Read new_tumbuka_bible Daniyele 12 Bible Online

Daniyele 12 - new_tumbuka_bible bible

Daniyele 12

¹“Pa nyengo yeneyira Mikayele, mungelo murara uyo ndi mulinda wa ŵanthu ŵakwinu wamkwiza. Kwamkuŵa nyengo ya visuzgo, iyo kuti yikaŵako na kale chara, kufuma apo mtundu wa ŵanthu ukalengekera mpaka pa nyengo yeneyira. Kweni pa nyengo yeneyira ŵanthu ŵakwinu ŵamkuthaskika, yose uyo zina lakhe lamkusangika kuti lalembeka mu buku.

²Ŵanandi mwa awo ŵali kugona mu madindi ŵamkuwuka. Ŵanji ŵamkuwukira ku umoyo wa muyirayira, ndipo ŵanyakhe ku kulengeskeka na ku chilango kwa muyirayira.

³Ndipo awo mba vinjeru ŵamkuŵala nga ndi ungweru wa mu mlengalenga. Awo ŵaŵarongozgera ŵanthu ŵanandi ku urunji, ŵamkuŵala nga ndi nyenyezi kwa muyirayira.

⁴“Kweni iwe Daniyele, mazgu agha ughasungilire, ureke kughavumbula ndipo ujare buku kufikira pa nyengo ya umaliro. Ŵanandi ŵamkuchimbilira uku na uku, ndipo mahara ghamkuŵa ghanandi.

⁵“Ntheura ine Daniyele, nkhalaŵiska ndipo nkhawona ŵangelo ŵanyakhe ŵaŵiri ŵimilira, yumoza mu mphepete mwa mronga sirya lino, munyakhe sirya lira.

⁶Ku mungelo uyo wakavwara salu ya bafuta, mweneuyo wakaŵa sirya lira la maji gha mronga ura, nkhamufumba nkhati, ‘Kasi vyakuzizwiska ivi vyamkumara pauli?’

⁷Mungelo uyo wakavwara salu ya bafuta, mweneuyo wakaŵa sirya lira la maji gha mronga ura, wakawuskira muchanya mawoko ghakhe ghaŵiri. Nkhamupulika wakurapa mu zina la uyo ngwamoyo kwa muyirayira, kuti, ‘Chiti chiŵengeko virimika vitatu na hafu. Para visuzgo vyakuwira ŵanthu ŵakupatulika vyamara, vinthu vyose ivi vyamkufiskika.’

⁸“Nkhapulika, kweni kuti nkhapulikiska chara. Ntheura nkhafumba nkhati, ‘Mwe sekuru wane, kasi vinthu ivi vizamkumara uli?’ ”

⁹Iyo wakandizgora wakati, “Iwe Daniyele, rutanga waka, pakuti mazgu agha ghati ghaŵenge ghakubisika na ghakumatika mpaka pa nyengo ya umaliro.

¹⁰Ŵanthu ŵanandi ŵamkuyezga kujitozga ndipo ŵamkuŵa ŵakutozgeka nadi, ŵambula kukazuzgika na kalikose. Kweni ŵaheni ŵamkurutilira kuchita uheni, ndipo palije na yumoza wa iwo uyo wamkupulikiska. Kweni awo mba vinjeru pera ndiwo ŵamkupulikiska.

¹¹Kufuma pa nyengo iyo sembe yakocha ya zuŵa na zuŵa yamkurekeskekera, kufikira apo chanthontho icho chikuchitiska pankhuro chamkwimikikira, pamkuŵa mazuŵa 1,290.

¹²Ngwakutumbikika munthu uyo wakulindizga, mpaka mazuŵa 1,335 ghamare.

¹³Kweni, iwe Daniyele, uŵe wakugomezgeka mpaka ku umaliro. Penepapo iwe wizamkufwa, kweni pa umaliro wa mazuŵa wamkuwuka kuti upokere njombe yako.”