulembepo kuti, ‘Nja Yosefe, ndiko kuti Efurayimu, na fuko la Israele pamoza nayo.’

¹⁷Sono utore ndodo ziŵiri izi na kuzibamphika mwakuti ziŵe ndodo yimoza mu woko lako.”

¹⁸“Para ŵanthu ŵa ku kwinu ŵakukufumba kuti uŵaphalire icho ichi chikung'anamula,

¹⁹iwe uŵazgore kuti: FUMU Chiuta wakuti, ‘Ndili pafupi kutora ndodo ya Yosefe yeneiyo yili mu woko la Efurayimu na fuko la Israele pamoza nayo. Nditi ndiyibamphike ku ndodo ya Yuda mwakuti ziŵe ndodo yimoza mu woko lane.’

²⁰Para ndodo zeneizo walembapo zili mu woko lako uku iwo ŵakuwona,

²¹uyowoye kwa iwo kuti FUMU Chiuta wakuti, ‘Ndamkuŵatora ŵaIsraele kufuma ku malo ghawo gha umikori mukati mu ŵamitundu uko ŵali kurutako, ndipo ndamkuŵawunganya kufuma kosekose na kwiza nawo mu charu chawo na chawo.

²²Ndamkuŵazgora kuŵa fuko limoza mu charu, pa mapiri gha charu cha Israele. Ŵamkuŵa na karonga yumoza wakuŵawusa wose. Ŵamkuŵaso mafuko ghaŵiri chara ndipo ufumu wawo kuti wamkugaŵikanaso paŵiri chara.

²³Kuti ŵamkujikazuzgaso na ŵangoza ŵawo chara, nesi na vya ukazuzi vinyakhe, panji na kwananga kunyakhe kulikose. Ndamkuŵaponoska ku kwananga kwawo kose kwa kuwerera nyuma ndipo ndamkuŵatozga. Ntheura ŵamkuŵa ŵanthu ŵane ndipo ine ndamkuŵa Chiuta wawo.’ ”

²⁴“Karonga wakuŵa nga ndi muteŵeti wane Davide ndiyo wamkuŵa karonga wawo ndipo wose ŵamkuŵa na muliska yumoza. Ŵamkurondezga maweruzgo ghane na kusungilira vilayizgo vyane mwakugomezgeka.

²⁵Ŵamkukhara mu charu icho nkhapereka kwa muteŵeti wane Yakhobe charu icho ŵawiskewokuru ŵakakharanga. Iwo na ŵazukuru ŵawo ŵamkukharamo kwa muyirayira. Karonga wakuŵa nga ndi muteŵeti wane Davide ndiyo wamkuŵa karonga wawo kwa muyirayira.

²⁶Ntheura ndamkuchita phangano la muyirayira na iwo kuti ŵakharenge mu mutende. Ndamkuŵakhazika na kuŵandaniska chomene na kuŵika mukati mwawo malo ghane ghakupatulika kwa muyirayira.

²⁷Nyumba yane yakukharamo yamkuŵa mukati mwawo. Ine ndamkuŵa Chiuta wawo ndipo iwo ŵamkuŵa ŵanthu ŵane.

²⁸Penepapo ŵamitundu ŵamkumanya kuti ine FUMU, ndine nkhupatuliska ŵaIsraele para malo ghane ghakupatulika ghali mukati mwa iwo kwa muyirayira.”