Read new_tumbuka_bible Daniyele 11 Bible Online

Daniyele 11 - new_tumbuka_bible bible

Daniyele 11

¹Ndipo ine, mu chirimika chakudanga cha kuwusa kwa Dariyusi muMede nkhimilira kuti ndimukhwimiske na kumuvikirira iyo.

²Sono icho nditi tikuphalire ndi cha unenesko. Mungelo yura wakati, “Kwamkuŵako ŵakaronga ŵanyakhe ŵatatu mu charu cha Peresiya. Wa chinayi wamkuŵako uyo wamkuŵa musambazi chomene kuruska ŵanyakhe wose. Para uyu waŵa na nkhongono zinandi chifukwa cha usambazi wakhe, wamkuwuska wose kuti ŵalimbane na ufumu wa ŵaGriki.”

³“Pamanyuma kwamkuŵako karonga uyo wamkuŵa wankhongono chomene. Iyo wamkuwusa ufumu ukuru, ndipo wamkuchita chose icho wakukhumba.

⁴Para ufumu wakhe wamkuŵa wankhongono, wamkubwanganduka na kumwalalikira ku mphepo zinayi. Ŵa mu mphapu yakhe kuti ndiwo ŵamkuhara ufumu uwu chara, nesi mazaza ghakhe kuti ghamkulingana na ghakhe chara, pakuti ufumu wakhe wamkupankhuka na kupika ku ŵanthu ŵanyakhe.

⁵“Karonga wa charu cha Eguputo wamkuŵa wankhongono, kweni yumoza wa ŵararaŵarara ŵa ŵasilikari ŵakhe wamkuŵa wankhongono kuruska iyo, ndipo wamkuwusa malo ghakuru.

⁶Pamanyuma pa virimika vinandi, karonga wa charu cha Eguputo wamkuchita ubwezi na karonga wa charu cha Siriya, ndipo kuti paŵe mutende pakati pawo, karonga wa charu cha Eguputo wamkupereka mwana wakhe mwanakazi kwa karonga wa charu cha Siriya kuŵa muwoli wakhe. Kweni kuti chamkwandula kanthu chara, ndipo karonga yura na mphapu yakhe kuti ŵamkurutilira chara. Mwanakazi yura, mufumu wakhe, mwana wakhe na ŵateŵeti ŵakhe, wose pamoza ŵamkuperekeka ku ŵarwani.

⁷Pamanyuma pa vyeneivi yumoza wa ŵabali ŵa mwanakazi uyu wamkuŵa karonga. Iyo wamkunjira mu charu cha Siriya na kurwa nacho nkhondo ndipo wamkuŵathereska na kupoka malinga gha karonga.

⁸Ndipo ivyo wamkupoka wamkwiza navyo ku charu cha Eguputo pamoza na vikozgo vya ŵachiuta ŵawo, ndiposo na viteŵetero vyawo vyakuzirwa vya siliva na vya golide. Sono pamanyuma pa virimika vinandi, wamkureka kwiza na nkhondo kwa karonga wa charu cha Siriya.

⁹Pamanyuma pa ichi, karonga wa charu cha Siriya wamkwiza na nkhondo ku charu cha Eguputo, kweni wamkutondeka na kuwerera ku charu chakhe.

¹⁰“Ŵana ŵa karonga wa charu cha Siriya ŵamkunozgekera nkhondo na kuwunganya wumba ukuru wa ŵasilikari. Wose ŵamkwiza nga ndi chigumura na kurwa nkhondo na ufumu wa charu cha Eguputo mpaka ŵamkufika ku linga lakhe.

¹¹Sono karonga wa charu cha Eguputo wamkuŵa mukari chomene, ndipo wamkuwuka kuruta kuya karwa nkhondo na karonga wa charu cha Siriya pamoza na wumba wakhe ukuru wa ŵasilikari na kuŵathereska.

¹²Para wumba ukuru wa ŵasilikari wathereskeka, karonga wa charu cha Eguputo wamkujikuzga, ndipo wamkukoma ŵanthu vikwivikwi, kweni kuti wamkurutilira kuŵatonda chara.

¹³“Pakuti karonga wa charu cha Siriya wamkuwukaso na kuwunganya wumba ukuru chomene wa ŵasilikari kuruska wakudanga. Ndipo pamanyuma pa virimika vinandi wamkwizaso na wumba wakhe ukuru ura wa ŵasilikari pamoza na mahomwa gha nkhondo ghanandinandi kuti warwe nayo nkhondo.

¹⁴Mu nyengo yeneyira ŵanandi ŵamkumuwukira karonga wa charu cha Eguputo, ndipo ŵanji ŵa vivulupi mukati mu ŵanthu ŵako iwe Daniyele ŵamkumugarukira chifukwa cha kufiskika kwa mboniwoni iyi, kweni ŵamkutondeka.

¹⁵Penepapo karonga wa charu cha Siriya wamkwiza na kuzingirizga msumba wa malinga ndipo wamkuwupoka. Ŵasilikari ŵa karonga wa charu cha Eguputo kuti ŵamkuchintha chara, nanga ŵangaŵa ŵasilikari ŵakhe ŵakusoreka, kuti ŵamkuŵa na nkhongono kuti ŵachinthe chara.

¹⁶Ŵasilikari ŵa charu cha Siriya ŵamkuchita chilichose icho ŵamkukhumba, ndipo pamkuŵavye na yumoza uyo wamkuchintha. Wamkukhazikika mu charu chiweme chomene, ndipo chose chamkuŵa mu mazaza ghakhe.

¹⁷“Karonga wa charu cha Siriya wamkunozgekera kwiza na ŵasilikari ŵakhe ŵanandi ku ufumu wa charu cha Eguputo kuti wawuthereske. Iyo wamkudanga kuchita ubwezi na iyo na kumupa mwana wakhe mwanakazi kuŵa muwoli wakhe. Kweni ivyo wamkunozgera kuti vyamkufiskika chara, nanga kumovwira.

¹⁸Pamanyuma wamkuruta kuya karwa nkhondo na vyaru vya mu mphepete mwa nyanja, na kutora ŵanandi kuŵa ŵazga ŵakhe. Kweni murongozgi wa ŵasilikari wa chilendo wamkumarizga nkhaza zakhe. Nadi wamkuwezgera nkhaza pa iyomwene.

¹⁹Pamanyuma pa ichi, wamkuwerera ku malinga ghakhe gha charu chakhe na chakhe. Kweni wamkukhuŵara na kuthereskeka. Weneuwu ndiwo wamkuŵa umaliro wakhe.

²⁰“Pamanyuma pakhe kwamkuŵa karonga munyakhe uyo wamkutora malo ghakhe. Iyo wamkutuma nduna yakhe kupoka msonkho ukuru ku ŵanthu mwakuti wasazgireko usambazi wa ufumu wakhe. Kweni mu mazuŵa ghachoko waka wamkufwa, mu ukari chara, nesi mu nkhondo.”

²¹“Mu malo mwa iyo kwamkuŵako munthu munyakhe wawakawaka uyo kuti ngwa mu ufumu chara. Mweneuyu ndiyo wamkutora ufumu wakhe. Iyo wamkwiza mwa mabuchibuchi na kutora ufumu mu nthowa ya uryarya.

²²Wumba ukuru wa ŵasilikari awo ŵamkumususka wamkuŵamara wose petu, ndipo musofi mukuru wa phangano nayo wamkukomeka.

²³Kufuma pa nyengo iyo ŵamkuŵira nayo pa wenenawene, iyo wamkuchitira mu upusikizgi. Nanga wangaŵa na ŵanthu ŵachoko waka wamkujitorera mazaza ghakuru.

²⁴Mwakubuchizga wizamkurotokera vigaŵa ivyo nvisambazi chomene mu charu, ndipo wamkuchita icho wiske panji ŵawiskekuru ŵakhe ŵalije kuchichitapo. Pamanyuma wizamkugaŵira ŵanthu awo ŵakumurondezga ivyo wakaphanga, ivyo waskogha ndiposo na usambazi. Wamkunozgera kurotokera malinga ghakukhora, kweni ivi vyamkuchitika kwa kanyengo kachoko waka.

²⁵“Karonga wa charu cha Siriya uyu wati waŵe na chikanga na kuwunjika nkhongono zikuru pakuŵa na ŵasilikari ŵanandi chomene kuti warwe nkhondo na karonga wa charu cha Eguputo. Kweni karonga wa charu cha Eguputo pamoza na chiwuru chakhe chikuru cha ŵasilikari na cha nkhongono, wizamkurwa nayo nkhondo, ndipouli kuti wamkumutonda chara, chifukwa ŵanthu ŵakhe ŵamkumuchitira chiŵembu.

²⁶Ŵakumurongozga ŵeneawo ŵaryanga nayo pamoza ndiwo ŵamkumuwukira. Ŵasilikari ŵakhe ŵamkuparanyika, ndipo ŵanandi ŵamkukomeka.

²⁷Ŵakaronga ŵaŵiri aŵa awo mitima yawo njakutemwa kuchita uheni, ŵamkuryera pamoza na kuyowoya mautesi ku yumoza na munyakhe. Kweni kuti chamkuŵandulira kanthu chara, chifukwa umaliro wawo uti uŵengeko pa nyengo iyo yili kupimika.

²⁸Sono karonga wa charu cha Siriya wamkuwerera ku charu chakhe wali na usambazi unandi chomene, kweni mtima wakhe wamkwimikana na phangano lakupatulika. Ndipo wamkuchita ivyo nvya khumbo lakhe, na kuwerera ku charu chakhe.

²⁹“Pa nyengo yakwimikika, karonga wa charu cha Siriya wamkwizaso ku charu cha Eguputo kuti warwe nacho nkhondo, kweni pa nyengo iyi kuti wamkutonda nga mpha pamanyuma chara.

³⁰Ngaraŵa za ku vyaru vya ku manjiliro gha dazi zamkwiza na kwimikana nayo, ndipo iyo wamkuŵa na wofi na kugongowa. Iyo wamkuwerera nyuma na kukaripa chomene, kuchitira phangano lakupatulika. Wamkuwera na kupulikira awo ŵakusida phangano lakupatulika ili.

³¹Mawumba ghakhe gha ŵasilikari ghamkwiza na kukazuzga Nyumba ya Chiuta ndiposo na linga. Ghamkurekeska sembe yakocha rutaruta. Ndipo ŵamkuŵikamo chanthontho icho chikuchitiska pankhuro.

³²Na mazgu ghakhe ghakumyamyatika wamkukopa awo ŵali kuswa phangano lawo, kweni ŵanthu awo ŵakumumanya Chiuta wawo ŵamkwimilira nganganga na kuchita na nkhongono.

³³Ŵarongozgi awo ŵamkuŵa na vinjeru, ŵamkurongozga ŵanthu ŵanandi. Kweni kwa nyengo yichoko waka ŵamkukomeka mu nkhondo, panji kocheka na moto. Ŵanji ŵamkukoreka umikori na kuskogheka.

³⁴Apo aŵa ŵakusuzgika na kukomeka, ŵamkupokerapo wovwiri uchoko kweni ŵanandi ŵamkujibatikako kwa iwo na mazgu ghakumyamyatika.

³⁵Ŵanji ŵa ŵarongozgi ŵavinjeru aŵa ŵamkunjira mu suzgo kwa kanyengo na kuyezgeka mwakuti ŵaŵe ŵakutozgeka na ŵakung'azima, pakuti umaliro uti wizenge pa nyengo iyo yili kupimika.

³⁶“Karonga wa charu cha Siriya wamkuchita chilichose icho wakukhumba. Wamkujikwezga na kujitunthumura kuti wali pachanya pa chiuta waliyose. Wamkuyowoya matusi ghakofya na kwimikana na Chiuta wa ŵachiuta. Vinthu vyose vyamkuwira makora kufikira pa nyengo iyo Chiuta wamkufiskira ukari wakhe pa iyo, pakuti icho chili kwimikika chikwenera kufiskika.

³⁷Kuti wamkupwererako na ŵachiuta ŵa ŵasekuru ŵakhe chara, panji chiuta uyo ngwa kutemweka na ŵanakazi. Kuti wamkupwererako na chiuta munyakhe chara, pakuti wamkujikuzga yekha kuŵa pachanya pa wose.

³⁸Mu malo mwa ŵeneaŵa, wamkuchindika chiuta wa malinga, chiuta uyo ŵasekuru ŵakhe kuti ŵakamumanya chara, pakupereka golide, siliva, na mawe ghakuzirwa na vyawanangwa vinyakhe mtengo wakuzirwa.

³⁹Wamkurotokera malinga ghakukhora chomene na wovwiri wa chiuta wa chilendo. Wamkuŵachindika chomene ŵanthu awo ŵakumuzomera. Wamkuŵazgora iwo kuŵa ŵarongozgi pa ŵanthu ŵanandi na kuŵagaŵira charu kuŵa njombe yawo.

⁴⁰“Para nyengo ya umaliro ya karonga wa charu cha Siriya yamkuŵa pafupi kumara, karonga wa charu cha Eguputo, wamkwiza na nkhondo kuti warwe nayo karonga wa charu cha Siriya, kweni karonga wa charu cha Siriya wamkulimbana nayo. Iyo wamkwiza mwa nkhongono pakuyegha magareta, mahachi, na ngaraŵa zinandi. Wamkunjira mu vyaru vinandi na kuŵakukura nga ndi chigumura.

⁴¹Wamkunjira mu charu chiweme chomene na kukoma ŵanthu vikwivikwi. Kweni vyaru vya Edomu na Mowabu, na ŵararaŵarara ŵa charu cha ŵaAmoni ŵamkuthaskika.

⁴²Wamkurwa na vyaru vinandi, ndipo charu cha Eguputo kuti chamkupona chara.

⁴³Wamkupoka mausambazi gha golide na gha siliva ndiposo na vinthu vinyakhe vyose vya mtengo wa patali vya mu charu cha Eguputo. Charu cha Libiya na cha Etiyopiya navyo vyamkuŵa pasi pa karonga uyu.

⁴⁴Kweni makani ghakufuma ku mafumiro gha dazi na ku mpoto ghamkumofya. Ntheura wamkufumako uku ndi mukari chomene kuya kakoma na kumara ŵanandi.

⁴⁵Wamkuzenga mahema gha ufumu wakhe pakati pa nyanja na phiri lakupatulika leneili ndakutowa kwakuruska mapiri ghose. Kweni wamkumalira penepapo, ndipo kwamkuŵavye na yumoza uyo wamkumovwira.