Read new_tumbuka_bible Ezekiyele 47 Bible Online

Ezekiyele 47 - new_tumbuka_bible bible

Ezekiyele 47

¹Munthu yura wakizaso nane ku muryango wa Nyumba ya Chiuta. Nkhawona mbwiwi za maji zikufuma kusi kwa chibumira cha Nyumba ya Chiuta cha ku mafumiro gha dazi, (pakuti Nyumba ya Chiuta yikarazga ku mafumiro gha dazi). Maji ghara ghakakhiranga kufuma kusi kwa dera la ku mwera kwa chibumira cha Nyumba ya Chiuta, ku mwera kwa jochero.

²Wakandifumiskira pa muryango wa chipata cha ku mpoto, ndipo wakandirongozga na kuzingirira nane kuwaro kuya kafika ku chipata cha kuwaro icho chikarazga ku chipata cha ku mafumiro gha dazi. Ndipo nkhawona maji ghakufuma ku dera la ku mwera kwa chipata.

³Apo wakendanga kurazga ku mafumiro gha dazi, wakaŵa na chingwe chakupimira mu woko lakhe, ndipo wakapima mtunda wa mamita 500. Wakandiphalira kuti ndende pa maji, agho ghakaweranga mu tusinginini.

⁴Wakapimaso mtunda unyakhe wa mamita 500 ndipo wakandiphalira kuti ndende pa maji agho ghakaweranga mu makongono. Wakapimaso mtunda unyakheso uwo ukaŵa mamita 500 ndipo wakandiphalira kuti ndende pa maji agha ghakafika pa chiuno.

⁵Wakapimaso mtunda unyakhe wa mamita 500, uwo ukaŵa mronga ndipo nkhatondeka kwambuka, chifukwa maji ghakazura. Mronga uwu ukaŵa wakunjira chomene kuti munthu waskughemo, wambula kuti munthu wangambuka.

⁶Munthu yura wakandifumba wakati, Iwe mwana wa munthu, kasi wachiwona ichi? Penepapo wakandirongozga kuwerera nane, kwenda mu mphepete mwa mronga.

⁷Para nkhafika ku mphepete mwa mronga, nkhawona makuni ghanandi chomene agho ghaŵa sirya ili na ili.

⁸Munthu yura wakati kwa ine, “Maji agha ghakurazga ku chigaŵa cha ku mafumiro gha dazi, ndipo ghakuya kanjira mu mronga wa Yorodani. Para ghakunjira mu maji ghambula kwenda gha Nyanja Yakufwa, maji ghara ghamkuzgoka ghaweme.

⁹Kose uko mronga ukuruta, vyamoyo vyose ivyo vikwenda mu chiwuru, vyamkuŵa na umoyo. Kwamkuŵa somba zinandi chomene, chifukwa maji agha ghakuya kwenekura, mwakuti maji gha mu nyanja ghakuŵa ghaweme, ndipo kose uko maji agha ghakurutako, kanthu kose kamkuŵa na umoyo,

¹⁰Kufuma ku Engedi mpaka ku Eni Egilayimu, ŵarovi ŵamkuŵa mu mphepete mwa nyanja kuponyanga mikwawu yawo. Somba za mtundumtundu zamkuŵa mwenemumo, nga ndi za mu Nyanja Yikuru.

¹¹Kweni visapa na viziŵa vyakhe, maji ghakhe kuti ghamkuzgoka ghaweme chara. Ghamkukhalirira kuŵa gha muchere ndipera.

¹²Makuni gha vipambi vyakurya vya mitundumitundu ghamkumera mu madera ghose ghaŵiri gha mronga uwu. Mahamba ghawo kuti ghamkufota chara, nanga ndi vipambi vyakhe kuti vyamkurakatikira pasi chara. Ghamkupambikanga vipambi mwezi uliwose, chifukwa maji ghawo ghamkufumira ku Nyumba ya Chiuta. Vipambi vyakhe vyamkuŵa vyakurya ndipo mahamba ghakhe ghamkuŵa munkhwara wakuchizgira.

¹³“FUMU Chiuta wakuti, ‘Mphaka izo mwamkurondezga pakugaŵa charu kuŵa chiharo cha mafuko 12 gha Israele ndi agha: Yosefe wapokere viharo viŵiri.

¹⁴Charu icho nkharapa kupereka kwa ŵawiskekuru kuŵa chinu, mugaŵane mwakuyana waka. Charu ichi chamkuperekeka kwa imwe mwa mphenduzgo kuŵa chiharo chinu na nchinu.’ ”

¹⁵“Mphaka ya charu yamkuŵa iyi: Ku dera la mpoto, yamkwamba ku Nyanja Yikuru kwendera ku msumba wa Hetiloni, mpaka ku chipata cha Hamati, kurutilira ku msumba wa Zedadi,

¹⁶ku msumba wa Berota na wa Siburayimu iyo yili pakati pa mphaka ya Damaseko na Hamati, kuya kafika ku charu cha Hazere Hatikoni, pafupi na mphaka za chigaŵa cha Haurani.

¹⁷Mphaka yamkurutilira kufuma ku nyanja mpaka ku msumba wa Hazara Enoni uwo uli ku mpoto kwa umaliro wa chigaŵa cha Damaseko ndiposo mphaka ya charu cha Hamati yili ku dera la ku mpoto kwakhe. Iyi ndiyo yamkuŵa mphaka ku dera la ku mpoto.”

¹⁸“Ku dera la ku mafumiro gha dazi, mphaka yamkwamba pakati pa Haurani na Damaseko, mu mphepete mwa mronga wa Yorodani, pakati pa Gileyadi na charu cha Israele, kuya kafika ku nyanja ya ku mafumiro gha dazi mpaka ku chigaŵa cha Tamara. Iyi ndiyo yamkuŵa mphaka ku dera la ku mafumiro gha dazi.”

¹⁹“Ku dera la ku mwera, mphaka yamkwamba ku Tamara kuya kafika ku maji gha Meriba Kadeshi. Kufuma apo yamkurutilira na ka mronga ka charu cha Eguputo mpaka ku Nyanja Yikuru. Iyi ndiyo yamkuŵa mphaka ku dera la ku mwera.”

²⁰“Ku dera la ku manjiliro gha dazi, Nyanja Yikuru ndiyo yamkuŵa mphaka, pa malo agho ghakuthyana waka na chipata cha Hamati. Iyi ndiyo yamkuŵa mphaka ku dera la ku manjiliro gha dazi.”

²¹“Mugaŵane charu ichi mukati mwinu kwakuyana na mafuko gha Israele.

²²Mugaŵane charu ichi pakuchita mphenduzgo kuti chiŵe chiharo chinu na chinu na cha ŵalendo awo ŵakukhara mukati mwinu, ŵeneawo ŵababira ŵana mwenemumo. Muŵatore nga ndi ŵaIsraele awo ŵakababiwira mukati mwinu. Pamoza na imwe mukaŵagaŵire chiharo chawo mukati mu mafuko gha Israele.

²³Ku fuko ilo mulendo wakukhara, ndiko mukamugaŵire chiharo chakhe. Agha ndi mazgu gha FUMU Chiuta.”