Read new_tumbuka_bible Ezekiyele 4 Bible Online

Ezekiyele 4 - new_tumbuka_bible bible

Ezekiyele 4

¹FUMU yikati kwa ine, “Iwe mwana wa munthu, tora njerwa ndipo uyiŵike panthazi pako. Pa yeneiyo ulembepo chithuzithuzi cha msumba wa Yerusalemu.

²Msumba uwu uwujarizge, uwuzengere linga kuwaro, uwuzengere chibumira. Uzenge misasa kuwuzingirizga msumba ndipo uŵike vyakugumulira malinga ghakhe zingirizge.

³Utore chisulo chipapati na kuchimika kuŵa nga ndi chiliŵa pakati pa iwe na msumba. Iwe urazgire chisko chako ku msumba uwu. Uti uŵenge wakujarizgika ndipo iwe ndiwe uti uwujarizgenge. Ichi chiti chiŵenge chimanyikwiro ku ŵa fuko la Israele.”

⁴“Ntheura iwe ugonere ku dera lako la mazere. Ine nditi ndiŵike kwananga kwa ŵanthu ŵa fuko la Israele pa iwe. Iwe ukwenera kuyegha kwananga kwa ŵanthu ŵa fuko la Israele kwakuyana na mazuŵa agho ugonerenge penepara.

⁵Ine ndalangula kuti iwe uthwike kwananga kwa ŵanthu ŵa fuko la Israele kwa mazuŵa 390, kuyana waka na virimika vya chilango chawo ivyo vili kupimika, zuŵa limoza, chirimika chimoza.

⁶Para wamarizga mazuŵa agha, ukagoneso kachiŵiri ndipo ukagonere ku woko la maryero. Sono wizakathwike kwananga kwa ŵanthu ŵa fuko la Yuda kwa mazuŵa 40, kuyana waka na virimika vya chilango chawo ivyo vili kupimika, zuŵa limoza, chirimika chimoza.

⁷Iwe razgira chisko chako ku msumba wa Yerusalemu weneuwo ngwa kujarizgika. Ukwinye munjilira ku woko lako, uliwuskire muchanya na kwamba kuchima kususkana nawo msumba.

⁸Ine nditi ndikukake na vingwe mwakuti ureke kuzgokera uku na uku mpaka umarizge mazuŵa gha chilango chako.

⁹“Utore tirigu, nyauti, nchunga, nkhunde, malezi na chitowe. Vyose uviŵike mu chisero chimoza. Uvisazge pamoza na kupanga chingwa. Mu mazuŵa 390 uti uryenge vyeneivi apo ukugona ku dera la ku mazere.

¹⁰Chakurya icho wamkuryanga, chikapimikenge. Pa zuŵa limoza ukaryenge chakurya cha uzitu wakukwana hafu wa kilogiramu.

¹¹Maji nagho wamkumwanga, ghakapimikenge. Wamkumwanga makapu ghaŵiri pa zuŵa limoza.

¹²Ukaryenge nga ndi chingwa chipapati cha nyauti cheneicho chaphikika pa moto wa mavi gha ŵanthu uku ŵanthu wose ŵakuwona.”

¹³FUMU yikati kwa ine, “Ntheura ndimo ŵaIsraele ŵamkuryera chakurya chakukazuzgika mukati mu ŵamitundu uko nditi ndiŵachimbizgireko.”

¹⁴Penepapo ine nkhazgora nkhati, “Chara, FUMU Chiuta! Ine ndilije kujikazuzgapo. Kufuma ku wanichi wane mpaka sono ndindaryepo nyama kufuma ku chakuŵeta chakufwa chekha, panji chakukomeka na chikoko, nesi nyama yakukazuzgika.”

¹⁵FUMU yikandizgora yikati, “Nchiweme. Sono nditi ndikuzomerezge kuti uryenge chakurya chakuphikika pa moto wa ulongwe wa ng'ombe mu malo mwa moto wa mavi gha ŵanthu.”

¹⁶Penepapo FUMU yikati kwa ine, “Iwe mwana wa munthu, ine nditi ndiŵike njara mu Yerusalemu. Ŵanthu ŵati ŵarye chakurya chakupimika uku ŵakukweŵeka. Ŵati ŵamwe maji ghakupimika uku ŵakuzukuma.

¹⁷Ichi nditi ndichichite mwakuti ŵasoŵe chakurya na maji. Ŵati ŵalaŵiskanenge waka ku maso na kuthika lusoko. Ŵati ŵaghandenge chifukwa cha kulangika kwawo.”