Read new_tumbuka_bible Ezekiyele 43 Bible Online

Ezekiyele 43 - new_tumbuka_bible bible

Ezekiyele 43

¹Pamanyuma munthu yura wakaruta nane ku chipata icho chikarazga ku mafumiro gha dazi.

²Kwenekura nkhawona uchindami wa Chiuta wa Israele ukwiza kufuma ku mafumiro gha dazi. Kamphomezi ka kwiza kwakhe kakaŵa nga ndi kamphomezi ka maji ghanandi ndipo charu cha pasi chikaŵala na uchindami wakhe.

³Mboniwoni iyo nkhayiwona yikaŵa nga ndi iyo nkhayiwona para Chiuta wakiza kwiza kaparanya msumba. Yikaŵaso nga ndi iyo nkhayiwona pafupi na mronga wa Kebara. Penepapo nkhawa pasi kavunama.

⁴Apo uchindami wa FUMU ukanjiranga mu Nyumba ya Chiuta kwizira mu chipata icho chikarazga ku dera la ku mafumiro gha dazi,

⁵Mzimu wa Chiuta wakandinyamulira muchanya ndipo wakiza nane mu baraza la mukati. Penepapo uchindami wa FUMU ukazura mu Nyumba ya Chiuta.

⁶Munthu yura wachali kwimilira pafupi na ine, nkhapulika yunji wakuyowoya kwa ine kufuma ku Nyumba ya Chiuta.

⁷Iyo wakati kwa ine, “Iwe mwana wa munthu, agha ndigho malo gha chizumbe chane, ndiposo chitambaliro cha malundi ghane, malo agho nditi ndikharengemo kwa muyirayira mukati mu ŵaIsraele. ŴaIsraele pamoza na ŵakaronga ŵawo kuti ŵamkukazuzgaso zina lane lituŵa chara pakusopa ŵachiuta ŵanyakhe na pakusunga vitanda vya ŵakaronga ŵawo.

⁸Ŵakaronga ŵakazenganga makhonde ghawo pafupi na makhonde ghane. Ŵakazenganga nchindamira za miryango yawo pafupi na nchindamira za miryango yane ndipo pali waka chiliŵa pakati pa iwo na ine. Iwo ŵakazuzga zina lane lituŵa na maukazuzi agho ŵakachita. Ntheura nkhaŵamara petu mu ukari wane.

⁹Sono ŵawuskemo uzaghali wawo wakusopa vikozgo ndiposo na vitanda vya ŵakaronga ŵawo kuŵa kutali na ine, ndipo ine nditi ndikharenge mukati mwawo kwa muyirayira.”

¹⁰FUMU yikati kwa ine, “Iwe mwana wa munthu, uŵaphalire ŵaIsraele umo Nyumba ya Chiuta yiliri, mwakuti ŵakhozgeke soni na maukazuzi ghawo.

¹¹Usange ŵali na soni na vyose ivyo ŵali kuchita, uŵaphalire umo Nyumba ya Chiuta yili kuzengekera na mawonekero ghakhe, mafumiro na manjiliro ghakhe, kaŵiro kakhe kose. Uŵaphalire vilayizgo na marango ghakhe ghose ndipo ughalembe kuti ghaŵe panthazi pawo mwakuti ŵaghasungenge na kughachita nyengo zose.

¹²Ili ndilo dango la Nyumba ya Chiuta iyo yiti yizengekenge. Charu chose kuzingirizga pachanya pa phiri chamkuŵa chakupatulika nkhanira. Wonani, ili ndilo dango la Nyumba ya Chiuta.”

¹³“Kapimiro ka jochero la sembe kwakuyana na umo ŵakapimira Nyumba ya Chiuta ndi aka: Pasi pa jochero lamkuŵa masentimita 50 mukunjira kwakhe ndipo masentimita 50 mu usani wakhe. Mu mphepete mwakhe zingirizge mwamkuŵa mukombero wakukhozga uwo ukuyana na usani wa masentimita 25 mukukwera kwakhe.

¹⁴Ndipo mu kukwera kwa jochero lira kukaŵa ntheura: Kufuma pasi kufikira pa mukombero lwa musi kwamkuŵa mita yimoza, ndipo usani wakhe wamkuŵa masentimita 50. Kwamba mukombero luchoko mpaka lukombero lukuru, mamita ghaŵiri, ndipo mu usani wakhe masentimita 50.

¹⁵Pa chipembo cha jochero pazakaŵe mamita ghaŵiri. Pachanya pakhe pazakafume masengwe ghanayi, utali wakhe masentimita 50.

¹⁶Chipembo cha jochero chikaŵe chakuyana waka mu utali na mu usani, mamita ghankhonde na limoza.

¹⁷Lukombero nalo lukaŵe lwakuyana waka mu utali na mu usani, mamita ghankhonde pachanya ghaŵiri. Mu mphepete mwakhe lukaŵe masentimita 25. Pasi pakhe paŵe masentimita 50 ndipo makwerero gha jochero ghaŵe ku dera ka mafumiro gha dazi.”

¹⁸Penepapo wakati kwa ine, “Iwe mwana wa munthu, FUMU Chiuta wakuti, ‘Marango gha jochero, pa zuŵa ilo lamkumalira kuzengeka kuti muperekerekepo sembe zakocha na kumijirapo ndopa ndi agha:

¹⁹Mwakupereka nkhambako kuti yiŵe sembe yakuphepiskira kwananga kwa ŵasofi ŵa mbumba ya Zadoki ŵa fuko la Levi, awo ŵakukhara pafupi na ine kunditeŵetera. Ntheura ndimo yikuyowoyera FUMU.

²⁰Mukatorengepo ndopa zakhe zichoko waka na kuziphaka ku masengwe gha jochero ghara ghanayi, na pa vingodya vinayi vya lukombero, na mu mphepete zingirizge. Ntheura ndimo muti mulitoweskere jochero leneili na kuliphepiskira.

²¹Pamanyuma mutore nkhambako ya sembe yakuphepiskira kwananga iyo, ndipo mukawochere pa malo ghakwimika kuwaro kwa Nyumba ya Chiuta.

²²Pa zuŵa la chiŵiri, mukapereke pepe wambula kalema kuŵa sembe yakuphepiskira kwananga. Sono jochero lamkuŵa lakutozgeka nga ndi likatozgekera na sembe ya nkhambako.

²³Para mwamara kuphotora jochero, mukapereke nkhambako yambula kalema na mberere yanarume yambula kalema.

²⁴Mwize kapereke panthazi pa FUMU ndipo ŵasofi ŵathirepo muchere na kuvipereka kuŵa sembe yakocha kwa FUMU.

²⁵Zuŵa lirilose, mu mazuŵa ghankhonde na ghaŵiri mwize kaperekenge mbuzi, nkhambako na mberere yanarume yambula kalema kuŵa sembe yakuphepiskira kwananga.

²⁶Pa mazuŵa ghankhonde na ghaŵiri mukaliphepiskire jochero na kuliphotora. Ntheura lamkuŵa lakutozgeka.

²⁷Para mazuŵa agha ghamara, kufuma pa zuŵa la chinkhonde na chitatu, ŵasofi ŵamkwamba kupereka sembe zinu zakocha na sembe za wenenawene pa jochero leneili. Ine ndamkumupokerani.’ ” Ntheura ndimo FUMU Chiuta wakuyowoyera.