Read new_tumbuka_bible Ezekiyele 45 Bible Online

Ezekiyele 45 - new_tumbuka_bible bible

Ezekiyele 45

¹“Para mukugaŵa charu kuŵa chiharo cha fuko lirilose, mupatulire FUMU chigaŵa cha charu kuŵa phande lakhe lakupatulika. Mu utali chiŵe makilomita 12 pachanya mamita 50 ndipo mu ufupi chiŵe makilomita khumi. Malo ghose agha ghaŵenge ghakupatulika.

²Mu chigaŵa cha charu ichi, mukapime chigaŵa chakuyana waka cha mamita 250 mu utali madera ghose, icho chamkuŵa cha Nyumba ya Chiuta. Kuzingirizga malo gheneagha pakaŵe malo ghambula chilichose ghakukwana mamita 25.

³Mu chigaŵa chakupatulika ichi, mupime malo gha makilomita 12 na hafu utali, ndipo mu usani makilomita ghankhonde kuŵa malo gha Nyumba ya Chiuta, Malo Ghakupatulika Nkhanira.

⁴Ichi chamkuŵa chigaŵa chakupatulika cha charu ndipo chamkuŵa cha ŵasofi awo ŵakuteŵetera mu Nyumba ya Chiuta, na kwimilira panthazi pa FUMU kuyiteŵetera. Ghati ghaŵenge malo uko kwamkuŵa nyumba zawo ndiposo na Nyumba ya Chiuta.

⁵Malo ghanyakhe gha makilomita 12 pachanya mamita 50 mu utali ndiposo na makilomita ghankhonde mu usani ghamkuŵa gha ŵaLevi awo ŵakuchita mlimo mu Nyumba ya Chiuta. Malo gheneagha ghamkuŵa chiharo chawo na kuzengako misumba yawo yakukharamo.”

⁶“Mu mphepete mwa chigaŵa chakupatulika ichi paŵe malo pafupi makilomita ghankhonde mu usani ndipo makilomita 12 pachanya mamita 50 mu utali kuti ghaŵe chiharo cha msumba. Malo gheneagha ghaŵenge gha ŵaIsraele wose.”

⁷“Karonga wamkuŵa na charu icho chamkuthyana waka na malo ghakupatulika na malo gha msumba. Mphaka yakhe yamkurazga ku manjiliro gha dazi na ku mafumiro ghakhe. Mu utali yamkuthyana waka na chimoza cha vigaŵa ivyo mafuko ghakagaŵikira ndipo yamkumalira ku charu cha ku manjiliro gha dazi na cha ku mafumiro ghakhe.

⁸Charu ichi chamkuŵa charu chakhe na chakhe mu mbumba ya Israele. Ŵakaronga ŵane kuti ŵamkutindiŵizgira pasi ŵanthu ŵane chara, kweni ŵamkugaŵa charu mu Israele kwakuyana na fuko na fuko.

⁹“FUMU Chiuta wakuti, ‘Imwe ŵakaronga ŵa charu cha Israele, icho mwachita mbwenu! Mureke kuchita nkhaza na kutindiŵizgira pasi ŵanthu. Muchitenge icho nchakunyoroka na cha urunji. Mureke kuŵafumya ŵanthu ŵane mu charu chawo.’ ” Ntheura ndimo FUMU Chiuta wakuyowoyera.

¹⁰“Vyakupimira vyinu nga ndi chidunga na debe viŵenge vyakuneneska.

¹¹Debe na chidunga viŵenge vya mweso wakuyana waka. Debe liŵenge chigaŵa chimoza cha vigaŵa khumi vya homeri ndipo chidunga chiŵenge chigaŵa chimoza cha vigaŵa khumi vya homeri. Homeri ndiwo uŵe mweso wakuzomerezgeka.

¹²Ndarama yimoza ya siliva yiti yiyanenge na magera 20. Ndarama za siliva 60 ziti ziyanenge na mina[2] yumoza.”

¹³“Ivyo mukwenera kupereka ndi ivi: chigaŵa chimoza cha vigaŵa vinkhonde na chimoza cha chigaŵa cha khumi cha debe la tirigu ndiposo chigaŵa chimoza cha vigaŵa vinkhonde na chimoza cha khumi cha debe la nyauti.

¹⁴Chipimo chakuzomerezgeka cha mafuta ndi chimoza cha vigaŵa khumi cha debe kufumira ku koro lirilose, (koro wakuyana na homeri, wali na miyeso ya mafuta khumi mu debe).

¹⁵Mupereke mberere yimoza kufuma mu mskambo wa mberere na mbuzi 200 za mu luhari lwa maji ghaweme gha charu cha Israele. Ntheura ndimo mwizamkuperekera sembe za ufu, sembe zakocha, sembe za wenenawene pakuŵaphepiskira ŵanthu. Ntheura ndimo yikuyowoyera FUMU.”

¹⁶“Ŵanthu wose ŵa mu charu ŵaperekenge vinthu vyeneivi kwa karonga wa charu cha Israele.

¹⁷Karonga ndiyo waŵe na mlimo wakupereka sembe zakocha, sembe za ufu, sembe za vyakumwa, pa viphikiro vya kuthwasa kwa mwezi, pa vya maSabata na pa viphikiro vyose vyakwimikika vya ŵaIsraele. Iyo ndiyo wati wapereke sembe zakuphepiskira kwananga, sembe za ufu, sembe zakocha mburuma, na sembe za wenenawene kuti waphepiskire kwananga kwa ŵaIsraele.

¹⁸“FUMU Chiuta wakuti, ‘Pa zuŵa lakudanga la mwezi wakudanga, mutorenge nkhambako yambula kalema, na kutozga Nyumba ya Chiuta.

¹⁹Musofi watorepo ndopa zichoko waka za sembe yakuphepiskira kwananga na kuziphaka pa nchindamira za pa muryango wa Nyumba ya Chiuta uku na uku, pa ngodya zinayi za lukombero lwa jochero, na pa mphingirizgo za pa chipata cha mukati.

²⁰Mukachiteso ntheura pera na pa zuŵa la chinkhonde na chiŵiri la mwezi chifukwa cha uyo wananga mu kupuvya, panji mu ujira. Ntheura ndimo muti muphepiskire Nyumba ya Chiuta.’ ”

²¹“Pa zuŵa la 14 la mwezi wakudanga, mukaŵenge na chiphikiro cha Paska, ndipo mwamkurya chingwa chambula chirungo pa mazuŵa ghankhonde na ghaŵiri.

²²Pa zuŵa leneilo, karonga wakapereke nkhambako kuŵa sembe yakuphepiskira kwananga kwakhe na kwananga kwa ŵanthu wose.

²³Pa mazuŵa ghankhonde na ghaŵiri gha chiphikiro, karonga waperekenge zuŵa na zuŵa kwa FUMU sembe zakocha izi: nkhambako zinkhonde na ziŵiri ndipo na mberere zanarume zambula kalema zinkhonde na ziŵiri. Ndipo zuŵa na zuŵa waperekenge pepe kuŵa sembe yakuphepiskira zakwananga.

²⁴Wapereke sembe ya ufu wakunyiririka wa debe limoza pa nkhambako yiliyose na debe limoza pa mberere yanarume yiliyose pamoza na malita ghanayi gha mafuta gha maolive pa debe lirilose.”

²⁵“Sono karonga uyu wachiteso ntheura pera pa zuŵa la 15 la mwezi wa chinkhonde na chiŵiri. Chiphikiro ichi chichitikenge pa mazuŵa ghankhonde na ghaŵiri. Waperekenge sembe za mtundu weneuwo pera, sembe zakuphepiskira kwananga, sembe zakocha, sembe za ufu, ndipo na sembe za mafuta.”