Read new_tumbuka_bible Ezekiyele 39 Bible Online

Ezekiyele 39 - new_tumbuka_bible bible

Ezekiyele 39

¹“Iwe mwana wa munthu, uchime vya kumususka Gogi ndipo uti kwa iyo: FUMU Chiuta wakuti, ‘Ine nditi ndimikane nawe iwe Gogi, karonga mukuru wa msumba wa Mesheki na Tubala.

²Nditi ndikuzwetiske na kukurongozgera kunthazi. Nditi ndikutore kufuma ku vyaru vya kutali chomene ku mpoto na kwiza nawe kuti ulimbane na mapiri gha charu cha Israele.

³Penepapo ndamkuphyora uta uwo wamkuŵa ku woko lako la mazere na kukutayiska mivwi yako ku woko lako la maryero.

⁴Wamkufwira pa mapiri gha charu cha Israele, iwe pamoza na ŵasilikari ŵako wose na wose awo ŵakuzomerezgana nawe. Ndamkukupereka ku viyuni vya mitundumitundu ivyo vikurya nyama na ku vikoko vya ku thengere kuŵa chakurya chawo.

⁵Wamkufwira ku thengere pakuti ine ndine ndayowoya. Ntheura ndimo FUMU Chiuta wakuyowoyera.

⁶Ndamkutuma moto pa charu cha Magogi na pa awo ŵakukhara mu kufwasa mu mphepete mwa nyanja. Ntheura ŵamkumanya kuti ine ndine FUMU.’ ”

⁷“Ndamkuchita kuti zina lane lituŵa limanyikwe mukati mu ŵanthu ŵane ŵaIsraele. Ndamkuŵazomerezgaso chara kunanga zina lane lituŵa ndipo ŵamitundu ŵamkumanya kuti ine ndine FUMU, Mutuŵa Yura wa Israele.

⁸Wonani, zuŵa ilo nkhayowoyanga likwiza, zuŵa lakuchitikira vyeneivi lafika.” Ntheura ndimo FUMU Chiuta wakuyowoyera.

⁹“Awo ŵakukhara mu misumba ya charu cha Israele ŵamkufumira kuwaro na kuzgora mahomwa ghawo kuŵa nkhuni zakupembera moto. Mahomwa ghakhe ghamkuŵa gha nguru, vyakuŵekera, mauta, mivwi, nthonga, mikondo. Vyose ivi ŵamkuvizgora kuŵa nkhuni za kupembera moto pa virimika vinkhonde na viŵiri.

¹⁰Kuti ŵamkuruta ku thengere kuya kathenya nkhuni chara, nesi kuya katema khuni lirilose kufuma ku thengere chifukwa ŵamkutora mahomwa gheneagha kuŵa nkhuni zakupembera moto. Ntheura ŵamkuskogha awo ŵakaŵaskoghanga, na kuphanga awo ŵakaŵaphanganga vyawo.” Ntheura ndimo FUMU Chiuta wakuyowoyera.

¹¹“Pa zuŵa leneilo, ndamkupereka kwa Gogi malo ghakuti ŵamusungiremo mu dindi mu charu cha Israele, mu dambo la awo ŵakwendera cha ku mafumiro gha dazi kuya ku Nyanja Yakufwa. Dambo leneili lamkujarika chifukwa Gogi na ŵasilikari ŵakhe wose ŵamkusungika mwenemumo. Ntheura dambo ili lamkucheka kuti, ‘Dambo la ŵasilikari ŵa Gogi.’

¹²“ŴaIsraele ŵamkutora myezi yinkhonde na yiŵiri kuti ŵasunge ŵanthu ŵakufwa na kutozga charu.

¹³Ŵanthu wose ŵa mu charu ŵamkuŵa na mlimo wakuŵasunga, ndipo ŵamkupokerapo lumbiri luweme pa zuŵa leneilo ine ndamkurongora uchindami wane. Agha ndi mazgu gha FUMU Chiuta.

¹⁴Ŵanthu ŵamkusankhika kuti nyengo na nyengo ŵenderenge charu chose kupenja vitanda ivyo vikakharako kuti ŵavisunge. Mwa ntheura ŵati ŵatozge charu chose, ndipo ŵamkuchita mlimo uwu pa umaliro wa myezi yinkhonde na yiŵiri.

¹⁵Apo ŵakwendera charu chose, ndipo para yumoza wawona chiwangwa cha munthu, wamkuŵikapo chimanyikwiro mpaka awo ŵakusunga vitanda ŵasunge chitanda chira mu Dambo la ŵasilikari ŵa Gogi.

¹⁶(Kwenekura kwamkuŵa msumba wakuchemeka kuti, ‘Hamona’, ilo likaŵa zina la wupu wa ŵasilikari.) Ntheura charu chamkuŵa chakutozgeka.

¹⁷“Iwe mwana wa munthu, FUMU Chiuta wakuti: Chemerezga ku viyuni vyose vya mitundumitundu na ku vikoko vyose vya ku thengere uti ku vyeneivi, ‘Wunganani, mwize kufuma ku madera ghose ku chiphikiro chikuru icho ndamunozgerani pa mapiri gha Israele. Mwize kuti mwizakarye nyama na kumwa ndopa.

¹⁸Mwizamkurya nyama za vinkhara, mwamkumwa ndopa za ŵakaronga ŵa mu charu. Wose aŵa ŵamkukomeka nga ndi mberere zanarume, nga ndi ŵana-mberere, nga ndi mbuzi, nga ndi nkhambako, vyose vyakututuŵa vya charu cha Bashani.

¹⁹Mwamkurya vyakututuŵa musuke mukhute, ndipo mwamkumwa ndopa zisuke zimuloŵezgani pa chiphikiro icho ndamkumunozgerani.

²⁰Pa thebulu lane mwamkurya na kukhuta na nyama ya mahachi, ya ŵakukwera pa mahachi, ya vinkhara, na ya ŵasilikari ŵakupambanapambana.’ Ntheura ndimo yikuyowoyera FUMU Chiuta.”

²¹FUMU yikuti, “Nditi ndirongore uchindami wane pakati pa ŵamitundu wose. Wose ŵamkuwona weruzgi wane uwo ndamkupereka ndiposo na nkhongono zane izo ndamkurongora pa iwo.

²²Kufuma zuŵa leneilo mpaka kunthazi, ŵaIsraele ŵamkumanya kuti ine ndi FUMU Chiuta wawo.

²³Ndipo ŵamitundu yose ŵamkumanya kuti ŵaIsraele ŵakatorekera ku umikori chifukwa cha kwananga kwawo, pakuti ŵakaŵa ŵambula kugomezgeka kwa ine. Ine nkhabisa chisko chane kwa iwo na kuŵapereka ku ŵarwani ŵawo. Ntheura wose ŵakakomeka na nkhondo.

²⁴Nkhaŵachitira cheneichi kwakuyana ukazuzi wawo na uheni wawo. Ntheura nkhabisa chisko chane kwa iwo.”

²⁵“Ntheura FUMU Chiuta wakuti, ‘Sono nditi ndiwezgere mauweme gha Yakhobe na kuŵa na lusungu pa ŵaIsraele wose ndipo nditi ndiŵe na sanje chifukwa cha zina lane lituŵa.

²⁶Para ŵamkukhara mu kufwasa mu charu chawo kwambula kuŵa na yumoza wakuŵawofya, ŵamkuruwa soni zawo na kureka kugomezgeka kwawo kwa ine.

²⁷Para ndamkuŵawezgera ku charu chawo kufuma ku ŵamitundu ndiposo na kuŵawunganya kufuma ku vyaru vya ŵarwani ŵawo, nditi ndirongore kupatulika kwane kwizira mwa iwo panthazi pa ŵamitundu kuti ŵawone.

²⁸Ntheura ŵamkumanya kuti ine ndine FUMU Chiuta wawo, pakuti nangauli nkhaŵatuma kuruta ku umikori mukati mu ŵamitundu, ndamkuŵawunganya pamoza na kwiza nawo ku charu chawo na chawo ndipo kwamkuŵavye na yumoza uyo wamkukhalira kumanyuma.

²⁹Chisko chane kuti ndamkubisaso kwa iwo chara. Ine ndine nkhapungulira Mzimu wane pa ŵaIsraele.’ ” Ntheura ndimo FUMU Chiuta wakuyowoyera.