Read new_tumbuka_bible Ezekiyele 41 Bible Online

Ezekiyele 41 - new_tumbuka_bible bible

Ezekiyele 41

¹Munthu yura wakanditorera mukati mu Malo Ghakupatulika gha Nyumba ya Chiuta na kupima nchindamira zakhe. Usani wakhe ukaŵa mamita ghatatu uku na uku.

²Muryango ukaŵa mamita ghankhonde mu usani wakhe ndipo viliŵa vya mu mphepete mwa muryango vikaŵa mamita ghaŵiri pachanya masentimita 50 uku na uku. Wakapima utali wa Malo Ghakupatulika ghara ndipo ukaŵa mamita 20 ndipo usani ukaŵa mamita khumi.

³Wakanjira ku Malo Ghakupatulika Nkhanira ndipo wakapima nchindamira za muryango. Nchindamira zikaŵa mita yimoza ndipo muryango ukaŵa mamita ghatatu. Viliŵa vya mu mphepete mwa muryango vikaŵa mamita ghatatu pachanya masentimita 50 uku na uku.

⁴Wakapima chipinda cha mukati ndipo wakasanga kuti chili mamita khumi mu utali na mu usani. Sono wakati kwa ine, “Gheneagha ndigho Malo Ghakupatulika Nkhanira.”

⁵Munthu yura wakapima chiliŵa cha Nyumba ya Chiuta. Chikaŵa mamita ghatatu mu ukomi wakhe. Usani wa vipinda vya mu mphepete mwa Nyumba ya Chiuta ukaŵa mamita ghaŵiri.

⁶Vipinda vya mu mphepete ivi vikaŵa vyakubamphikana patatu, chimoza pachanya pa chinyakhe. Mzere umoza wa vipinda ukaŵa na tuvipinda 30 ndipo yinyakhe nayo ntheura pera. Mu chiliŵa cha Nyumba ya Chiuta mukaŵa nchindamira zakukhozga vipinda vira kuti zireke kweghamira ku chiliŵa cha Nyumba ya Chiuta.

⁷Ndipo tuvipinda twa mu mphepete tura tukasanukanga pa nyengo yose iyo tukakwereranga kufuma pa juru limoza kufika pa juru linyakhe, kwakuyana na malo agho ŵasazgirako pachanya kufuma pa juru ili na ili kuzingirizga Nyumba ya Chiuta. Mu mphepete mwa Nyumba ya Chiuta mukaŵa makwerero agho ghakakwerera pachanya, nthura ŵanthu ŵakamanya kukwera kufuma pa juru la pasi kuya kafika pa juru la pachanya kwendera pa juru la pakati.

⁸Ndiposo nkhawona kuti Nyumba ya Chiuta yira yikaŵa pa chibumira zingirizge. Malufura gha vipinda vya mu mphepete ghakaŵa mamita ghatatu mu utali.

⁹Ukomi wa chiliŵa cha kuwaro cha vipinda vira ukaŵa mamita ghaŵiri pachanya masentimita 50. Malo gha chibumira agho ghakakharako ghakaŵa mamita ghaŵiri pachanya masentimita 50. Pakati pa chibumira cha Nyumba ya Chiuta,

¹⁰na vipinda vya Nyumba ya Chiuta ivyo vikaŵa mamita khumi mu usani wakhe kuzingirizga Nyumba ya Chiuta.

¹¹Miryango ya vipata vya mu mphepete yikarazga ku chibumira chira. Muryango umoza ku dera la ku mpoto, unyakhe ku mwera. Baraza lira likaŵa mamita ghaŵiri pachanya masentimita 50.

¹²Ku dera la ku manjiliro gha dazi, kuthyana na baraza la Nyumba ya Chiuta kukaŵa nyumba iyo yikaŵa mamita 35 mu usani wakhe. Chiliŵa chakhe chikaŵa mamita ghaŵiri pachanya 50 mu ukomi wakhe zingirizge. Utali wakhe yikaŵa mamita 45.

¹³Munthu yura wakapima Nyumba ya Chiuta, ndipo mu utali yikaŵa mamita 50. Baraza, nyumba iyoyene, na viliŵa vikaŵa mamita 50 vyose pamoza.

¹⁴Usani wa ku maso kwa nyumba yira kurazga ku mafumiro gha dazi pamoza na baraza vikaŵa mamita 50.

¹⁵Munthu yura wakapima utali wa nyumba iyo yikarazga ku baraza ku manjiliro gha dazi ndiposo na viliŵa vya ku dera ili na ili, ndipo yikaŵa mamita 50. Malo ghakupatulika, Malo ghakupatulika Nkhanira, na khonde la pa chipata kurazga ku baraza,

¹⁶vikakhomeka na mathabwa, ndipo vyose vitatu vikaŵa na vidangazi vya mathabwa ghakupiringizgana zingirizge vyeneivyo vikajarikanga. Pachanya, kuthyana na khonde, Nyumba ya Chiuta yikabatikika na mathabwa kwamba pasi mpaka ku vidangazi.

¹⁷Malo gha pachanya pa muryango kuwaro, mpaka ku Malo Ghakupatulika mukati ndipo na viliŵa kuzingirizga malo gha mukati na kuwaro kwa Nyumba ya Chiuta, vyose vikazongeka.

¹⁸Vikazongeka na vikozgo vya ŵakerubi na vya makuni gha mikama. Khuni limoza la mukama pakati pa ŵakerubi ŵaŵiri. Mukerubi yumoza wakaŵa na visko viŵiri.

¹⁹Chisko chimoza chikaŵa cha munthu icho chikarazga ku khuni la mukama, ndipo chisko chinyakhe chikaŵa cha nkharamu icho chikarazga ku khuni linyakhe la mukama ku dera linyakhe. Ntheura ndimo vikozgo ivi vikazongekera kuzingirizga Nyumba ya Chiuta.

²⁰Vithuzithuzi vya ŵakerubi na vya makuni gha mikama vikazongeka pa viliŵa kwamba pasi mpaka pachanya pa muryango.

²¹Mafuremu gha pa muryango wakuya ku Malo Ghakupatulika Nkhanira ghakaŵa ghakuyana waka mu utali na mu usani. Panthazi pa Malo Ghakupatulika pakaŵa chinthu icho chikawoneka nga ndi

²²jochero la mathabwa. Mu kukwera likaŵa mita yimoza pachanya masentimita 50, ndipo mita yimoza mu utali, na mu usani wakhe. Mungodya zakhe, pakwimapo pakhe ndiposo na viliŵa vyakhe vikaŵa vya mathabwa. Munthu yura wakati kwa ine, “Thebulu leneili ndilo likwima panthazi pa FUMU.”

²³Muryango wa Malo Ghakupatulika ghara ukaŵa na vijaro viŵiri, ndipo muryango wa Malo Ghakupatulika Nkhanira nawo ukaŵa na vijaro viŵiri.

²⁴Mu chijaro chimoza mukaŵa viŵaruka viŵiri vyakupatukana. Viŵaruka viŵiri pa chijaro chinyakhe chilichose.

²⁵Ndipo pa vijaro vyeneivi pakazongeka ŵakerubi na makuni gha mikama nga ndi mu viliŵa. Pa khonde la pa chipata kuwaro likabatikika na mathabwa.

²⁶Khonde la pa chipata kakaŵa na vidangazi vya mathabwa ghakupiringizgana vyeneivyo vikajarikanga ndipo ghakazongeka makuni gha mikama uku na uku. Viliŵa vya mu mphepete navyo vikazongeka na mikama.