Read new_tumbuka_bible Ezekiyele 42 Bible Online

Ezekiyele 42 - new_tumbuka_bible bible

Ezekiyele 42

¹Munthu yura wakanditorera ku baraza la kuwaro ilo likarazga ku mpoto, ndipo wakiza nane ku vipinda kuthyana na baraza la Nyumba ya Chiuta, ndiposo na nyumba iyo yikaŵa ku dera la ku mpoto.

²Utali wa nyumba iyo yikaŵa ku dera la ku mpoto ukaŵa mamita 50, ndipo usani wakhe ukaŵa mamita 25.

³Kuthyana na malo gha khonde agho ghakapimika kuŵa mamita 10, gheneagho ghakanjirirana na chipinda cha mukati, ndiposo ghakuthyana na kanthowa kakwalikika na mawe ka mu chipinda cha kuwaro, pakaŵa makhonde ghakuporotamo gheneagho ghakadikana ghatatu ndipo ghakathyana waka.

⁴Panthazi pa vipinda pakaŵa kanthowa keneako kakarazga mu baraza la mukati. Mu usani kakaŵa mamita ghankhonde ndipo mu utali kakaŵa mamita 50. Miryango ya vipinda ivi yikarazga ku mpoto.

⁵Sono vipinda twapachanya tukaŵa tufinyeko kuruska vipinda vya pakati na vya pasi, chifukwa baraza likatorako malo ghakuru ya nyumba yira.

⁶Pakuti vipinda vyose vitatu vira vikaŵa vyakubamphikana pa mizere yitatu, ndipo vikaŵavye mizati nga ndi iyo yikaŵa mu chipinda cha ku dera la kuwaro. Ntheura vipinda vya pachanya vikaŵako vifinyi kuruska vya pasi na vya pakati.

⁷Pakaŵa chiliŵa kuwaro kuthyana waka na tuvipinda, kurazga ku dera la chipinda cha kuwaro icho chikathyana na tuvipinda tura, utali wakhe ukaŵa mamita 25.

⁸Pakuti vipinda ivyo vikaŵa mu mphepete mwa baraza la kuwaro vikaŵa mamita 25 mu utali wakhe. Kweni ivyo vikaŵa mu mphepete mwa Nyumba ya Chiuta vikaŵa mamita 50 mu utali wakhe.

⁹Ndipo musi mwa vipinda ivi mukaŵa muryango ku dera la ku mafumiro la gha dazi, pakunjira kufuma mu chipinda cha ku dera kuwaro uko chikambiranga chiliŵa cha kuwaro.

¹⁰Ku dera la ku mwera, kuthyana na baraza, ndiposo na nyumba, kukaŵa tuvipinda uto tukaŵa

¹¹na kanthowa panthazi pakhe. Tuvipinda utu tukayana waka na tuvipinda twa ku dera la ku mpoto mu usani na mu utali. Miryango na vijaro vyakhe vikaŵa vyakuyana waka.

¹²Ndipo musi mwa vipinda vya ku mwera mukaŵa muryango ku dera la ku mafumiro gha dazi uko nthowa yikambiranga. Kuthyana na muryango uwu pakaŵa chiliŵa chakugaŵa pakati.

¹³Penepapo munthu yura wakati kwa ine, “Vipinda vya ku mpoto na vya ku mwera, ivyo vyathyana waka na baraza, nvyakupatulika, mwenemumo ŵasofi awo ŵakuteŵeta panthazi pa FUMU ŵakuryeramo vyakupereka vyakupatulika nkhanika. Mwenemura ndimo ŵamkuŵikamo sembe zakupatulika nkhanira, izo ndi sembe ya ufu, sembe ya kwananga, na sembe yakuphepiskira majuvyo, pakuti malo agha ngakupatulika.

¹⁴Para ŵasofi ŵakunjira mu malo ghakupatulika ivi, kuti ŵakufumamo chara kuruta ku baraza la kuwaro kwambula kuti kuvireka vyakuvwara vyawo vya usofi ivyo ŵateŵeteranga chifukwa vyeneivi nvyakupatulika. Ŵakwenera kuvwara vyakuvwara vinyakhe pambere ŵandize ku malo gha ŵanthu waka.”

¹⁵“Para munthu yura wakati wamara kupima mukati mwa Nyumba ya Chiuta, wakiza nane kuwaro kwendera pa chipata icho chikarazga ku mafumiro gha dazi. Pamanyuma wakapima malo ghose kuzingirizga Nyumba ya Chiuta.

¹⁶Wakatora chakupimira na kupima dera la ku mafumiro gha dazi ndipo wakasanga mamita 250.

¹⁷Wakazgoka na kupima na chakupimira dera la ku mpoto ndipo wakasanga mamita 250.

¹⁸Wakazgoka na kupima na chakupimira dera la ku mwera ndipo wakasanga mamita 250.

¹⁹Wakazgoka na kupima na chakupimira dera la ku manjiliro gha dazi ndipo wakasanga mamita 250.

²⁰Wakapima madera ghose ghanayi. Yikaŵa na chiliŵa zingirizge. Mu utali na mu usani likaŵa mamita 250. Chiliŵa ichi chikapatula pakati pa ivyo nvyakupatulika na vyambula kupatulika.”