Read new_tumbuka_bible Daniyele 1 Bible Online

Daniyele 1 - new_tumbuka_bible bible

Daniyele 1

¹Mu chirimika cha chitatu cha kuwusa kwa Yehoyiyakimu, karonga wa charu cha Yuda, Nebukadinezara, karonga wa charu cha Babuloni, wakiza na nkhondo kuzingirizga msumba wa Yerusalemu.

²FUMU yikamupereka Yehoyiyakimu mu mawoko gha Nebukadinezara, pamoza na viteŵetero vinyakhe vya mu Nyumba ya Chiuta, ndipo iyo wakaviyeghera ku charu cha Babuloni, ku nyumba ya chiuta wakhe. Wakaviŵika mu chipinda chakusungiramo chuma cha chiuta wakhe.

³Penepapo karonga wakalangula Ashipenazi, mukuru wa nthunguli zakhe, kuti wasankhemo ŵaIsraele ŵanji kufuma mu mbumba za ufumu na za ŵakuzirwa.

⁴Ŵeneaŵa ŵaŵe ŵawukirano ŵambula kalema, ŵakutowa na nkhwantha mu vinjeru vyose, ŵakumanyiska na ŵakusambira makora, ndipo ŵangamanya kuteŵetera mu nyumba ya ufumu. Iyo Ashipenazi wakenera kuŵasambizga malembo na chiyowoyero cha ŵaBabuloni.

⁵Karonga wakalangulaso kuti zuŵa na zuŵa ŵawukirano ŵara waŵapenge chakurya icho iyo wakaryangapo ndiposo na vinyo ilo iyo wakamwangapo. Iwo ŵakenera kusambira virimika vitatu ndipo para ŵamara wize nawo kwa karonga kuti ŵamuteŵeterenge.

⁶Mukati mwa aŵa mukaŵa Daniyele, Hananiya, Mishayele na Azariya kufuma mu fuko la Yuda.

⁷Mukuru wa zinthunguli yura wakaŵapa mazina ghanyakhe. Daniyele wakamuthya Beliteshazara, Hananiya wakamuthya Shadireki, Mishayele wakamuthya Meshaki, ndipo Azariya wakamuthya Abedinego.

⁸Kweni Daniyele wakadumula mu mtima wakhe kuti wareke kujikazuzga na vyakurya viweme vya karonga panji na vinyo ilo wakamwanga. Ntheura wakamuromba mukuru wa nthunguli yura kuti wamuzomerezge wareke kujikazuzga na chakurya cha karonga.

⁹Sono Chiuta wakachitiska kuti nthunguli yira yiŵe ya kutemwa na ya chisungusungu kwa Daniyele.

¹⁰Ndipo mukuru wa nthunguli yura wakati kwa Daniyele, “Nkhopa, mzire karonga, sekuru wane, uyo wakalangula vyakurya na vyakumwa vyinu, wawone kuti waghanda kuruska ŵawukirano ŵa nthanga yako. Ntheura ungandizighiska kuti karonga wandikome pakudumula mutu wane.”

¹¹Penepapo Daniyele wakati kwa muteŵeti mweneuyo mukuru wa zinthunguli wakamwimika pachanya pa Daniyele, Hananiya, Mishayele na Azariya wakati,

¹²“Mutiyezge ta ŵateŵeti ŵinu mazuŵa khumi. Mutipe mphangwe kuti tiryenge na maji kuti timwenge.

¹³Ndipo muwone imwe visko vyithu na visko vya ŵawukirano awo ŵatiryenge vyakurya viweme vya karonga, ndipo mutichitire ta ŵateŵeti ŵinu kwakulingana na umo mwawonera.”

¹⁴Ntheura wakaŵazomerezga pa fundo iyi, na kuŵayezga mazuŵa khumi.

¹⁵Ndipo pa umaliro wa mazuŵa khumi kukasangika kuti visko vyawo vikawoneka viweme chomene na vyakututuŵa makora kwakuruska ŵawukirano wose awo ŵakaryanga vyakurya viweme vya karonga.

¹⁶Penepapo muteŵeti yura wakawuskapo vyakurya viweme na vinyo ilo wakatenge ŵamwenge, ndipo wakaŵapanga mphangwe.

¹⁷Chiuta wakaŵapa ŵawukirano ŵanayi ŵara umanyi na mahara ghakumanyira malembo ghose ndiposo vinjeru. Daniyele wakaŵa munthu wakumanyiska chomene kung'anamulira mboniwoni na maloto ghose.

¹⁸Sono pa umaliro wa virimika vitatu karonga wakalangula kuti ŵize kwa iyo, ndipo mukuru wa zinthunguli wakiza nawo panthazi pa Nebukadinezara.

¹⁹Karonga wakayowoya nawo, ndipo mukati mwa wose ŵara, mukaŵavye na yumoza wakuwoneka makora kuruska ŵanayi ŵara: Daniyele, Hananiya, Mishayele na Azariya. Pa chifukwa ichi karonga wakaŵasankha kuti ŵakamuteŵeterenge.

²⁰Ndipo mu vinthu ivyo vikakhumba mahara na umanyi, vyeneivyo karonga wakaŵafumba, wakasanga kuti iwo mahara na umanyi wawo vikuruska pa mahara ka khumi gha ŵamayere ŵakhe na ŵamaula awo ŵakaŵa mu charu chakhe chose.

²¹Daniyele wakakhalira kwenekura mpaka pa nyengo ya kuwusa kwa Karonga Kirusi.