Read new_tumbuka_bible Ezekiyele 40 Bible Online

Ezekiyele 40 - new_tumbuka_bible bible

Ezekiyele 40

¹Pakwambilira kwa chirimika, pa zuŵa la khumi la mwezi, mu chirimika cha 25 cha umikori withu, icho chikaŵa chirimika cha 14, msumba ukati wathereskeka, pa zuŵa lenelira, nkhongono ya FUMU yikaŵa pa ine.

²Mu mboniwoni ya Chiuta, nkhatorekera ku charu cha Israele ndipo nkhakhazikika pachanya pa phiri litali chomene, penepapo pakaŵa nyumba izo zikawoneka nga ndi msumba, zeneizo zikathyana waka nane.

³Wakanditorera kwenekura, ndipo, wonani, nkhawona munthu uyo kawonekero kakhe kakaŵa nga ndi mkuŵa. Iyo wakimilira pa muryango wa chipata ndipo mu woko lakhe wakakorera chingwe cha bafuta na thabwa lakupimira.

⁴Munthu yura wakati kwa ine, Iwe mwana wa munthu, ulaŵiske na kutegherezga makora ndipo uŵikepo mtima pa vyose ivyo nditi ndikurongore, pakuti cheneicho ndicho chifukwa watorekera kuno. Pamanyuma uŵaphalire ŵaIsraele vyose ivyo ukuviwona.

⁵Nkhawona Nyumba ya Chiuta iyo yikazingirizgika na linga. Utali wa thabwa ilo munthu yura wakakorera mu woko lakhe ukaŵa mamita ghatatu ndipo wakapima linga lira. Wakasanga kuti liri mamita ghatatu mu kukwera ndipo mamita ghatatu mu ukomi wakhe.

⁶Penepapo munthu yura wakaruta ku chipata icho chikarazga ku mafumiro gha dazi ndipo wakakwera pa makwerero ghakhe. Wakati wafika pachanya, wakapima ukomi wa khonde la chipata chira ndipo wakasanga kuti uli mamita ghatatu.

⁷Pakaŵaso vipinda vya ŵalinda ndipo chipinda chilichose chikaŵa mamita ghatatu mu utali na mu ufupi. Mwanya pakati pa vipinda ivi vya mu mphepete ukaŵa mamita ghaŵiri na hafu. Ukomi wa khonde la pa muryango pafupi na baraza la chipata ukaŵa mamita ghatatu.

⁸Pamanyuma wakapima khonde la chipata lira ndipo likaŵa mamita ghanayi.

⁹Nchindamira zakhe zikaŵa mita yimoza mu ukomi wakhe. Ndipo khonde la chipata likaŵa mukati ku umaliro.

¹⁰Mukati mwa chipata cha ku mafumiro gha dazi, mukaŵa vipinda vitatu vya ŵalinda mu mphepete mose ndipo vikaŵa vyakuyana waka. Nchindamira zakhe zose nazo zikaŵa zakuyana waka.

¹¹Munthu yura wakapimaso usani wa pa unjiliro wa chipata ndipo ukaŵa mamita ghankhonde. Utali wa muryango ukaŵa ŵakujumphirako mamita ghankhonde na limoza pachanya masentimita 50.

¹²Ku maso kwa vipinda vya ŵalinda vira kukaŵa kachiliŵa ka mita yimoza mu utali na mu ufupi wakhe. Vipinda vira vikaŵa mamita ghatatu mukuyana waka.

¹³Pamanyuma wakapima utali kufuma ku chiliŵa cha kumanyuma kwa chipinda chimoza mpaka ku chiliŵa cha chipinda chinyakhe, kufuma ku chijaro chimoza mpaka ku chijaro chinyakhe. Utali wakhe ukaŵa mamita 12 pachanya masentimita 50.

¹⁴Wakapimaso khonde ndipo likaŵa mamita khumi. Kuzingirizga ka khonde ili lakuya ku chipata kukaŵa baraza.

¹⁵Kufuma ku maso kwa chipata chakunjirira kuya kafika ku umaliro wa khonde la mukati kakaŵa mamita 25.

¹⁶Mu viliŵa vya vipinda vira na mu viliŵa mukati mwa vipinda vira mukaŵa vidangazi vifinyi zingirizge. Khonde lose la mukati likaŵa na vidangazi zingirizge. Pachanya pa nchindamira zose pakaroŵeka na makuni gha mikama.

¹⁷Munthu yura wakanditorera kuwaro kwa baraza, ndipo kwenekura nkhawona vipinda na malo ghakwalikika na mawe kuzingirizga baraza lira. Vipinda vyose vikaŵa 30 ndipo vyose vikarazga ku malo ghakwalikika ghara.

¹⁸Malo ghakwalikika na mawe ghara ghakenda mu mphepete mwa vipata, kuyana waka na utali wa vipata. Agha ndigho malo ghakwalikika na mawe gha dera la sika.

¹⁹Sono wakapima mukati mwa baraza kufuma ku chipata cha dera la sika mpaka ku chipata cha kuwaro cha baraza la mukati. Utali wakhe ukaŵa mamita 50. Penepapo munthu yura wakanditorera ku chipata cha ku mpoto.

²⁰Kwenekura nkhawona chipata icho chikarazga ku mpoto, ku baraza la kuwaro, ndipo wakapima utali na ufupi wakhe.

²¹Vipinda vitatu vya ŵalinda ivyo vikaŵa mu mphepete ku madera ghose, nchindamira zakhe za ka khonde la pa chipata vikayana waka na vira vya chipata chakudanga. Mu utali chikaŵa mamita 25 ndipo mu ufupi chikaŵa mamita 12 pachanya masentimita 50.

²²Vindangazi vyakhe, khonde la pa chipata, na mikama vikayana waka utali na vya pa chipata cha ku dera la ku mafumiro gha dazi. Chipata ichi chikaŵa na makwerero ghankhonde na ghaŵiri, ndipo kachipinda ka pa chipata kakaŵa mukati.

²³Chipata chakuyana na cha ku mafumiro gha dazi, chikarazga ku chipinda cha mukati, kuthyana waka na chipinda cha ku mpoto. Munthu yura wakapima kufuma ku chipata mpaka ku chipata chinyakhe ndipo wakasanga mamita 50.

²⁴Munthu yura wakanditorera ku dera la ku mwera. Kwenekura nkhawona chipata icho chikarazga ku mwera. Wakapima vipinda vyakhe, nchindamira zakhe ndiposo na khonde la pa chipata, vikayana waka na vinyakhe.

²⁵Chipata chakhe na khonde lakhe vyose vikaŵa na vindangazi zingirizge nga ndi vinyakhe vira. Mu utali chikaŵa mamita 25 ndipo mu ufupi chikaŵa mamita 12 pachanya masentimita 50.

²⁶Chipata ichi chikaŵa na makwerero ghankhonde na ghaŵiri, ndipo khonde la pa chipata likaŵa mukati. Pa nchindamira zakhe pakazongeka makuni gha mikama, dera limoza linyakhe ndipo ku dera linyakhe nako limoza.

²⁷Baraza la mukati likaŵa na chipata icho chikarazga ku mwera, ndipo para wakapima kufuma pa chipata mpaka ku chipata chinyakhe, wakasanga mamita 50.

²⁸Munthu yura wakanditorera ku baraza la mukati kwizira mu chipata cha ku mwera. Wakachipima chipata chira ndipo wakasanga vikuyana waka na vinyakhe vira.

²⁹Vipinda vyakhe vya ŵalinda, nchindamira zakhe, ndiposo na vipinda vya pa chipata vikayana waka na vinyakhe. Mu vipinda ivi na mu khonde la pa chipata mukaŵa vidangazi zingirizge. Utali wakhe ukaŵa mamita 25 ndipo usani wakhe ukaŵa mamita 12 pachanya masentimita 50.

³⁰(Sono pakaŵa makhonde zingirizge, ndipo mu utali tukaŵa mamita 12 pachanya masentimita 50 ndipo mu usani tukaŵa mamita ghaŵiri pachanya masentimita 50.)

³¹Kachipinda ka pa chipata kakarazga ku baraza la kuwaro. Makuni gha mikama ghakazongeka mu nchindamira zakhe, ndipo kakaŵa na makwerero ghankhonde na ghatatu.

³²Penepapo munthu yura wakanditorera ku baraza la mukati ku dera la ku mafumiro gha dazi ndipo wakapima chipata chakhe na kusanga kuti chikuyana waka na vipata vinyakhe.

³³Vipinda vyakhe vya ŵalinda, vipinda vya chipata na nchindamira zakhe vikaŵa vyakuyana waka na vinyakhe. Chipinda chira na kachipinda ka pa chipata, vyose vikaŵa na vidangazi zingirizge, ndipo chikaŵa mamita 25 mu utali ndipo mu usani chikaŵa mamita 12 pachanya masentimita 50.

³⁴Chipinda cha pa chipata chikarazga ku baraza la kuwaro. Makuni gha mikama ghakazongeka pa nchindamira, dera linyakhe limoza ndipo ku dera linyakhe nako limoza. Chikaŵa na makwerero ghankhonde na ghatatu.

³⁵Munthu yura wakanditorera ku chipata cha ku mpoto ndi wakachipima na kusanga kuti chikuyana waka na vipata vinyakhe.

³⁶Vipinda vyakhe vya ŵalinda, vipinda vya chipata na nchindamira zakhe vikaŵa na vidangazi zingirizge, ndipo chikaŵa mamita 25 mu utali ndipo mu usani chikaŵa mamita 12 pachanya masentimita 50.

³⁷Chipinda cha pa chipata chikarazga ku baraza la kuwaro. Makuni gha mikama ghakazongeka pa nchindamira, dera linyakhe limoza ndipo ku dera linyakhe nako limoza. Chikaŵa na makwerero ghankhonde na ghatatu.

³⁸Pakaŵa chipinda icho chikaŵa na muryango wakhe pafupi na khonde la pa chipata lirilose la mukati uko ŵakasukiranga nyama ya sembe zakocha.

³⁹Mu khonde la pa chipata mukaŵa matebulu ghaŵiri, limoza ku dera linyakhe ndipo ku dera linyakhe nako limoza. Pa gheneagha ndipo sembe yakocha, sembe ya zakwananga na sembe yakuphepiskira majuvyo vikakomekerekanga.

⁴⁰Kuwaro kwa khonde la pa chipata chakuya ku chipata cha ku mpoto, pakaŵa matebulu ghaŵiri ndipo ghanyakhe ghaŵiri ku dera linyakhe la chipinda cha chipata.

⁴¹Ntheura pakaŵa matebulu ghanayi ku dera limoza la chipata ndipo ghanyakhe ghanayi ku dera linyakhe. Matebulu ghara ghose pamoza ghaŵa ghankhonde na ghatatu pa gheneagho ndipo ŵakakomeranga sembe zawo.

⁴²Mathebulu ghanayi ghakuperekerapo sembe ghakocha mburuma ghakaŵa gha mawe ghakuŵaja. Mu kukura kwakhe ghakaŵa masentimita 50, ndipo mu usani likaŵa masentimita 75 ndipo mu utali likaŵa masentimita 75. Pa matebulu gheneagha ŵakaŵikangapo viteŵetero vya mlimo wa sembe zakocha mburuma na sembe zakukoma.

⁴³Ntheura nyama ya sembe ŵakayiŵikanga pa matebulu gheneagha. Ngoŵe zitalizitali ŵakazipayikanga kuzingirizga mose cha mukati.

⁴⁴Sono munthu yura wakanditorera ku baraza la mukati uko nkhawonako vipinda viŵiri, chipinda chimoza chikaŵa ku mphepete ku chipata cha ku mpoto chikarazga ku mwera, ndipo chinyakhe chikaŵa ku mphepete ku chipata cha ku mwera chikarazga ku mpoto.

⁴⁵Munthu yura wakati kwa ine, Chipinda chakurazga ku mwera ncha ŵasofi awo mbarara ŵa Nyumba ya Chiuta.

⁴⁶Chipinda chakurazga ku mpoto ncha ŵasofi awo mbarara ŵa jochero, ŵeneawo mba ŵazukuru ŵa Zadoki. Aŵa mba fuko la Levi ŵeneawo pera ŵakwenera kwiza pafupi na FUMU kuyiteŵetera.

⁴⁷Munthu yura wakapima baraza lira ndipo wakasanga kuti likuyana waka mu utali na mu usani, mamita 50 kosekose. Ndipo jochero likaŵa ku maso kwa Nyumba ya Chiuta.

⁴⁸Munthu yura wakanditorera mu kachipinda ka pa chipata chakuya ku Nyumba ya Chiuta, ndipo wakapima nchindamira za chipinda chira ndipo zikaŵa mamita ghaŵiri pachanya masentimita 50 ku dera ili na ili. Usani wa chipata ukaŵa mamita ghankhonde na ghaŵiri ndipo viliŵa vya mu mphepete mwa chipata vikaŵa mita yimoza pachanya masentimita 50 uku na uku.

⁴⁹Khonde la pa chipata likaŵa mamita khumi mu utali ndipo mamita ghankhonde na limoza mu usani. Likaŵa na makwerero khumi ndipo likaŵa na mizati pafupi na nchindamira ku dera ili na ili.