Read new_tumbuka_bible Ezekiyele 38 Bible Online

Ezekiyele 38 - new_tumbuka_bible bible

Ezekiyele 38

¹Mazgu gha FUMU ghakiza kwa ine ghakuti,

²“Iwe mwana wa munthu, razgira chisko chako kwa Gogi, wa mu charu cha Magogi, mweneuyo ndi karonga mukuru wa mu msumba wa Mesheki na wa Tubala. Uchime pakumususka iyo.

³Umuphalire kuti FUMU Chiuta wakuti, ‘Nditi ndimikane nawe, iwe Gogi, karonga mukuru wa msumba wa Mesheki na Tubala.

⁴Ndamkukuyungwiska na kuŵika mbeja mu njegheyeghe zako. Ndizamkukufumiskira pakweru, iwe pamoza na chiwuru cha ŵasilikari ŵako wose, mahachi na ŵanthu ŵakukwera pa mahachi uku ŵavwara vya nkhondo na kukorera vyakuŵekera, nguru ndiposo na malupanga.

⁵ŴaPeresiya, ŵaEtiyopiya, na ŵaPuti ŵali pamoza nawo. Wose ŵali na nguru na vipewa vya visulo.

⁶Ŵasilikari wose ŵa Gomere pamoza na ŵasilikari wose ŵa Beti Togarima kufumira ku mpoto kutali, chiwuru chikuru cha ŵamitundu ŵali pamoza nawe.’ ”

⁷“Muŵe ŵakunozgeka nyengo zose, iwe pamoza na chiwuru cha ŵasilikari wose awo ŵakuzomerezgana nawe. Iwe ndiwe uŵenge wakuŵadangirira.

⁸Pamanyuma pa virimika vinandi, mwamkuchemekera pa malo ghamoza. Mu virimika vyakunthazi, mwamkurwa nkhondo na charu icho kale chikapankhuka na nkhondo, cheneicho ŵanthu ŵakhe ŵafumira ku mafuko ghanandi kwiza ku mapiri gha charu cha Israele icho nyengo yitali changuŵa cha mahami. Aŵa ndiwo ŵaIsraele awo ŵakiza kufuma ku ŵamitundu, ndipo sono wose ŵakukhara mu kufwasa.

⁹Ntheura iwe pamoza na chiwuru cha ŵasilikari ŵako pamoza na awo ŵakuzomerezgana nawe kufumira ku mafuko ghanandi gha ŵamitundu, mose mwamkwiza nga ndi chimphupuru. Mwamkuŵa nga ndi bingu ilo labenekerera charu.”

¹⁰“FUMU Chiuta wakuti, ‘Pa zuŵa leneilo, mwamkughanaghana, ndipo mwamkunozgekera kuchita chinthu chiheni.’

¹¹Imwe mwamkuyowoya kuti, ‘Tiyeni tirute kuya karwa nkhondo na charu icho chili na vikaya vyambula malinga. Tikaŵarotokere ŵanthu awo ŵakukhara mwakufwasa mwenemumo, kwambula kutimbanizgika, kuvikiririka na malinga panji mphingirizgo pa vipata.

¹²Tikaskoghe na kuphanga vinthu vyawo ndipo tikimikane na malo agho ghakapasuka, gheneagho sono mukukhara ŵanthu, ŵeneawo ŵakatoreka ku vyaru vya ŵamitundu. Iwo ŵali na ng'ombe na usambazi unyakhe ndipo ŵakukhara pakatikati pa charu cha pasi.’

¹³Ŵanthu ŵa ku Sheba na ku Dedani, ŵa malonda ŵa ku Tarishishi ndiposo na ŵa mu vikaya vyakhe vyose, ŵamkufumba kuti, ‘Kasi mwiza kuti mwizakaskoghe? Kasi mwawunganya ŵasilikari ŵinu kwiza kaphanga vya ŵene, kwiza katora golide na siliva, ng'ombe na vyuma vinyakhe kuti muŵe na vyakuskogha vinandinandi?’ ”

¹⁴“Ntheura iwe mwana wa munthu, uchime ndipo uti kwa Gogi, FUMU Chiuta wakuti, ‘Pa nyengo iyo ŵanthu ŵane ŵaIsraele ŵamkukhara mu kufwasa, iwe wamkumanya.

¹⁵Wamkwiza na ŵamitundu ŵanandi kufuma ku malo ghako gha kutali chomene ku mpoto, wose ŵakukwera pa mahachi, chiwuru chikuru cha ŵasilikari ŵankhongono.

¹⁶Mwamkwiza kwiza kalimbana na ŵanthu ŵane ŵaIsraele nga ndi bingu ilo likubenekerera charu. Mu mazuŵa gha umaliro, ndamkwiza nawe kuti wize kalimbane na charu chane, mwakuti ŵamitundu wose ŵandimanye ine para ŵamkundiwona nkhurongora kupatulika kwane pa iwe Gogi.’ ”

¹⁷“FUMU Chiuta wakuti, ‘Para nkhayowoyanga mu mazuŵa agho ghajumpha kwizira mu nchimi, ŵateŵeti ŵane ŵeneawo ŵakachimanga kwambula kureka mu mazuŵa gheneghara, nkhayowoyanga iwe Gogi kuti ine ndamkwiza na iwe kwiza kalimbana na ŵaIsraele.’

¹⁸Icho chamkuchitika pa zuŵa leneilo ndi ichi, ‘Para Gogi wamkurwa na charu cha Israele, ukari wane wizamkugolera.’ ” Ntheura ndimo yikuyowoyera FUMU.

¹⁹“Mu sanje yane na mu kutukutwa kwa ukari wane, nkhurapa nadi kuti pa zuŵa lenelira kwamkuŵa chindindindi chikuru mu charu cha Israele.

²⁰Somba za mu nyanja, viyuni vya mudera, vikoko vya ku thengere na vyose vyakukhwaŵa pasi, ŵanthu wose ŵa mu charu cha pasi, ŵamkumbwambwantha panthazi pa ine. Mapiri ghamkugadabukira pasi, malo ghakusendemuka ghamkudirimukira pasi, ndipo viliŵa vyose vyamkuwa pasi.”

²¹FUMU Chiuta wakuti, “Ndamkuchema vyakofya vya mtundu uliwose kwiza kalimbana na Gogi yura. Ŵanthu ŵamkukomananga ŵekha na malupanga.

²²Ndamkumulanga Gogi na nthenda yakofya ndiposo na kuthiska ndopa. Ndamkurokweska vura yakofya na ya matalala, moto na sulufure pa Gogi, pa chiwuru chakhe cha ŵasilikari, ndiposo na pa ŵamitundu ŵanandi awo ŵali nayo pamoza.

²³Ntheura ndamkurongora ukuru na kupatulika kwane, ndipo ndamkumanyikwa na ŵamitundu ŵanandi. Penepapo ŵamkumanya kuti ine ndine FUMU.”