Read new_tumbuka_bible Daniyele 2 Bible Online

Daniyele 2 - new_tumbuka_bible bible

Daniyele 2

¹Nebukadinezara wakalota maloto mu chirimika cha chiŵiri cha kuwusa kwakhe. Iyo wakasuzgika chomene mu mzimu ndipo wakatondeka na kugona tulo.

²Ntheura karonga wakalangula kuti ŵamayere, ŵawukwi, ŵamaula ndiposo na ŵamanyinyenyezi ŵa charu cha Babuloni ŵachemeke kwiza kamwandulira karonga maloto ghakhe. Penepapo ŵanthu ŵara ŵakanjira na kwimilira panthazi pa karonga.

³Ndipo iyo wakati kwa iwo, “Ndangulota maloto, ndipo mzimu wane ukusuzgika kuti ndighamanye maloto agha.”

⁴Penepapo ŵaBabuloni ŵakayowoya kwa karonga mu chiAramayiki, “Imwe karonga muŵenge na umoyo utali! Mutiphalire ta ŵateŵeti ŵinu maloto ghinu, ndipo titi timwandulirani kang'anamuliro kakhe.”

⁵Karonga wakaŵazgora ŵaBabuloni ŵara wakati, “Ichi ndadumula ine nchakuti: Usange mulije kundivumbulira maloto na kang'anamuliro kakhe, viŵaro vyinu viti vidumulikenge tuchokotuchoko, ndipo nyumba zinu ziŵenge mahami.

⁶Kweni usange mwandivumbulira maloto na kang'anamuliro kakhe, ine nditi ndimupani vyawanangwa, njombe ndiposo na nchindi zikuru. Ipo mundivumbulire maloto na kang'anamuliro kakhe.”

⁷Ŵakazgora kachiŵiri ŵakati, “Imwe karonga, mutiphalire ta ŵateŵeti ŵinu maloto, ndipo titi tivumbule kang'anamuliro kakhe.”

⁸Karonga wakazgora wakati, “Nkhupanikizga nadi kuti mukukhumba kutayiramo waka nyengo, chifukwa mwawona kuti mazgu agha ndadumula ine ngambula kusinthika.

⁹Kweni usange mulije kundiphalira maloto pali weruzgi umoza pera kwa imwe mose. Mwazomerezgana kuti mundiphalire mazgu gha utesi mpaka nyengo yimalirengemo waka. Ipo sono ndivumbulirani maloto ghane ndipo ine nditi ndimanye kuti mungavumbulaso na kang'anamuliro kakhe.”

¹⁰ŴaBabuloni ŵakamuzgora karonga ŵakati, “Kulije munthu pano pa charu mweneuyo wangafiska icho karonga wakukhumba, pakuti kulije nanga ndi karonga mukuru na wa mazaza uyo wali kufumbapo chinthu cha ntheura ku ŵamayere, ŵawukwi, panji ku ŵaBabuloni.

¹¹Chinthu icho karonga wakukhumba nchinonono, ndipo kulije na yumoza uyo wangamuvumbulira, kweni ŵachiuta pera awo kuti ŵakukhara pamoza na ŵanthu chara.”

¹²Pa chifukwa ichi, karonga wakakaripa na kukweŵeskeka chomene ndipo wakalangula kuti ŵanthu wose ŵavinjeru ŵa mu charu cha Babuloni wakomeke.

¹³Ntheura languro la karonga likapharazgika kose kuti ŵavinjeru ŵakomeke, ndipo ŵakamupenja Daniyele na ŵawukirano ŵanyakhe kuti nawo ŵakomeke.

¹⁴Penepapo Daniyele wakazgora mu mahara na vinjeru kwa Ariyoki, murongozgi wa ŵasilikari ŵa karonga, mweneuyo wakatumika kuya kakoma ŵavinjeru ŵa mu charu cha Babuloni.

¹⁵Daniyele wakamufumba Ariyoki wakati, “Kasi nchifukwa uli karonga waŵikako languro linonono ntheura?” Ariyoki wakamuphalira Daniyele makani ghose.

¹⁶Ntheura Daniyele wakaruta kuya kamuŵeya karonga kuti wamupe nyengo, mwakuti wamuvumbulire ching'anamulo cha maloto ghakhe.

¹⁷Penepapo Daniyele wakaruta ku nyumba yakhe ndipo wakaŵaphalira makani agha ŵanyakhe aŵa, Hananiya, Mishayele na Azariya.

¹⁸Wakaŵaphalira kuromba wezi kwa Chiuta wa kuchanya kuti waŵavumbulire cha muchindindi ichi, mwakuti Daniyele na ŵanyakhe ŵareke kukomeka pamoza na ŵavinjeru ŵa ku Babuloni.

¹⁹Ntheura cha muchindindi chikavumbulika kwa Daniyele mu mboniwoni na usiku. Penepapo Daniyele wakachindika Chiuta wa kuchanya.

²⁰Daniyele wakati, “Lichindikike zina la Chiuta kwa muyirayira swii, chifukwa vinjeru na nkhongono nvyakhe.

²¹Ndiyo wakusintha zinyengo na virimika. Wakukhizga ŵakaronga na kwimika ŵakaronga. Wakupa vinjeru ku ŵavinjeru na mahara kwa awo ŵakumanya.

²²Wakuvumbula vinthu vya kunyang'amira na vya muchindindi. Wakumanya ivyo vili mu chisi, ndipo kungweruka kukukhara na iyo.

²³Kwa imwe, Mwe Chiuta wa ŵasekuru, nkhupereka viwongo na marumbo, chifukwa mwandipa vinjeru na nkhongono. Mwandivumbulira sono icho tikamurombani imwe, pakuti mwativumbulira ise makani gha karonga.”

²⁴Pa chifukwa ichi Daniyele wakaruta kwa Ariyoki, uyo karonga wakamwimika kukoma ŵavinjeru ŵa mu charu cha Babuloni. Wakamuphalira wakati, “Ungakomanga ŵavinjeru ŵa mu charu cha Babuloni, urute nane panthazi pa karonga, ndipo ndamkumuvumbulira iyo kang'anamuliro ka maloto ghakhe.”

²⁵Penepapo Ariyoki wakiza nayo Daniyele luŵiroluŵiro panthazi pa karonga, ndipo wakati kwa iyo, “Ine ndamusanga mweneuyo wati wavumbule kang'anamuliro. Iyo ndi yumoza wa ŵanthu mukati mu ŵamikori ŵa ku Yuda.”

²⁶Karonga wakamufumba Daniyele, mweneuyo zina la chiBabuloni wakaŵa Beliteshazara, wakati, “Kasi nadi ungandivumbulira icho nkhalota na kang'anamuliro kakhe?”

²⁷Daniyele wakamuzgora karonga wakati, “Palije munthu na yumoza mu ŵamahara, ŵamaula, ŵawukwi, ŵamayere panji ŵamanyinyenyezi uyo wangamuvumbulirani imwe icho mwafumba.

²⁸Kweni waliko Chiuta kuchanya mweneuyo wakuvumbula vya muchindindi. Iyo, wamuvumbulira Karonga Nebukadinezara vinthu ivyo vizamkuŵako mu mazuŵa gha kunthazi. Maloto ghinu na mboniwoni, ivyo vikiza kwa imwe apo mukagona pa chitara ndi ivi:

²⁹“Mwe Karonga, maghanoghano agho ghakamwizirani apo mukagona pa chitara ghakaŵa gha vinthu ivyo vyamkufiskika mu mazuŵa gha kunthazi. Chiuta mweneuyo wakuvumbula vya muchindindi wamurongorani ivyo vyamkuchitika.

³⁰Uvumbuzi uwu wiza kwa ine chifukwa chakuti ndili na vinjeru kujumpha ŵanthu wose chara, kweni kuti imwe mumanye kang'anamuliro ndiposo na maghanoghano gha mu mtima winu.”

³¹“Mwe Karonga, mukawona chikozgo chikuru. Chikozgo ichi, cheneicho chikaŵa chikuru na chakung'azima chomene, chikimilira panthazi pinu, ndipo kawonekero kakhe kakaŵa kakofya.

³²Mutu wa chikozgo ichi ukaŵa wa golide lakwengeka makora, nganga na mawoko ghakhe vikaŵa vya siliva, nthumbo na vigha vyakhe vikaŵa vya mkuŵa,

³³malundi ghakhe ghakaŵa gha chisulo, ndipo vikandiro vyakhe kurwande vikaŵa vya chisulo ndiposo kurwande vya dongo.

³⁴Apo mukalaŵiskanga chikozgo, libwe likagumuka kwambula kukhwaskika na woko la munthu, likatimba chikozgo pa vikandiro vyakhe, ivyo vikaŵa vya chisulo na dongo, na kuviteketa tuchokotuchoko.

³⁵Penepapo chisulo, dongo, mkuŵa, siliva na golide vyose pamoza vikateketeka tuchokotuchoko, ndipo vikazgoka nga ndi mwerero wa pa luwugha mu nyengo ya chihanya. Mphepo yikaviwuruskira kutali, kwambula kurekapo kalikose. Kweni libwe lira likateketa chikozgo chira likakura na kuzgoka phiri likuru leneilo likatandazgika pa charu chose cha pasi.”

³⁶“Agha ndiwo ghakaŵa maloto ghinu. Sono titi timuphalirani kang'anamuliro kakhe.

³⁷Mwe karonga, karonga wa ŵakaronga, kwa imwe Chiuta wa kuchanya wapereka ufumu, nkhongono, mazaza na uchindami.

³⁸Iyo waŵika mu mawoko ghinu ŵanthu, vinyama vya mu thengere na viyuni vya mudera, kuti muŵe na mazaza pa vyose ivi kose uko vikukhara. Mutu wa golide ura ndimwe.

³⁹Pamanyuma pa ufumu winu pawukenge ufumu unyakhe uchokoko kwa winu. Pamkwizaso ufumu unyakheso wa chitatu wa mkuŵa, uwo wamkuwusa charu chose cha pasi.

⁴⁰Ndipo kwamkuwukaso ufumu wa chinayi wa nkhongono nga ndi chisulo, pakuti chisulo chikuteketa tuchokotuchoko vinthu vyose. Nga ndi umo chisulo chikutekenyulira, ufumu uwu wamkutekenyura maufumu ghanyakhe ghose.

⁴¹Ndipo nga ndi umo mukawonera vikandiro na minwe kurwande vya dongo, kurwande vya chisulo, chikung'anamula kuti ufumu wamkuŵa wakugaŵikana. Mu ufumu wa chinayi uwu mwamkuŵamo nkhongono ya chisulo, nga ndi umo mukawonera kuti chisulo chasazgikana na dongo.

⁴²Ndipo nga ndi umo minwe ya vikandiro kurwande vya chisulo na kurwande vya dongo, ndimo ufumu uwu uti uŵirenge kurwande wa nkhongono, kurwande wambula kukhora.

⁴³Nga ndi umo mukawonera chisulo chakusazgikana na dongo lakutepeta, ntheura ndimo ŵanthu ŵamkusazgikirana mu zinthengwa, kweni kuti ŵamkubatikana chara, nga ndi umo chisulo na dongo vingagumaniskika pamoza chara.

⁴⁴Ndipo mu mazuŵa gha ŵakaronga awo, Chiuta wa kuchanya wamkukhazikiska ufumu weneuwo kuti wamkumara chara, nanga ndi mazaza ghakhe kuti ghamkuŵikika mu mawoko ghanyakhe chara. Ufumu uwo wamkutekenyura tuchokotuchoko maufumu ghose ghanyakhe na kughamazga. Kweni ufumu ura wamkukhalirira kwa muyirayira.

⁴⁵Ichi ndicho ching'anamulo cha libwe lira likagumuka kufuma ku phiri kwambula kukhwaskika na woko la munthu leneilo imwe mukaliwona likatekenyura tuchokotuchoko chisulo, dongo, mkuŵa, siliva na golide. Chiuta mukuru wavumbula kwa imwe karonga ivyo vizamkuwoneka. Maloto agha ndigho mukalota nadi, ndipo kang'anamuliro kakhe nkhenecho nadi.”

⁴⁶Penepapo Karonga Nebukadinezara wakawa kavunama na kumulambira Daniyele, ndipo wakalangula kuti sembe na vyakununkhira viperekeke kwa Daniyele.

⁴⁷Karonga wakati kwa Daniyele, “Nkhwakuneneska kuti Chiuta winu ndi Chiuta wa ŵachiuta ndiposo ndi Fumu ya ŵakaronga, na kuti ndiyo wakuvumbula vya muchindindi pakuti imwe mwamanya kuvumbula cha muchindindi ichi.”

⁴⁸Penepapo karonga wakamupa Daniyele nchindi zikuru na vyawanangwa vyakuzirwa vinandi. Wakamwimika kuŵa nduna mu chigaŵa chose cha Babuloni, ndiposo kuti waŵe murongozgi pa ŵavinjeru wose.

⁴⁹Chifukwa cha pempho la Daniyele, karonga wakimika Shadireki, Meshaki na Abedinego pachanya pa milimo ya chigaŵa cha Babuloni. Kweni Daniyele wakakhara pa nyumba ya ufumu.