Read new_tumbuka_bible Ezekiyele 7 Bible Online

Ezekiyele 7 - new_tumbuka_bible bible

Ezekiyele 7

¹Mazgu gha FUMU ghakiza kwa ine ghakati,

²“Iwe mwana wa munthu, FUMU Chiuta wakuti ku ŵaIsraele, ‘Umaliro uli pafupi. Umaliro ukwiza pa ngodya zinayi za charu.’

³Sono umaliro uli pa imwe ŵaIsraele. Ukari wane nditi ndiwupungulire pa imwe. Nditi ndimweruzgani kwakuyana na mendero ghinu, na kumulangani kwakuyana na ukazuzi winu wose.

⁴Ine kuti nditi ndimurekereraninge nesi kumuŵirani na chitima chara. Nditi ndimulanganinge chifukwa cha mendero ghinu ghaheni na ukazuzi uwo uli mukati mwinu. Penepapo muti mumanyenge kuti Ine ndine FUMU.”

⁵FUMU Chiuta wakuti, “Soka likwiza. Soka pachanya pa soka linyakhe.

⁶Umaliro wafika, umaliro wiza, wizira imwe. Uwu wafika.

⁷Umaliro wizira imwe mwaŵeneimwe mukukhara mu charu. Nyengo yakwana, zuŵa laneng'enera, zuŵa la chivulupi mu malo mwa zuŵa la chimwemwe mu mapiri.

⁸Sono kwakhara kanyengo kachoko waka kuti ndirongore kutukutwa kwa mu mtima wane na kufiska ukari wane pa imwe. Nditi ndimweruzgani kwakuyana na mendero ghinu, na kumulangani kwakuyana na ukazuzi winu wose.

⁹Ine kuti nditi ndimurekereraninge nesi kumuŵirani na chitima chara. Nditi ndimulanganinge chifukwa cha mendero ghinu ghaheni na ukazuzi uwo uli mukati mwinu. Penepapo muti mumanyenge kuti Ine ndine FUMU mweneuyo wamulangani.

¹⁰“Wona zuŵa la umaliro likwiza. Zuŵa lafika. Kwananga kwaphukira ndipo kujikuzga kwazota maluŵa.

¹¹Vivulupi vyakura ndipo vyazgoka kuŵa nthonga yakulangira uheni. Palije na yumoza wa iwo uyo wamkukharako. Vinthu vyawo vyamkumara, usambazi wawo wamkumara, ndipo uchindami wawo nawo wamkumara.

¹²“Nyengo yakwana. Zuŵa laneng'enera. Kukondwa kulije kwa uyo wakugula, nesi kwa uyo wakuguliska kutengera, pakuti ukari wane uŵenge pa iwo wose.

¹³Uyo wakuguliska kuti wati wasangengeso icho wakaguliska pa umoyo wakhe wose chara, pakuti uchimi wane wa ukari uti uŵenge pa iwo wose. Chifukwa cha kwananga kwawo, palije na yumoza uyo wamkuponoska umoyo wakhe.

¹⁴Mbata yamkulira ndipo vyose vyamkunozgeka, kweni kwamkuŵavye na yumoza uyo wamkuruta ku nkhondo, chifukwa ukari wane uŵenge pa iwo wose.”

¹⁵“Kuwaro kwamkuŵa nkhondo. Mu nyumba kwamkuŵa nthenda yakofya na njara. Ŵanthu awo ŵamkuŵa kuwaro, ŵamkufwa na nkhondo, ndipo awo ŵamkuŵa mu msumba ŵamkufwa na nthenda na njara.

¹⁶Usange ŵanji ŵamkuponapo pakudukira ku mapiri nga ndi njiŵa za mu madambo, wose ŵakulira kwenekura. Wose ndamkuŵakoma ndipera chifukwa cha kwananga kwawo.

¹⁷Mawoko ghose ghati ghaŵe ghakulopotoka ndipo makongono ghose ghati ghasunkhunyike nga ndi maji.

¹⁸Ŵamkuvwara vigudulu mu viwuno vyawo, ndipo wofi wamkuŵakora. Ŵamkurongora visko vya soni ndipo wose ŵamkumeta mupara.

¹⁹Ŵamkutaya siliva lawo mu misewu, ndipo golide lawo liri nga chinthu chakukazuzgika. Siliva na golide wawo kuti wamkuŵathaska chara pa zuŵa ilo FUMU yamkurongorera ukari wakhe. Chuma chawo cheneichi kuti chamkumarizga njara nesi kuŵakhutiska chara chifukwa kwananga kwawo ndiko kwamkuŵa chikhuŵazgo kwa iwo.”

²⁰Iwo ŵakajikuzganga na vitoweskero vyawo vyakutowa ndipo na vyeneivi, ŵakanozgeranga vikozgo vyawo viheni na vya ukazuzi. Ntheura nditi ndivizgore kuŵa chinthu chaukazuzi kwa iwo.

²¹Nditi ndivipereke ku ŵanthu ŵalendo kuti ŵaviskoghe. Ŵanthu ŵaheni ŵa mu charu kuti ŵavikazuzge.

²²Ine ndizamkuzgokera chisko chane kutali na iwo, ndipo ŵati ŵakazuzge malo ghane ghakupatulika. Ŵankhungu ŵamkunjira na kughakazuzga.

²³Nozgani maunyoro chifukwa charu chose chazura na ŵanthu ŵakuthiska ndopa ndipo msumba wazura na vivulupi.

²⁴Nditi ndize na ŵamitundu ŵaheni chomene kuti ŵize na kutora nyumba zawo. Nditi ndimarizge nkhongono ya kujikuzga kwawo ndipo malo ghawo ghakupatulika ghamkukazuzgika.

²⁵Para ŵanthu ŵane vyaŵizira vyakuŵinya, ŵamkupenja mutende, kweni kuti ŵamkuwusanga chara.

²⁶Kwamkuŵa soka pachanya pa soka linyakhe, ndipo lumbiri pachanya pa lumbiri lunyakhe. Ŵanthu ŵamkupenja nchimi kuti yiŵaphalire mboniwoni. Ŵasofi ŵamkureka kusambizga marango, ndipo ŵararaŵarara kuti ŵamkupereka urongozgi kwa iwo chara.

²⁷Karonga wamkutengeranga waka ndipo nduna yakhe yamkuzura na wofi. Mawoko gha ŵanthu ŵa mu charu chira ghamkumbwambwantha chifukwa cha wofi. Ndizamkuŵalanga kwakuyana na mendero ghawo, ndipo ndizamkuŵeruzga kwakuyana na umo iwo ŵakweruzgira ŵanyawo. Ntheura ŵamkumanya kuti Ine ndine FUMU.