Read new_tumbuka_bible Daniyele 10 Bible Online

Daniyele 10 - new_tumbuka_bible bible

Daniyele 10

¹Mu chirimika cha chitatu cha kuwusa kwa Karonga Kirusi wa charu cha Peresiya, uvumbuzi ukiza kwa Daniyele, uyo wakachemekanga kuti Beliteshazara. Mazgu ghara ghakaŵa gha unenesko ndipo ghakapharanga vya nkhondo yikuru. Daniyele wakiza kaghapulikiska kwizira mu mboniwoni.

²Pa nyengo yeneyira, ine Daniyele, nkhatengera kwa masabata ghatatu.

³Nkharya vya mafuta chara, nyama na vinyo kuti vikanjira mu mlomo wane chara. Kuti nkhaphakara mafuta, nesi kupesa sisi ku mutu wane chara, mpaka masabata gha mphumphu ghatatu ghakamara.

⁴Pa zuŵa la 24 la mwezi wakudanga, nkhasangika kuti ndimilira mu mphepete mwa mronga ukuru wa Tigirisi.

⁵Nkhinuska maso ghane ndipo nkhalaŵiska na kuwona munthu uyo wakavwara salu ya bafuta ndipo wakajiphinya mu chiuno na lamba wa golide la ku Ufazi.

⁶Thupi lakhe likang'azimanga nga ndi libwe la mtengo wa patali. Chisko chakhe chikaŵala nga ndi leza, ndipo maso ghakhe ghakagoleranga nga ndi vyenje. Mawoko na malundi ghakhe ghakang'azimanga nga ndi libwe la mkuŵa wakutuwulika, ndipo mazgu ghakhe ghakapulikikwa nga ndi kupoma kwa chiwuru cha ŵanthu.

⁷Ine pera Daniyele ndine nkhawona mboniwoni iyi. Ŵanthu awo ŵakaŵa nane kuti ŵakayiwona chara, kweni ŵakaŵa na wofi ukuru chomene ndipo ŵakachimbira na kuya kabisama.

⁸Ntheura nkhakhara ndekha, kulaŵisiska ku mboniwoni yikuru iyi. Nkhongono zose zikandimalira ndipo chisko chane chikazgoka kuŵa chakufwa. Pakaŵavye na yumoza wakundovwira.

⁹Penepapo nkhamupulika wakuyowoya kwa ine. Apo nkhati ndapulika mazgu ghakhe, nkhawa pasi kavunama ndipo nkhaŵa mu tulo tuzitu.

¹⁰Penepapo yunji wakandikhwaska na woko lakhe na kundiwuska apo ine nkhumbwambwantha mu mawoko na mu makongono ghane.

¹¹Munthu yura wakandiphalira wakati, “Iwe Daniyele, ndiwe munthu wakutemweka chomene. Tegherezga chomene ku mazgu agho nditi ndiyowoye kwa iwe. Wimilire apo uli pakuti ine ndatumika kwa iwe.” Wachali kundiyowoyera mazgu agha, nkhimilira uku nkhutenthema.

¹²Sono wakati kwa ine, “Daniyele, reka kopa, pakuti kufuma pa zuŵa lakudanga ilo ukaŵikirapo mtima wako kupulikiska vinthu na kujiyuyura panthazi pa Chiuta wako, maŵeyerero ghako ghali kupulikikwa. Ine ndiza kuti ndikuzgore maŵeyerero ghako.”

¹³Kweni mungelo wa chivikiriro wa ufumu wa charu cha Peresiya wakimikana nane kwa mazuŵa 21. Sono pakukoreka nyengo yitali, mungelo Mikayele, yumoza wa ŵangelo ŵararaŵarara wakiza na kundovwira kwimikana na mungelo wachivikiriro wa ufumu wa charu cha Peresiya.

¹⁴Ine sono ndiza kuti ndikurongosorere icho chizamkuchitika ku ŵanthu ŵako mu mazuŵa agho ghakwiza. Pakuti mboniwoni iyi nja mazuŵa agho ghakwiza.

¹⁵Para wakayowoya kwa ine mazgu ghose agha, nkhasindamira pasi ndipo nkhaŵa wa mbuwu.

¹⁶Penepapo yumoza uyo wakaŵa nga ndi munthu wakakhwaska milomo yane. Sono ine nkhamba kuyowoya kwa iyo apo wimilira panthazi pa ine nkhati, Sekuru wane, ine ndili mu vyakuŵinya chifukwa cha mboniwoni iyi ndipo ndilije na nkhongono wuwo.

¹⁷Kasi nda muteŵeti winu ndingayowoya namwe uli, imwe sekuru wane? Pakuti sono nkhongono zandimalira ndipo ndilije na muvuchi wuwo.

¹⁸Kachiŵiri, yumoza wakuŵa nga ndi munthu wakandikhwaska na kundikhomeska.

¹⁹Iyo wakati, “Iwe wa munthu wakutemweka chomene, ungopanga. Mutende uŵe nawe. Uŵe wankhongono na kukhwima mtima.” Apo wakaŵa wachali kuyowoya, nkhakhwimiskika ndipo nkhati, “Yowoyani sekuru wane, pakuti mwandipa nkhongono.”

²⁰Penepapo wakati kwa ine, “Kasi ukuchimanya chifukwa icho ndizira kwa iwe? Kweni sono nditi ndiwerere danga kuya karwa na mungelo wa ufumu wa charu cha Peresiya. Para ndaruta waka, mungelo wa ufumu wa charu cha Grisi wamkwiza.

²¹Kweni chakudanga, reka ndikuphalire ivyo vili kulembeka mu Buku la Unenesko. Kulije na yumoza wakulimbana nane mu vinthu ivi, kweni Mikayele pera, mungelo wako.”