Read new_tumbuka_bible Ezekiyele 48 Bible Online

Ezekiyele 48 - new_tumbuka_bible bible

Ezekiyele 48

¹Agha ndigho mazina gha mafuko agho ghakagaŵana charu. Kwamba ku mphaka ya ku mpoto, fuko la Dani lamkuŵa na phande limoza la charu. Lamkufuma ku nyanja kwendera ku chigaŵa cha Hetiloni, kuya kafika pa unjiliro wa msumba wa Hamati, kuya kafika ku chigaŵa cha Hazara Enoni (icho chili ku mpoto kwa umaliro wa charu cha Damaseko kudunjikana na chigaŵa cha Hamati), ndiposo kurutilira kufuma ku mafumiro gha dazi kuya kafika ku manjiliro gha dazi.

²Phande limoza la charu lamkuŵa la Ashere. Phande lakhe lamkupakana na charu cha Dani kufuma ku dera la ku mafumiro gha dazi kuya kafika ku manjiliro ghakhe.

³Phande limoza la charu lamkuŵa la Nafutali. Phande lakhe lamkupakana na cha Ashere kufuma ku dera la ku mafumiro gha dazi kuya kafika ku manjiliro ghakhe.

⁴Phande limoza la charu lamkuŵa la Manase. Phande lakhe lamkupakana na cha Nafutali kufuma ku dera la ku mafumiro gha dazi kuya kafika ku manjiliro ghakhe.

⁵Phande limoza la charu lamkuŵa la Efurayimu. Phande lakhe lamkupakana na cha Manase kufuma ku dera la ku mafumiro gha dazi kuya kafika ku manjiliro ghakhe.

⁶Phande limoza la charu lamkuŵa la Rubeni. Phande lakhe chamkupakana na cha Efurayimu kufuma ku dera la ku mafumiro gha dazi kuya kafika ku manjiliro ghakhe.

⁷Phande limoza la charu lamkuŵa la Yuda. Phande lakhe lamkupakana na charu cha Rubeni kufuma ku dera la ku mafumiro gha dazi kuya kafika ku manjiliro ghakhe.

⁸“Kupakana na charu cha Yuda, kwamkuŵa phande la charu icho chamkupatuliskika. Phande ili lamkuŵa makilomita 12 na hafu mu usani wakhe ndipo mu utali wakhe, kufuma ku mafumiro gha dazi kuya kafika ku manjiliro ghakhe, lamkuyana waka na charu cha fuko limoza. Nyumba ya Chiuta yamkuŵa pakatikati pa phande leneili.

⁹“Phande la pa dera la charu icho mwachipatulira FUMU, chiŵe makilomita 12 pachanya mamita 50 mu utali ndipo mu usani chiŵe makilomita ghankhonde.

¹⁰Phande lakupatulika ili mukaligaŵe ntheura: ŵasofi ŵamkuŵagaŵira phande ilo kufuma ku mafumiro gha dazi kuya kafika ku manjiliro ghakhe likaŵe makilomita 12 pachanya mamita 50 mu utali, ndipo kufuma ku mpoto kuya kafika ku mwera likaŵe makilomita ghankhonde. Malo Ghakupatulika ghakaŵe pakatikati pa phande leneili.

¹¹Ili lamkuŵa phande la ŵasofi ŵakupatulika, la ŵana ŵa Zadoki awo ŵanguŵa ŵakugomezgeka pakuteŵetera ine, ndipo kuti ŵakapuruka chara nga ndi umo ŵakachitira ŵaLevi para ŵaIsraele ŵakapuruka.

¹²Phande ili lamkuŵa lawo na lawo kufuma ku phande lakupatulika la charu, Malo Ghakupatulika Nkhanira, agho ghakupakana na charu cha ŵaLevi.

¹³Pafupi na charu cha ŵasofi, ŵaLevi mukaŵagaŵire charu cha mtunda wa makilomita 12 pachanya mamita 50 mu utali kufuma ku mafumiro gha dazi kuya kafika ku manjiliro ghakhe, ndipo usani makilomita ghankhonde kufuma ku mpoto kuya kafika ku mwera.

¹⁴Ŵareke kuguliska phande liweme chomene ili, nesi kusinthiska na chinthu chinyakhe, nanga nkhupereka ku ŵalendo, pakuti ndakupatulika kwa FUMU.

¹⁵“Phande la pa dera ilo lakharako, mu utali makilomita 12 pachanya mamita 50, ndipo mu usani makilomita ghaŵiri pachanya mamita 50 lamkuŵa phande lachisanisani la msumba, ilo ŵanthu ŵangazengapo zinyumba na kuliskirapo viŵeto. Pakatikati pa phande leneili ndipo pamkuŵa msumba.

¹⁶Miyeso yakhe yikaŵe ntheura: Ku dera la ku mpoto ukaŵe mamita 2,250, ku dera la ku mwera ukaŵe mamita 2,250, ku dera la ku mafumiro gha dazi ukaŵe mamita 2,250, ndipo ku dera la ku manjiliro gha dazi ukaŵe mamita 2,250.

¹⁷Malo ghakuliskiramo viŵeto gha msumba ghakaŵe ntheura: Ku dera la ku mpoto ghakaŵe mamita 125, ku dera la ku mwera mamita 125, ku dera la ku mafumiro gha dazi mamita 125, ndipo la ku dera la ku mafumiro gha dazi mamita 125.

¹⁸Phande la pa dera ilo lakharako, kuthyana na phande lakupatulika, liŵe makilomita ghankhonde ku dera la ku mafumiro gha dazi mu utali, ndipo makilomita ghankhonde ku dera la ku manjiliro gha dazi mu usani. Phande ili liŵe malo ghakulimapo vyakurya ŵanthu awo ŵakukhara mu msumba.

¹⁹Ŵanthu awo ŵakukhara mu msumba ŵeneawo ŵamkulimanga mu phande leneili ŵakaŵe mafuko ghose gha charu cha Israele.

²⁰Phande la pa dera lose ilo mwamkulipatula likaŵe lakuyana waka, makilomita 12 na hafu madera ghose ghanayi. Nga ndi chawanangwa cha pa dera, likaŵe phande lakupatulika na chiharo cha msumba.”

²¹“Chigaŵa icho chakharako ku maphande ghaŵiri gha phande lakupatulika na la msumba, chamkuŵa cha karonga. Chamkwamba ku dera la ku mafumiro gha dazi pa mtunda wa makilomita 12 na hafu cha phande lakupatulika kuya kafika ku mphaka ya ku mafumiro gha dazi. Chamkwambaso ku dera la ku manjiliro gha dazi pa mtunda wa makilomita 12 na hafu kuya kafika ku mphaka ya ku manjiliro gha dazi. Chigaŵa ichi chikuthyana waka na phande la mafuko ncha karonga, ndipo phande lakupatulika pamoza na Malo Ghakupatulika gha Nyumba ya Chiuta vili pakatikati.

²²Phande la ŵaLevi na phande la msumba vyamkuŵa pakati pa phande ilo nda karonga. Phande ilo nda karonga liŵenge pakati pa mphaka ya charu cha Yuda na cha Benjamini.

²³“Kwakuyana na mafuko agho ghakharako, phande limoza la charu lamkuŵa la Benjamini, kufuma ku dera la ku mafumiro gha dazi kuya kafika ku manjiliro ghakhe.

²⁴“Phande limoza la charu lamkuŵa la Simiyoni. Phande lakhe lamkupakana na la Benjamini kufuma ku dera la ku mafumiro gha dazi kuya kafika ku manjiliro ghakhe.

²⁵“Phande limoza la charu lamkuŵa la Isakara. Phande lakhe lamkupakana na la Simiyoni kufuma ku dera la ku mafumiro gha dazi kuya kafika ku manjiliro ghakhe.

²⁶“Phande limoza la charu lamkuŵa la Zebuloni. Phande lakhe lamkupakana na cha Isakara kufuma ku dera la ku mafumiro gha dazi kuya kafika ku manjiliro ghakhe.

²⁷“Phande limoza la charu lamkuŵa la Gadi. Phande lakhe lamkupakana na cha Zebuloni kufuma ku dera la ku mafumiro gha dazi kuya kafika ku manjiliro ghakhe.

²⁸“Mphaka ya ku mwera ya Gadi yamkwamba ku Tamara kuya kafika ku maji gha Meriba Kadeshi. Yamkurutilira na kamronga pera ka charu cha Eguputo kuya kafika ku Nyanja Yikuru.

²⁹“Ichi ndicho charu icho mwamkugaŵira mafuko gha Israele kuŵa chiharo chawo, ndipo gheneagha ndigho ghamkuŵa maphande ghawo. Ntheura ndimo FUMU Chiuta wakuyowoyera.

³⁰“Vipata vyakufumiramo mu msumba wa Yerusalemu ndi ivi: Ku dera la ku mpoto uwo mtunda wakhe ndi mamita 2,250 pamkuŵa vipata vitatu.

³¹Vipata vya msumba vyamkuchemeka na mazina gha mafuko gha Israele. Vipata vitatu vya ku dera la ku mpoto vyamkuŵa chipata cha Rubeni, cha Yuda, na cha Levi.

³²Ku dera la ku mafumiro gha dazi ilo mtunda wakhe ndi mamita 2,250, pamkuŵa vipata vitatu, chipata cha Yosefe, chipata cha Benjamini, na chipata cha Dani.

³³Ku dera la ku mwera ilo mtunda wakhe ndi mamita 2,250, pamkuŵa vipata vitatu, chipata cha Simiyoni, cha Isakara, na cha Zebuloni.

³⁴Ku dera la ku manjiliro gha dazi ilo mtunda wakhe ndi mamita 2,250, pamkuŵa vipata vitatu, chipata cha Gadi, cha Ashere, na cha Nafutali.

³⁵Mtunda wose kuzingirizga msumba wamkuŵa mamita 9,000. Ndipo zina la msumba kufuma pa zuŵa lenelira, wamkuchemeka kuti, FUMU yili mwenemura.”