Read new_tumbuka_bible Ezekiyele 5 Bible Online

Ezekiyele 5 - new_tumbuka_bible bible

Ezekiyele 5

¹FUMU yikati, “Iwe mwana wa munthu, tora lupanga lwakuthwa, ndipo uluzgore kuŵa nga ndi chimeto kuti umete sisi ku mutu wako na mwembe. Ndipo utore sikelo na kupatula sisi ilo mu vigaŵa vitatu.

²Para mazuŵa ghakujarizgika ghakwiza kukumara, woche pa moto sisi ilo chigaŵa chimoza cha vigaŵa vitatu mukatikati mu msumba. Utore chigaŵa chinyakhe cha vigaŵa vitatu na kuchidumuladumula na lupanga uku ukuzingirira msumba. Ndipo chigaŵa chinyakhe chimoza cha umaliro, uwuruskire ku mphepo, ndipo ine nditi ndilironderenge pamanyuma na lupanga lwane.

³Utorepo sisi lako lichoko waka na kulikakilira mu mphepete mwa malaya ghako.

⁴Pa leneili, utoreso lichoko waka na kuliponya pa moto. Moto wamkufuma pa leneili na kutandazgikira ku fuko lose la Israele.”

⁵FUMU Chiuta wakuti, “Msumba uwu wa Yerusalemu ndawuŵika kuŵa pakatikati pa mafuko ghose gha charu cha pasi, ndipo vyaru vyose kuzingirizga msumba weneuwu.

⁶Ndipouli ŵanthu ŵa mu Yerusalemu ŵawugarukira chomene weruzgi wane kuruska ŵamitundu, ndipo ŵagarukira chomene vilayizgo vyane kuruska vyaru ivyo vyaŵazingirizga. Iwo ŵapata weruzgi wane ndipo ŵareka kurondezga vilayizgo vyane.”

⁷Ntheura FUMU Chiuta wakuti, “Imwe ndimwe ŵa mutafu kuruska ŵamitundu awo ŵamuzingirizgani, ndipo mulije kurondezga weruzgi wane nanga nkhusunga vilayizgo vyane. Imwe mwachita kwakuyana na vilayizgo vya ŵamitundu awo ŵamuzingirizgani.”

⁸Ntheura FUMU Chiuta wakuti, “Wonani, ine nane nditi ndimikane namwe imwe ŵanthu ŵa mu Yerusalemu, ndipo nditi ndipereke weruzgi wane pa imwe uku ŵanthu ŵa mafuko ghose ghakuwona.

⁹Chifukwa cha maukazuzi ghinu ghose agho muli kuchita, ine nditi ndipereke weruzgi pa imwe weneuwo kuti ndili kuwuperekapo na kale chara, ndipo kuti nditi ndiwuperekeso chara.

¹⁰Ŵapapi ŵamkurya ŵana ŵawo ndipo ŵana nawo ŵamkurya ŵapapi ŵawo. Nditi ndipereke weruzgi uwu pa imwe, ndipo wose uyo awo ŵaponengepo, ndiŵambininiskire ku mphepo zinayi.”

¹¹FUMU Chiuta wakuti, “Nkhurapa nadi, chifukwa mwakazuzga malo ghane ghakupatulika na vinthu vyinu vyose vyakukhozga soni, ndiposo na maluso ghinu gha ukazuzi, ine nane kuti nditi ndimurekererani chara. Nditi ndimumarani petu kwambula kuŵa na chiwuravi na imwe.

¹²Ŵanthu chigaŵa chimoza mu vigaŵa vitatu mukati mwinu ŵati ŵafwenge na nthenda yakofya na njara. Ŵanthu chigaŵa chimoza mu vigaŵa vitatu ŵamkukomeka na nkhondo kuzingirizga msumba winu. Ndiposo ŵanthu chigaŵa chimoza mu vigaŵa vitatu nditi ndiŵambininiskire ku mphepo zose zinayi ndipo ndamkuŵarondora na lupanga lwakusorora.

¹³“Para ndafiska ukari wane na kupungulira kutukutwa kwane pa iwo, ndamkukhorwa. Iwo ŵamkumanya kuti ine FUMU ndayowoya mu phamphu lane para ndafiska ukari wane pa iwo.

¹⁴Ndamkuzgora msumba winu kuŵa mahami na wakusekeka na ŵamitundu awo ŵali kumuzingirizgani. Ŵanthu wose awo ŵakujumphapo, ŵizamkuchiwona ichi.

¹⁵Ŵamitundu awo ŵali kumuzingirizgani ŵizamkumutukani na kumuhoyani ndipo mwizamkuŵa chisambizgo chakuseruska kwa iwo para nkhupereka chilango kwa imwe mu ukari, mu kutukutwa, na mukukwiya chomene. Ine FUMU ndine ndayowoya.

¹⁶Ndamkumuponyerani mivwi yakofya ya njara pa imwe kuti yimukomani. Yamkuŵa njara yikuru iyo yamkukulirangakuliranga mpaka chakurya chose chimare.

¹⁷Ndamkumutumirani njara na vikoko ivyo vyamkukoma ŵana ŵinu. Vilengo vya nthenda zakofya na kuthiska ndopa vizamkuŵa posepose mukati mwinu, pakuti ndamkwiza na nkhondo pa imwe. Ine FUMU ndine ndayowoya ichi.”