Read new_tumbuka_bible Daniyele 4 Bible Online

Daniyele 4 - new_tumbuka_bible bible

Daniyele 4

¹Karonga Nebukadinezara wakatuma uthenga uwu ku ŵanthu ŵa mitundu yose, ŵa mafuko ghose, na ŵa viyowoyero vyose, awo ŵakukhara mu charu chose cha pasi: Mutende wakuzara uŵenge namwe.

²Nkhuwona kuti nchiweme kumwandulirani imwe vimanyikwiro vya minthondwe na vyakuzukumiska ivyo Chiuta Chikurukuru wandichitira ine.

³Nawo mbukuru wa vimanyikwiro vyakhe, ndipo nazo ndi nkhongono za vyakuzukumiska vyakhe! Ufumu wakhe ndi ufumu wa muyirayira, muwuso wakhe ngwa miwiro na miwiro.

⁴Ine Nebukadinezara, nkhapumulanga mu nyumba yane ya ufumu ndipo nkhaŵa wakukondwa na usambazi wane.

⁵Kweni nkhalota maloto ghakofya. Apo nkhagona pa chitara chane maghanoghano ghane na mboniwoni izo nkhawonanga mu mutu wane vikandichiruska.

⁶Ntheura nkhalangula kuti ŵavinjeru wose ŵa mu charu cha Babuloni ŵachemeke kuti ŵize panthazi pane, mwakuti ŵandiphalire kang'anamuliro kakhe ka maloto ghane.

⁷Ntheura ŵamayere, ŵamaula, ŵawukwi, na ŵamanyinyenyezi ŵa charu cha Babuloni ŵakiza. Nkhaŵandulira maloto ghane, kweni pakaŵavye na yumoza wa iwo wakamanya kundiphalira kang'anamuliro kakhe.

⁸Pa umaliro Daniyele wakiza panthazi pane. Iyo wakathyika kuti, Beliteshazara, ilo ndi zina la chiuta wane, mwa mweneuyo muli mzimu wa ŵachiuta ŵakupatulika. Nkhamwandulira maloto ghane nkhati,

⁹“Iwe Beliteshazara, murongozgi wa ŵamayere, ine nkhumanya kuti mzimu wa ŵachiuta ŵakupatulika uli mwa iwe ndipo kulije cha muchindindi icho nchinonono kwa iwe. Agha ndigho maloto ghane gheneagho nkhawona. Undiphalire kang'anamuliro kakhe.

¹⁰Mboniwoni izo nkhawona apo nkhagona pa chitara chane ndi izi: Nkhawona khuni litali chomene, ilo likaŵa pakatikati pa charu cha pasi.

¹¹Khuni ili likakura ndipo likaŵa lankhongono. Songa yakhe yikafika ku mtambo kuchanya, ndipo likawonekanga mpaka ku mphererekezgo za charu chose cha pasi.

¹²Mahamba ghakhe ghakaŵa ghakutowa, vipambi vyakhe navyo vikaŵa vinandi. Mwenemumo mukaŵa chakurya cha vyose. Vinyama vya mu thengere vikapumuliranga mu mufwiri wakhe, ndipo viyuni vya mudera vikakharanga mu minthavi yakhe. Vilengiwa vyose vikaryanga vya mu khuni leneili.”

¹³“Vinyakhe ivyo nkhawona mu mboniwoni apo nkhagona pa chitara chane ndi ivi: Nkhawona mungelo wakupatulika yura, uyo wakikhanga kufuma kuchanya.

¹⁴Iyo wakachemerezga na mazgu ghakuru wakati, ‘Dumulirani pasi khuni ili na kuphatako minthavi yakhe, pururani mahamba ghakhe na kuparanya vipambi vyakhe. Vinyama vichimbiremo mu mufwiri wakhe, ndipo viyuni vifumemo mu minthavi yakhe.

¹⁵Kweni chisinkho na misisi yakhe uvireke mu dongo, uchikake na unyoro wa chisulo na mkuŵa, pakati pa utheka wakutikitira. Umureke kuti wanyewenge na jumi la kuchanya, wasanganenge na vinyama pakurya utheka.

¹⁶Maghanoghano ghakhe ghareke na kuŵa nga nga munthu, ndipo maghanoghano gha chinyama ndigho ghapike kwa iyo, mpaka virimika vinkhonde na viŵiri vifiskike.’ ”

¹⁷“Weruzgi ukupharika na ŵalinda, udumuliro ukuperekeka na ŵangelo, mwakuti ŵamoyo ŵamanye kuti Chiuta Chikurukuru ndiyo wakuwusa maufumu gha ŵanthu. Iyo wangamanya kupereka kwa uyo wakukhumba ndipo wakuŵapa wakuŵawusa nanga wangaŵa wakuyuyurika na ŵanthu.”

¹⁸“Maloto agha ndigho ine, Karonga Nebukadinezara nkhalota. Sono iwe Beliteshazara, ndiphalire ching'anamulo chakhe, pakuti palije na yumoza wa vinjeru mu ufumu wane uyo wangandiphalira ching'anamulo chakhe, kweni iwe pera, chifukwa mzimu wa ŵachiuta ŵakupatulika uli mwa iwe.”

¹⁹Penepapo Daniyele, uyo wakathyikaso kuti Beliteshazara, wakafipa mtima kwa ka nyengo, ndipo maghanoghano ghakhe ghangakuchuruskanga chara. Kweni karonga wakati, “Beliteshazara, maloto agha na kang'anamuliro kakhe kareke kukuchiruska.” Beliteshazara wakazgora wakati, “Sekuru wane, maloto na kang'anamuliro ka maloto kakhe kaŵenge ka awo ŵakumutinkhani na ku ŵarwani ŵinu mphanyi kanguŵa kaweme!

²⁰Khuni ilo mukawona likukura kuŵa lankhongono ili leneilo songa zakhe zikufika na ku mtambo, likawonekanga kutali ku mphererekezgo zose za charu cha pasi.

²¹Khuni ili likaŵa na mahamba ghakutowa na vipambi vinandi, ndipo likarera ŵanthu ŵa charu chose. Vinyama vyose vya mu thengere vikakharanga mu mufwiri wakhe ndipo viyuni vya mudera vikazenganga vivimbo mu minthavi yakhe.

²²Mwe karonga, imwe ndimwe khuni lenelira. Imwe mwakura ndipo mwaŵa ŵankhongono. Ukuru winu wakura ndipo ukufika na ku mtambo. Ufumu winu watandazgika mpaka ku mphererekezgo zose za charu pasi.

²³“Imwe karonga, mukawona mungelo, wakupatulika yura, wakwikha kufuma kuchanya uku wakuchemerezga na mazgu ghakuru, wakuti, ‘Dumulirani pasi khuni ili na kulisakaza. Chisinkho na misisi yakhe muvireke mu dongo. Uchikake na chisulo ndiposo na mkuŵa pakati pa utheka wakutikitira. Umureke kuti wanyewenge na jumi la kuchanya, ndipo waryenge utheka pamoza na vinyama. Maghanoghano ghakhe ghati ghareke kuŵa nga ndi gha munthu, kweni wapike maghanoghano gha chinyama, mpaka virimika vinkhonde na viŵiri vifiskike.’ ”

²⁴“Kang'anamuliro kakhe imwe karonga nkheneaka: Uwu ndi weruzgi uwo wafuma kwa Chiuta Chikurukuru weneuwo ukukhwaska imwe.

²⁵Imwe karonga muti mufumiskikengemo mukati mu ŵanthu, mwamkukhara pamoza na vinyama vya mu thengere. Muti muryenge utheka nga ndi nkhambako, ndipo mwamkuzumbwa na jumi la kuchanya, mpaka virimika vinkhonde na viŵiri vijumphe, musuke mumanye kuti Chikurukuru ndiyo wakuwusa mafuko ghose, ndipo wakupereka urongozgi kwa waliyose uyo wakukhumba.

²⁶Nga ndi umo kukalangurikira kusida chisinga pamoza na misisi yakhe, ufumu winu uti uŵengeko ndipera mwakuti mumanye kuti kuchanya ndiko kukuwusa.

²⁷Ntheura imwe, karonga urongozgi wane kwa imwe muwuzomerezge. Uheni mu ureke ndipo mwambe kuchita ivyo ndi vyakunyoroka. Mureke ubendezi pakuŵa lusungu ku ŵakunyekezgeka, mwakuti panji nyengo yinu yakuŵa mu chimango yingarutilirako.”

²⁸Vyose ivi vikachitikira Karonga Nebukadinezara.

²⁹Pa umaliro wa myezi 12 karonga wakendanga pachanya pa mtenje wa nyumba ya ufumu wa charu cha Babuloni.

³⁰Karonga wakati, “Asi uyu ndi Babuloni, msumba ukuru uwo ine ndawuzenga na nkhongono zane kuŵa chikhazi cha ufumu wane na kuŵaso uchindami wa ufumunkhuru wane?”

³¹Karonga wachali kuyowoya, kukiza mazgu kufuma kuchanya ghakati, “Iwe Karonga Nebukadinezara, pulika icho nkhuyowoya kwa iwe. Ufumu wafumiskikako kwa iwe.

³²Uti uchimbizgike kufumamo mukati mu ŵanthu, wamkukhara na vinyama vya mu thengere, na kurya utheka nga ndi ng'ombe. Virimika vinkhonde na viŵiri vyamkujumpha, usuke umanye kuti Chikurukuru ndiyo wakuwusa maufumu gha ŵanthu, ndipo iyo wangapereka ufumu kwa waliyose uyo wangakhumba.”

³³Nyengo yeneiyo mazgu agha ghakafiskika kwa Nebukadinezara. Iyo wakachimbizgika kufumamo mwa ŵanthu, ndipo wakarya utheka nga ndi ng'ombe. Wakazumbwa na jumi la kuchanya thupi, ndipo sisi lakhe likakura kuŵa litali nga ndi mahungwa gha nombo ndipo njoŵe zakhe zikaŵa nga ndi za viyuni.

³⁴Pa umaliro wa virimika vinkhonde na viŵiri vira, ine Nebukadinezara nkhinuskira maso ghane kwa Chiuta, ndipo unthu wane ukawereramo. Penepapo nkharumba Chikurukuru, kuwonga na kuchindika uyo ngwa muyirayira nkhati, “Muwuso wakhe ngwa muyirayira, ufumu wakhe ngwa kukhalirira ku miwiro yose.

³⁵Ŵanthu wose mu charu ŵakupimika kuŵa nga nchinthu chawaka. Iyo wakuchita umo wakukhumbira pamoza na ŵangelo kuchanya, ndiposo pamoza na awo ŵakukhara mu charu cha pasi. Palije na yumoza uyo wangasuska nkhongono yakhe, panji kuti, Kasi mukuchitachi?”

³⁶Pa nyengo yeneiyo unthu wane, nchindi na uchindami wa ufumu wane vikawereramo kwa ine kupereka uchindami ku ufumu wane. Ŵarongozgi pamoza na nduna zane zikandipenja ndipo ŵakandiwezgeraso pa ufumu wane na kuŵa wakuzirwa kuruska pakudanga.

³⁷Sono ine Nebukadinezara nkhurumba na kuchindika Chiuta mweneuyo ndi Karonga wa kuchanya, pakuti milimo yakhe yose njakunyoroka ndipo nthowa zakhe ndi za urunji. Ndipo awo ŵakujikuzga, wakumanya kuŵakhizgira pasi.