Read new_tumbuka_bible Daniyele 3 Bible Online

Daniyele 3 - new_tumbuka_bible bible

Daniyele 3

¹Karonga Nebukadinezara wakapanga chikozgo cha golide, icho utali wakhe chikaŵa mamita 27 ndipo mu usani chikaŵa mamita pafupi ghatatu. Iyo wakachimika mu chidika cha Dura, mu chigaŵa cha Babuloni.

²Penepapo karonga wakachema ŵimiliri ŵakhe, ŵeruzgi ŵa vyaru, nduna, ŵarongozgi, ŵasungi chuma, ŵeruzgi ŵa zimphara, ŵamarango, na wose ŵarara ŵa mu vigaŵa kuti ŵawungane pamoza mwakuti ŵaŵepo pakupatuliska chikozgo icho iyo Karonga Nebukadinezara wakimika.

³Ntheura wose awo ŵakachemeka ŵakawungana pakupatuliska chikozgo icho Karonga Nebukadinezara wakimika. Wose ŵakimilira panthazi pa chikozgo.

⁴Penepapo nthumi yikachemerezga na mazgu ghakuru yikati, “Imwe mwa ŵanthu mose, mwa mafuko ghose, na viyowoyero vyose, mukulangulika kuti,

⁵para mukupulika waka kulira kwa zimbata, ŵafyoliro, ŵabango, mityangara, viding'indi, mangorongondo na kimbiro ka mitundumitundu, mukwenera kuwa pasi na kuchilambira chikozgo cha golide icho Karonga Nebukadinezara wimika.

⁶Yose uyo wakureka kuwa pasi na kulambira chikozgo ichi, maluŵiro wati waponyeke mu ng'anjo ya moto.

⁷Ntheura para ŵanthu wose ŵakati ŵapulika waka kulira kwa zimbata, ŵafyoliro, ŵabango, mityangara, viding'indi, mangorongondo na kimbiro ka mitundumitundu, ŵakawa pasi na kulambira chikozgo cha golide chira, icho Nebukadinezara wakimika.”

⁸Pa nyengo iyi ŵaBabuloni ŵanji ŵakasangirapo mwaŵi ndipo ŵakiza kwa karonga na mrandu wakuŵapacha ŵaYuda.

⁹Iwo ŵakayowoya kwa Karonga Nebukadinezara ŵakati, “Mwe karonga, muŵenge na umoyo utali!

¹⁰Imwe, Mwe karonga, muli kuŵika languro lakuti, munthu yose uyo wakupulika kulira kwa zimbata, ŵafyoliro, ŵabango, mityangara, viding'indi, mangorongondo na kimbiro ka mitundumitundu, wakwenera kuwa pasi na kuchilambira chikozgo cha golide.

¹¹Ndipo yose uyo wakureka kuwa pasi na kulambira chikozgo, wati waponyeke mu ng'anjo ya moto.

¹²Pali ŵaYuda ŵanji awo muli kŵimika kuŵa pachanya pa milimo ya chigaŵa mu Babuloni. Ŵanthu aŵa ndi Shadireki, Meshaki na Abedinego. Ŵanthu aŵa, Mwe karonga, kuti ŵakumupulikirani imwe chara. Iwo kuti ŵakuteŵetera ŵachiuta ŵinu chara, nanga nkhulambira chikozgo cha golide icho muli kwimika.”

¹³Mu ukari na mu kutukutwa, Nebukadinezara wakalangula kuti Shadireki, Meshaki na Abedinego ŵatoreke na kwiza nawo kwa iyo. Ntheura ŵanthu aŵa ŵakiza nawo panthazi pa karonga.

¹⁴Nebukadinezara wakaŵafumba wakati, “Kasi mbunenesko, iwe Shadireki, Meshaki na Abedinego, kuti mukuteŵetera ŵachiuta ŵane chara nanga nkhulambira chikozgo cha golide icho nkhimika?

¹⁵Sono para mukupulika kulira kwa zimbata, ŵafyoliro, ŵabango, mityangara, viding'indi, mangorongondo na kimbiro ka mitundumitundu, ndipo usange mwanozgeka kuwa pasi na kulambira chikozgo icho nkhimika, nchiweme nadi kwa imwe. Kweni para mwareka kuchilambira, maluŵiro muti muponyekenge mu ng'anjo ya moto. Kasi ndi chiuta nju uyo wangamuthaskani ku mawoko ghane?”

¹⁶Shadireki, Meshaki na Abedinego ŵakazgora ŵakati, “Mwe Karonga Nebukadinezara, nchakwenerera chara kuti ise tijivikirire pa makani agha.

¹⁷Usange kuli ntheura, Chiuta withu uyo tikumuteŵetera wakumanya kutithaska ise ku ng'anjo ya moto yakofya. Ndiyo wamkutithaska ku mawoko ghinu.

¹⁸Kweni para wangareka kutithaska, chimanyikwe kwa imwe, Mwe karonga, kuti titi titeŵeterenge ŵachiuta ŵinu chara, nesi kulambira chikozgo cha golide icho muli kwimika.”

¹⁹Penepapo Nebukadinezara wakazura na ukari, ndipo chisko chakhe chikarongora kuti wakwiyira Shadireki, Meshaki na Abedinego. Wakalangula kuti ng'anjo yisonkheke kankhonde na kaŵiri kuruska nyengo zose.

²⁰Ndipo wakalangula vinkhara vinji vya ŵasilikari ŵakhe kuti vikake Shadireki, Meshaki na Abedinego ndipo viŵaponye mu ng'anjo ya moto.

²¹Ŵanthu ŵara ŵakakakika uku ŵavwara malaya ghawo, minjilira yawo, visoti vyawo, na vyakuvwara vyawo vinyakhe ndipo ŵakaponyeka mu ng'anjo ya moto.

²²Sono chifukwa languro la karonga likaŵa lankhongono ndipo ng'anjo nayo yikocha chomene, dimi la moto likakoma ŵasilikari ŵara awo ŵakalangulika kuponya Shadireki, Meshaki na Abedinego.

²³Ndipo ŵanthu ŵatatu ŵara Shadireki, Meshaki na Abedinego, ŵakawira mu ng'anjo ya moto uku mbakukakika.

²⁴Penepapo Karonga Nebukadinezara, wakazizwa ndipo wakawuka maluŵiro. Iyo wakafumba ŵarongozgi ŵakhe wakati, “Asi tanguponyamo ŵanthu ŵatatu ŵakukakika mu ng'anjo ya moto?” Iwo ŵakamuzgora ŵakati, “Inya ndi ntheura, Mwe karonga.”

²⁵Karonga wakatiso, “Kweni nkhuwona ŵanthu ŵanayi ŵakusutulika, ŵakwenda mu moto. Ŵanthu aŵa kuti ŵapwetekeka na moto chara, ndipo mawonekero gha wa chinayi ghakuwoneka nga ndi mwana wa ŵachiuta.”[1]

²⁶Penepapo Nebukadinezara wakasenderera ku muryango wa ng'anjo ya moto, ndipo wakachemerezga wakati, “Shadireki, Meshaki na Abedinego, ŵateŵeti ŵa Chiuta Chikurukuru fumani, mwize kuno!” Ntheura Shadireki, Meshaki na Abedinego ŵakafumamo mu ng'anjo ya moto.

²⁷Penepapo ŵimiliri ŵakhe, ŵeruzgi ŵa vyaru, nduna, na ŵarongozgi ŵakawungana pamoza, ndipo ŵakawona kuti moto ukaŵawocha chara. Sisi la ku mitu yawo likaŵawuka chara, vyakuvwara vyawo kuti vikaphya chara, nanga ndi mathupi ghawo kuti ghakaŵa na sungu la moto chara.

²⁸Nebukadinezara wakati, “Wachindikike Chiuta wa Shadireki, Meshaki na Abedinego uyo wakatuma mungelo wakhe kuthaska ŵateŵeti ŵakhe. Iwo ŵakagomezga mwa iyo ndipo ŵakakana kupulikira dango la karonga, na kupereka mathupi ghawo ku ng'anjo ya moto kuruska kuteŵetera panji kusopa chiuta yunji, kweni Chiuta wawo pera.

²⁹Ntheura nkhwimika dango lakuti, ‘Munthu yose, manyi ngwa fuko uli, panji wakuyowoya chiyowoyero cha mtundu uli, usange wakutuka Chiuta wa Shadireki, Meshaki na Abedinego, wadumulike tuchokotuchoko, ndipo nyumba yakhe yiwiskikire pasi na kuzgoka chizara, chifukwa kulije Chiuta munyakhe uyo wangathaska ntheura.’ ”

³⁰Penepapo karonga wakakwezga Shadireki, Meshaki na Abedinego kuŵa ŵararaŵarara mu chigaŵa cha Babuloni.