Read new_tumbuka_bible Ezekiyele 9 Bible Online

Ezekiyele 9 - new_tumbuka_bible bible

Ezekiyele 9

¹Penepapo nkhapulika FUMU yikucherezga kwa ine na mazgu ghakuru yikati, “Sendererani kufupi imwe mukupereka chilango mu msumba. Waliyose wa imwe wize na homwa lakhe mu woko lakhe.”

²Sono nkhawona ŵanthu ŵankhonde na yumoza kufumira ku chipata cha kunena icho chikarazgira ku mpoto kwa Nyumba ya Chiuta, yose wakakorera homwa lakukomera mu woko lakhe. Ndipo pamoza nawo pakaŵa munthu uyo wakavwara salu ya bafuta ndipo wakaŵa na vyakulembera pa mphepete pakhe, ndipo wose pamoza ŵakiza na kwimilira pafupi na jochero la mkuŵa.

³Penepapo uchindami wa Chiuta wa Israele ukakwera kufuma pa ŵakerubi apo ukaŵa ndipo ukiza pa muryango wa nyumba yakhe. FUMU yikachemerezga kwa munthu uyo wakavwara salu ya bafuta, mweneuyo wakaŵa na vyakulembera pa mphepete pakhe.

⁴FUMU yikati kwa iyo, “Sorota mu mukati msumba wa Yerusalemu ndipo ulembe chimanyikwiro pa visko vya ŵanthu awo ŵakutampha na kulira chifukwa cha maukazuzi ghose agho ghakuchitika mu msumba.”

⁵Ndipo ku ŵanthu ŵanyakhe nkhapulika FUMU yikuyowoya yikuti, “Murondezgani iyo pakusorota mu msumba ndipo mukomenge ŵanthu kwambula kurekapo waliyose nesi kuŵa na chitima na munthu.

⁶Mukome ŵachekuru, ŵanyamata na ŵasungwana, ŵanakazi na ŵana. Mureke kukoma yose uyo wali na chimanyikwiro. Mwambe mu malo ghane ghakupatulika.” Ntheura ŵakamba kukoma ŵararaŵarara awo ŵakaŵa panthazi pa Nyumba yakupatulika.

⁷FUMU yikati kwa iwo, “Kazuzgani Nyumba ya Chiuta pakuzuzga mabaraza ghakhe na ŵanthu ŵakukomeka. Rutani mukachite.” Ntheura ŵakaruta na kukoma ŵanthu mu msumba wose.

⁸Apo ŵakaŵa ŵachali kukoma, ine nkhasangika kuti ndili ndekha. Ntheura nkhawa pasi kavunama na kulira nkhati, “Mwe FUMU Chiuta, kasi mukomenge wose awo ŵali kukharako mu charu cha Israele pakurongora ukari winu ntheura mu Yerusalemu?”

⁹FUMU yikandizgora yikati, “Kwananga kwa ŵaIsraele na ŵaYuda nkhukuru chomene. Charu chazura na kukomana ndipo msumba wazura na weruzgi wambula kunyoroka. Ŵanthu ŵakuyowoya kuti, ‘FUMU yili kuchireka charu ndipo ŵanthu kuti yikuwona chara.’

¹⁰Ine nane kuti ndiŵarekererenge nesi kuŵa na chitima na iwo chara. Kweni nditi ndiŵalange pa icho iwo ŵali kuchita.”

¹¹Penepapo munthu uyo wakavwara salu ya bafuta yura, uku wali na chakulembera ndiposo na inki mu chiuno chakhe wakati, “Ine ndachita nga ndi umo mukandilangulira.”