Read new_tumbuka_bible Ezekiyele 6 Bible Online

Ezekiyele 6 - new_tumbuka_bible bible

Ezekiyele 6

¹Mazgu gha FUMU agho ghakiza kwa ine ghakaŵa ghakuti:

²“Iwe mwana wa munthu, razgira chisko chako ku mapiri gha charu cha Israele ndipo uchime kughasuska.

³Uyowoye kuti, ‘Imwe mapiri gha charu cha Israele, tegherezgani mazgu gha FUMU Chiuta.’ FUMU Chiuta wakuti ku mapiri na ku tumapiri, ku vinkhwawu na ku madambo, ‘Ine nditi ndize na nkhondo pa imwe na kuparanya malo ghinu gha pachanya ghakusoperako.

⁴Majochero ghinu ghakocherapo sembe ghizamkuwiskikira pasi, ndipo majochero ghakocherapo vyakununkhira ghizamkubwangandulika. Ŵanthu ŵinu ndizamkuŵakomera panthazi pa vikozgo vyinu.

⁵Ndizamkugoneka vitanda vya ŵaIsraele panthazi pa vikozgo vyawo, ndipo viwangwa vyinu ndizamkuviparanya kuzingirizga majochero ghinu.

⁶Kose uko mwamkukharako, misumba yinu yamkubwangandulika. Malo ghinu gha pachanya ghakusoperako ghamkupankhuka, mwakuti majochero ghinu ghamkupasuka na kuŵa mahami. Vikozgo vyinu vyamkuphwanyika na kumara petu. Majochero ghinu gha vyakununkhira ghamkuwiskikira pasi, ndipo milimo yinu iyo muli kuchita yamkuwuskikako.

⁷Apo ŵanthu wizamkufwanga mukati mwinu, ndipo awo ŵizamkukharako ŵizamkumanya kuti ine ndine FUMU.’ ”

⁸“Ndipouli ŵanji ŵa imwe ndizamkuŵareka ŵamoyo. Ŵizamkupona ku nkhondo ndipo ndizamuŵambininiskira ku vyaru vinyakhe mukati mu ŵamitundu.

⁹Sono awo mwa imwe ŵamkuponapo ŵizamkundikumbuka mukati mu ŵamitundu uko ŵatorekera ku umikori para ndaphwanya mitima yawo ya ukazuzi yeneiyo yili kupatukako kwa ine ndiposo para ndaburumutizga maso ghawo gheneagho ghakuchita uzaghali bwekabweka na ŵangoza ŵawo. Iwo ŵamkuseruskika na mauheni agho ŵachita ndiposo na maukazuzi ghawo ghose.

¹⁰Sono ŵamkumanya kuti Ine ndine FUMU, ndipo kuti nkhaŵachenjezganga waka chara para nkhayowoya kuti ndiŵachitirenge chinthu chiheni cheneichi.”

¹¹FUMU Chiuta wakuti, “Kuŵani mawoko ghinu, kandani pasi na nkhongono ndipo muchemerezge kuti, ‘Mbaya mwe!’ Ŵakuchita ichi chifukwa cha maukazuzi ghose ghaheni mukati mu ŵaIsraele. Iwo ŵati ŵafwirenge na nkhondo na njara ndiposo na nthenda yakofya.

¹²Munthu uyo wamkuŵa kutali, wamkufwa na nthenda yakofya, uyo wamkuŵa pafupi wamkufwa na nkhondo, ndipo uyo wamkukharako wa moyo wamkufwa na njara. Umu ndimo ukari wane wamkufiskira pa iwo.

¹³Penepapo ndipo ŵamkumanya kuti Ine ndine FUMU, para ŵamkuwona ŵakukomeka ŵawo ŵagonerana mukati mu ŵangoza ŵawo kuzingirizga majochero ghawo, pa tumapiri tose tutali, pachanya pa mapiri ghose, musi mwa khuni lose liŵisi, musi mwa khuni lose la musoro ilo ndikuru, ndiposo na kose uko ŵakaperekeranga sembe za sungu liweme ku ŵangoza ŵawo.

¹⁴Nditi ndiŵalange na woko lane ndipo charu chawo chose chiti chizgoke cha mapopa na cha mayiyi, kose uko ŵakukhara, kufumira ku mapopa mpaka ku msumba wa Ribula. Penepapo ndipo ŵamkumanya kuti ine ndine FUMU.”