Read new_tumbuka_bible Ezekiyele 46 Bible Online

Ezekiyele 46 - new_tumbuka_bible bible

Ezekiyele 46

¹“FUMU Chiuta wakuti, ‘Chipata chakurazga ku mafumiro gha dazi kuya ku chipinda cha mukati, chiŵenge chakujarika pa mazuŵa ghankhonde na limoza ghakuchitira milimo. Kweni chijurikenge pa zuŵa la Sabata na pa kuthwasa kwa mwezi.

²Karonga wanjilirenge pa khonde la pa muryango kufuma kuwaro na kwimilira pa nchindaniro ya pa chipata. Ŵasofi ŵamuperekerenge karonga sembe yakocha mburuma na sembe ya wenenawene. Pa chibumira cha chipata, ndipo karonga wasoperenge na kufumira kuwaro. Kweni chipata kuti chamkujurika chara mpaka na mise.

³Pa mazuŵa gha maSabata na pa kuthwasa kwa mwezi, ŵanthu nawoso ŵakasoperenge FUMU panthazi pa chipata.

⁴Sembe yakocha iyo karonga wakupereka pa zuŵa la Sabata kwa FUMU, ziŵenge ŵana-mberere ŵambula kalema ŵankhonde na yumoza na mberere yanarume yambula kalema.

⁵Sembe ya ufu yiŵe ya debe limoza pa mberere yanarume yose, ndipo pa sembe ya ŵana-mberere awo wati waperekenge, paŵe sembe ya vyakurya umo iyo wangakhumbira kuperekera, pamoza na mafuta gha malita ghanayi gha maolive pa debe lirilose.

⁶Pa zuŵa la chiphikiro cha kuthwasa kwa mwezi, wapereke nkhambako yiwukirano yambula kalema, ŵana-mberere ŵankhonde na yumoza pamoza na mberere yanarume, vyose vyambula kalema.

⁷Pa sembe ya ufu, wati waperekenge debe limoza pa nkhambako yiliyose, debe limoza pa mberere yanarume yose, ndiposo pa ŵana-mberere wati waperekenge sembe ya vyakurya debe limoza nga ndi umo wangakhumbira kuperekera pamoza na malita ghanayi gha mafuta gha maolive.

⁸Para karonga wakunjira, wanjilire pa khonde la pa chipata na kufumira pa chipinda cheneichi.’ ”

⁹“Para ŵanthu ŵakwiza kuti ŵasope FUMU pa viphikiro vyakwimikika, munthu yose uyo wakunjirira pa chipata cha ku mpoto kuya kasopa, wafumire ku chipata cha ku mwera. Yose uyo wanjilirenge ku chipata cha ku mwera, wafumire ku chipata cha ku mpoto. Paŵavye munthu wakuwerera ku chipata icho wangunjirira, kweni yose warutenge waka na kuya kafuma.

¹⁰Para ŵanthu ŵakunjira, karonga nayo wanjirenge nawo pamoza, ndipo para ŵakufuma, karonga nayo wafumenge.”

¹¹“Pa viphikiro na pa nyengo zakwimikika, paŵenge debe ya sembe ya ufu na nkhambako yiwukirano yimoza, debe ya vyakurya pamoza na mberere yanarume, ndiposo pa ŵana-mberere, wapereke sembe ya vyakurya nga ndi umo wangakhumbira kuperekera pamoza na mafuta malita ghanayi pa debe lirilose.

¹²Para karonga wakupereka sembe yiliyose mu wanangwa kwa FUMU, manyi yingaŵa sembe yakocha, sembe ya wenenawene, chipata chakurazga ku mafumiro gha dazi ndicho ŵamujurirenge. Wapereke sembe yakhe yakocha, sembe ya wenenawene nga ndi umo wakuchitira pa zuŵa la Sabata. Para wakufumira kuwaro, chipata chijarike.”

¹³“Zuŵa na zuŵa mulenje uliwose muperekenge mwana-mberere wambula kalema, wa chirimika chimoza, kuŵa sembe yakocha kwa FUMU.

¹⁴Pamoza na sembe yeneiyi mulenje uliwose muperekengeso sembe ya ufu chigaŵa chimoza cha vigaŵa vinkhonde na chimoza cha debe pamoza na lita limoza la mafuta gha maolive gha kunyevyera ufu kuŵa sembe ya ufu kwa FUMU. Ili ndi dango la sembe yakocha mulenje uliwose kwa muyirayira.

¹⁵Mulenje uliwose, nga ndi sembe ya zuŵa na zuŵa, mwana-mberere pamoza na ufu ndiposo na mafuta gha maolive viperekekenge kuŵa sembe.

¹⁶“FUMU Chiuta wakuti, ‘Usange karonga wakupereka chawanangwa ku mwana wakhe kufuma mu chiharo chakhe, chiŵenge cha ŵakhe, pakuti nchimoza cha chiharo chawo.

¹⁷Kweni usange wakupereka chawanangwa kufuma mu chiharo chakhe kwa yumoza wa ŵateŵeti ŵakhe, chawanangwa cheneichi chiŵenge cha muteŵeti mweneuyu, kufikira mu chirimika cha wanangwa. Pamanyuma chawanangwa ichi chiwererenge kwa karonga chifukwa ndi chiharo cha ŵana ŵakhe pera.

¹⁸Karonga wareke kutorako icho nchiharo cha ŵanthu ŵakhe, pakuŵafumyamo mu chiharo chawo. Chiharo chakhe na chakhe ndicho wapereke ku ŵana ŵakhe, mwakuti ŵanthu ŵane kupokeka icho nchiharo chawo.’ ”

¹⁹Penepapo munthu yura wakandifumiskira pa muryango uwo ukaŵa mu mphepete mwa chipata, kurazga ku mpoto kwa tuvipinda twakupatulika twa ŵasofi. Kwenekura nkhawona malo ku manjiliro gha dazi wa tuvipinda twa ŵasofi.

²⁰Munthu yura wakati kwa ine, “Agha ndigho malo agho ŵasofi ŵamkuphikira sembe yakuphepiskira majuvyo, sembe ya kwananga, na sembe ya ufu. Ŵachite ntheura mwakuti ŵareke kufumira nagho ku baraza la kuwaro, mzire ŵaŵazgore ŵanthu kuŵa ŵakupatulika.”

²¹Sono munthu yura wakiza nane ku baraza la kuwaro, na kunditorera ku ngodya zinayi za baraza lira. Ndipo mu ngodya yose ya baraza lira mukaŵa kabaraza.

²²Mu ngodya zinayi za baraza lira mukaŵa tumabaraza tuchokotuchoko uto tukaŵa mamita 20 mu utali ndipo mamita 15 mu usani.

²³Mukati mwakhe kuzingirizga tumabaraza tunayi tura, mukaŵa mzere wa mawe, ndipo musi mwakhe ŵakaŵikamo mizere ya vipembo vya moto.

²⁴Munthu yura wakati, “Gheneagha ndigho malo agho awo ŵakuteŵeta mu Nyumba ya Chiuta ŵamkuphikiramo sembe izo ŵanthu ŵakupereka.”