Read new_tumbuka_bible Ezekiyele 44 Bible Online

Ezekiyele 44 - new_tumbuka_bible bible

Ezekiyele 44

¹Munthu yura wakanditoreraso kuwaro kwa Nyumba ya Chiuta na kwiza nane ku chipata icho chikarazga ku dera la ku mafumiro gha dazi. Chipata chira chikaŵa chakujarika.

²FUMU yikati kwa ine, “Chipata ichi chiŵenge chakujarika ndipo chingajurikanga chara. Paŵavye na yumoza wakunjira kwizira mu chipata ichi, pakuti FUMU, Chiuta wa Israele wanjira kwizira mu chipata cheneichi. Ntheura chiŵenge chakujarika.

³Karonga pera ndiyo wangakharamo kuti warye chakurya panthazi pa FUMU. Iyo wanjilirenge kwizira mu khonde la pa chipata, ndipo wafumireso mu khonde leneili.”

⁴Munthu yura wakanditora na kwiza nane pafupi na nthowa ya chipata cha ku mpoto kunthazi kwa Nyumba ya FUMU. Kwenekura nkhawona uchindami wa Chiuta ukuzura Nyumba ya FUMU ndipo ine nkhawa pasi kavunama.

⁵FUMU yikati kwa ine, “Iwe mwana wa munthu, pulikiska makora, ulaŵiske makora na maso ghako, ndipo utegherezge chomene ku mazgu ghose agho nditi ndiyowoye kwa iwe. Utegherezge chomene ku vilayizgo na marango ghose gha Nyumba ya Chiuta. Uŵaŵanike makora awo ŵakuzomerezgeka kunjira mu Nyumba ya Chiuta na awo mbakuzomerezgeka chara kunjiramo.

⁶Uŵaphalire ŵa fuko la chigaruka la Israele uti kwa iwo: FUMU Chiuta wakuti, ‘Imwe ŵaIsraele, rekani ukazuzi winu wose!

⁷Imwe mukuzomerezga ŵalendo awo mbambula kukotoreka mu mtima na mu thupi kunjira ku malo ghane ghakupatulika. Ntheura mukukazuzga nyumba yane para mukupereka mafuta na ndopa kuŵa chakurya chane. Imwe mwaswa phangano lane pakuchita maukazuzi ghinu ghose.

⁸Imwe kuti mwasunga vinthu vyane vyakupatulika chara. Kweni mwimika ŵalendo kuti ndiwo ŵasungenge mu malo ghane ghakupatulika.’ ”

⁹“Ntheura FUMU Chiuta wakuti, Paŵavye mulendo na yumoza uyo ngwambula kukotoreka mu mtima na mu thupi mweneuyo wakukhara mukati mu ŵaIsraele uyo wanganjira mu malo ghane ghakupatulika.”

¹⁰Sono ŵaLevi awo ŵakapatukako kwa ine pakupurukira kutali pakurondezga ŵangoza ŵawo, ŵakwenera kulangika.

¹¹Iwo ŵangaŵa waka ŵateŵeti ŵane mu nyumba yane, kuŵa ŵarara ŵa vipata vya Nyumba ya Chiuta na kuteŵeta milimo yinyakhe mwenemumo. Iwo ndiwo ŵakomerenge ŵanthu sembe zawo zakocha mburuma na sembe zakukoma, ndipo ŵimilirenge ŵanthu na kuŵateŵetera.

¹²Chifukwa chakuti ŵasofi ŵeneaŵa ndiwo ŵakateŵeteranga ŵaIsraele ŵeneaŵa pakusopa vikozgo vyawo ndipo ndiwo ŵakachitiska kuti ŵanthu ŵane ŵanange. Ntheura ndaŵarapa pakuŵawuskira woko kuti ŵati ŵalangike chifukwa cha kwananga kwawo. Ntheura ndimo FUMU Chiuta wakuyowoyera.

¹³Iwo ŵakwenera kusenderera pafupi na ine chara kuteŵetera nga mbasofi. Ŵakwenera chara kusenderera pafupi na vinthu vyane vyakupatulika panji ivyo ndi vyakupatulika nkhanira. Ŵamkukhozgeka soni chifukwa cha milimo gha ukazuzi iyo ŵakachitanga.

¹⁴Ndipouli ndiŵimike kuŵa ŵarara ŵa milimo yinyakhe yose ya mu Nyumba ya Chiuta iyo yiti yiteŵetekenge.

¹⁵Kweni ŵasofi ŵa fuko la Levi, mu mbumba ya Zadoki awo ŵakaŵa ŵakugomezgeka kuchita milimo yawo mu Nyumba ya Chiuta para ŵaIsraele ŵakapurukanga, ndiwo ŵati ŵasendererenge na kunditeŵetera ine. Iwo ndiwo ŵamkwima panthazi pa ine kupereka mafuta na ndopa kuŵa chakurya chane. Ntheura ndimo FUMU Chiuta wakuyowoyera.

¹⁶Iwo ndiwo ŵamkunjira mu malo ghane ghakupatulika, ndipo ŵasenderere ku thebulu lane kuti ŵanditeŵetere na kusunga ivyo ndaŵaphalira.

¹⁷Para ŵakunjira mu vipata vya baraza la mukati, ŵakwenera kuvwara malaya gha bafuta. Ŵareke kuvwara malaya gha weya ŵakuteŵetera ine pa vipata vya mu baraza la mukati ndiposo na mukati mwakhe.

¹⁸Iwo ŵavwarenge vilemba vya bafuta ku mitu yawo, na ŵakabunthu ŵa bafuta mu viwuno vyawo. Ŵareke kukaka malaya ghawo na lamba uyo wangachitiska kuti ŵafome.

¹⁹Para ŵakufumira ku baraza la kuwaro uko kuli ŵanthu, malaya agho ŵateŵeteranga ŵakwenera kuvura na kughaŵika mu vipinda vyakupatulika vira. Ŵavware malaya ghanyakhe mwakuti ŵareke kupereka kupatulika kwawo ku ŵanthu kwizira mu vyakuvwara vyawo.

²⁰Ŵareke kumetako ku mitu yawo nanga nkhurekerera sisi lawo kuŵa litali. Kweni ŵadumulengeko waka sisi lawo.

²¹Musofi wareke kumwa vyakuloŵezga para wakunjira mu baraza la mukati.

²²Wareke kutora chokoro kuŵa muwoli wakhe nanga nkhutora mwanakazi uyo ngwa kusuzulika. Kweni watore mwali wakulangwa uyo ngwa fuko la Israele. Ndipouli wangatora chokoro icho mufumu wakhe wakaŵa musofi.

²³Ŵasofi ŵati ŵasambizgenge ŵanthu pakati pa chakupatulika na chambula kupatulika, na kuŵarongora kuti ŵamanye icho ncha ukazuzi na icho nchakuphotoka.

²⁴Para kwawuka mphindano, ŵasofi ndiwo ŵaŵenge ŵeruzgi ndipo ŵeruzgenge kwakuyana na maweruzgo ghane. Mu nyengo za viphikiro vyane vyose vyakwimikika, ŵasofi ndiwo ŵasungenge marango na vilayizgo vyane, ndipo ŵasunge maSabata ghane kuŵa ghakupatulika.

²⁵Ŵareke kujikazuzga pakukora munthu yose wakufwa, pekhapekha ŵafwe ŵawiske panji ŵanyina, mwana wakhe mwanarume panji mwanakazi, mukuru wakhe panji munung'una wakhe, panji mudumbu wakhe uyo wandatengwe.

²⁶Para ŵangujikazuzga, ŵapende mazuŵa ghankhonde na ghaŵiri kuti ŵaŵe ŵakutozgeka nadi.

²⁷Ndipo pa zuŵa ilo ŵamkunjira mu baraza la mukati kuti ŵateŵete mu malo ghakupatulika, ŵakwenera kupereka sembe yakuphepiskira kwananga kwawo. Ntheura ndimo FUMU Chiuta wakuyowoyera.

²⁸“Ŵasofi ŵati ŵaŵenge na chiharo na chilichose chara. Ine ndine nditi ndiŵenge chiharo chawo. Mureke kuŵapa chilichose mu charu cha Israele. Ine ndine nditi ndiŵenge chiharo chawo.

²⁹Sembe ya ufu, sembe kwananga na sembe yakuphepiskira majuvyo ziryekenge na iwo ŵasofi. Chilichose icho nchakupatulika mu Israele ncha ŵasofi.

³⁰Vipambi vyakudanga vyose vya mtundu uliwose, ivyo nviweme chomene, na vyawanangwa vya mtundu uliwose, vyakufuma mu vyakupereka vyinu vyose, ndi vya ŵasofi. Muŵapengeso ufu wakwamba uwo mwapura, mwakuti vitumbiko viŵenge pa nyumba ya Israele.

³¹Ŵasofi ŵakwenera kurya kalikose chara, manyi ndi chiyuni panji chikoko chara icho chafwa chekha panji icho chakomeka na chikoko.”