Read new_tumbuka_bible Ezekiyele 8 Bible Online

Ezekiyele 8 - new_tumbuka_bible bible

Ezekiyele 8

¹Pa zuŵa la chinkhonde la mwezi wa chinkhonde na chimoza, mu chirimika cha chinkhonde na chimoza cha umikori withu, nkhaŵa pamoza na ŵararaŵarara ŵa ŵaYuda mu nyumba yane. Mwa mabuchibuchi nkhongono ya FUMU Chiuta yikandizira.

²Ine nkhalaŵiska, ndipo nkhawona chinthu icho chikaŵa nga ndi munthu. Kufuma mu chiuno chakhe kukhilira pasi wakawoneka nga ndi moto ndipo kufuma mu chiuno kuya muchanya wakawoneka nga ndi mkuŵa wakung'azima.

³Munthu yura wakanyoroska chinthu icho chikaŵa nga ndi woko ndipo chikakora findo la sisi lane. Penepapo Mzimu wa Chiuta ukandinyamulira muchanya pakati pa charu na mlengalenga. Mu mboniwoni za Chiuta, Mzimu ukanditorera ku Yerusalemu na kundiŵika pa muryango wa chipata cha mukati uwo ukurazga ku mpoto. Penepapo pakaŵa chitengo cha chikozgo icho chikuwuska sanje ya Chiuta.

⁴Penepapo nkhawona uchindami wa Chiuta wa Israele wakuyana na uwo nkhawona mu mboniwoni ya pakudanga ku chidika kura.

⁵Sono FUMU yikati kwa ine, “Iwe mwana wa munthu, inuska maso ghako, laŵiska ku mpoto.” Ntheura ine nkhalaŵiskako ku dera la ku mpoto kwa muryango wakuya ku chipata cha jochero ndipo nkhawona chikozgo ichi cha sanje.

⁶FUMU yikati kwa ine, “Iwe mwana wa munthu, kasi ukuviwona ivyo ŵaIsraele ŵakuchita? Maukazuzi agho ŵaIsraele ŵakuchita ndigho ghakuchitiska kuti ine ndireke kuŵa mu malo ghane yakupatulika. Ndipo iwe uti uwonenge maukazuzi ghakuru kuruska agho ukuwona apa.”

⁷Penepapo wakanditorera ku muryango wakuya ku baraza la Nyumba ya Chiuta, kweneuko nkhawona chidorozi pa chiliŵa.

⁸FUMU yikati kwa ine, “Iwe mwana wa munthu, dorora chiliŵa ichi.” Ntheura nkhadorora chiliŵa chira ndipo nkhawona muryango.

⁹FUMU yikati kwa ine, “Njira kuti uwone maukazuzi ghaheni agho ŵakuchita kuno.”

¹⁰Ntheura ine nkhanjira ndipo nkhawona. Mwenemura mukaŵa vithuzithuzi vyakulembeka kuzingirizga viliŵa. Pakaŵa mitundu yose ya vyakukhwaŵa na vikoko vya ukazuzi, ndiposo na ŵangoza wose ŵa ŵaIsraele.

¹¹Panthazi pa vyeneivi pakaŵa ŵararaŵarara ŵa ŵaIsraele 70 pamoza na Yaazaniya mwana wa Shafani uyo wakimilira mukati mwawo. Waliyose wa ŵararaŵarara aŵa wakaŵa na bakule wakusunkhizgiramo vyakununkhira mu woko lakhe ndipo josi lakuŵa nga ndi bingu, la sungu liweme la vyakununkhira likakwereranga kuchanya.

¹²FUMU yikati kwa ine, “Iwe mwana wa munthu, kasi ukuwona ivyo ŵararaŵarara ŵa ŵaIsraele ŵakuchita mu udesi? Munthu waliyose wakusopa chikozgo chakhe na chakhe mu chipinda chakhe. Iwo ŵakughanaghana kuti FUMU yikuŵawona chara, ndipo yili kuchireka charu.”

¹³FUMU yikamuphaliraso kuti, “Uti uwonenge maukazuzi ghanyakhe ghakuru agho ŵakuchita ŵaIsraele.”

¹⁴Pamanyuma wakanditorera ku muryango wakuya ku chipata cha ku mpoto kwa Nyumba ya FUMU. Kwenekura nkhawona ŵanakazi ŵakhara pasi ŵakulirira ngoza wawo Tamuzi.

¹⁵FUMU yikati kwa ine, “Iwe mwana wa munthu, kasi ukuchiwona ichi? Ndipouli uti uwonenge maukazuzi ghanyakhe ghakuru kuruska agha.”

¹⁶Wakanditorera ku baraza la mukati la Nyumba ya FUMU, ndipo kwenekura pa muryango wa Nyumba ya FUMU, pakati pa khonde na jochero pakaŵa ŵanarume 25. Ŵakarazga nkhonyoro zawo ku Nyumba ya FUMU ndipo ŵakalaŵiska ku mafumiro gha dazi. Iwo ŵakasindamanga kusopa dazi.

¹⁷FUMU yikati kwa ine, “Iwe mwana wa munthu, kasi ukuchiwona ichi? Kasi ndi chinthu chipusu kuti ŵaYuda ŵachitenge maukazuzi agho ŵakuchita pano. Kasi ŵazuzgenge charu na vivulupi na kusosomora ukari wane kaŵirikaŵiri? Wona umo ŵakunditukira ine kwakuruska.

¹⁸Pa chifukwa ichi nditi ndiŵachitire mu ukari. Kuti nditi ndiŵarekerere chara, nesi kuŵa na chiwuravi na iwo. Nanga ŵangalirira kwa ine kuti nditi ndiŵapulike chara.”