Read new_tumbuka_bible Daniyele 5 Bible Online

Daniyele 5 - new_tumbuka_bible bible

Daniyele 5

¹Nyengo yimoza, Karonga Belishazara wakaŵa na chiphikiro chikuru kuchitira nduna zakhe 1,000 za charu chakhe chose apo iyo wakamwanga vinyo panthazi pawo.

²Belishazara, wakati wamba kukhuta vinyo wakalangula kuti viteŵetero vya golide na vya siliva vya mu Nyumba ya Chiuta, ivyo wiske Nebukadinezara wakatora ku Yerusalemu, vitoreke na kwiza navyo, mwakuti iyo pamoza na nduna zakhe, ŵawoli ŵakhe, na ŵawoli ŵakhe ŵachoko ŵamweremo.

³Penepapo viteŵetero vya golide vira ivyo vikafuma ku Nyumba ya Chiuta ku Yerusalemu ŵakiza navyo. Ntheura karonga, nduna zakhe, ŵawoli ŵakhe, na ŵawoli ŵakhe ŵachoko ŵakamweramo.

⁴Ŵakamwa vinyo uku ŵakurumba ŵachiuta ŵa golide ŵa siliva, ŵa mkuŵa, ŵa chisulo, ŵa khuni, na ŵa libwe.

⁵Kwa mabuchibuchi pakawoneka woko la munthu likulemba pa chiliŵa cha nyumba ya ufumu, kuthyana waka na chakuŵikapo nyali, ndipo karonga wakawona woko lira likulemba.

⁶Penepapo chisko cha karonga chikasintha, maghanoghano ghakhe ghakachiruskika, nkhongono zikamara mu malundi ghakhe, ndipo makongono ghakamba kumbwambwantha.

⁷Karonga wakachemerezga na mazgu ghakuru kuti ŵamayere, ŵawukwi, ŵamaula, ndiposo na ŵamanyinyenyezi ŵa charu cha Babuloni ŵize. Ndipo iyo wakati ku ŵavinjeru aŵa ŵa charu cha Babuloni, Yose uyo wati waŵazge malemba agha, na kundiphalira ching'anamulo chakhe, nditi ndimuvwarike munjilira uchesamu na majuda gha golide mu singo yakhe. Iyo wati waŵenge munthu wa chitatu mu mazaza mu ufumu wane.

⁸Ŵa vinjeru wose ŵa karonga ŵakiza, kweni ŵakatondeka kuŵazga malemba nanga nkhumanya ching'anamulo chakhe.

⁹Ntheura Karonga Belishazara wakopa kwakuruska pakudanga, chisko chakhe chikasinthika chomene, ndipo nduna zakhe zikamanya chara chakuchita.

¹⁰Fumukazi yikati yapulika ivyo karonga na nduna zakhe ŵakayowoyanga yikiza ndipo yikanjira mu nyumba ya chiphikiro. Iyo yikati, Muŵe na umoyo utali imwe karonga! Maghanoghano ghinu ghareke kumusuzgani, nesi chisko chinu chireke kusintha.

¹¹Mu ufumu winu muno muli munthu uyo wali na mzimu wa ŵachiuta ŵakupatulika. Mu nyengo ya ŵawiskemwe wakamanyikwa chomene kuti wali na umanyi na vinjeru vya uchiuta. Ntheura Karonga Nebukadinezara wakamwimika kuŵa wa mazaza pa ŵamayere, ŵamaula, ŵawukwi na ŵamanyinyenyezi ŵa charu cha Babuloni.

¹²Munthu uyu ndi Daniyele uyo karonga wakamuchema kuti Beliteshazara. Iyo wali na mzimu uweme chomene na wa mahara, wa chawanangwa chakumanya kung'anamulira maloto, vinthanguni, na wa kuzgora mafumbo ghanonono. Mweneuyu ndiyo mumucheme, ndipo wati wamuphalirani ching'anamulo chakhe.

¹³Penepapo ŵakiza nayo Daniyele panthazi pa karonga. Karonga wakati kwa iyo, “Kasi ndiwe Daniyele, yumoza wa ŵamikori ŵa chiYuda uyo karonga, ŵadada ŵakafuma nawo ku charu cha Yuda?

¹⁴Ndapulika kuti mzimu wa ŵachiuta ŵakupatulika uli mwa iwe, ndipo ukumanyikwa kuti uli na, umanyi wa pa dera chomene, mahara na vinjeru.

¹⁵Sono, ŵavinjeru na ŵawukwi ŵangwiza panthazi pane kuti ŵaŵazge malemba agha na kundimanyiska ching'anamulo chakhe, kweni ŵakatondeka kusanga ching'anamulo chakhe.

¹⁶Ine ndapulika kuti iwe ungamanya kundiphalira ching'anamulo na kuzgora mafumbo ghanonono. Usange sono ungaŵazga malemba na kundiphalira ching'anamulo chakhe, nditi ndikuvwarike munjilira uchesamu na majuda gha golide mu singo yako, ndipo uti uŵenge munthu wa chitatu mu mazaza mu ufumu wane.”

¹⁷Daniyele wakazgora karonga wakati, “Ine kuti nkhukhumba vyawanangwa vyinu chara, ndipo njombe yinu nayo mungapereka kwa munthu munyakhe. Ndipouli ine nditi ndimuŵazgirani malemba agha imwe karonga, na kumuphalirani icho ghakung'anamula.”

¹⁸“Imwe karonga, Chiuta Chikurukuru wakapereka nkhongono, uchindami na ufumunkhuru ku ŵawiskemwe Nebukadinezara.

¹⁹Ndipo chifukwa cha nkhongono zeneizi izo Chiuta wakapereka ku ŵawiskemwe, ŵamitundu yose, ŵa mafuko ghose, na ŵa viyowoyero vyose, ŵakatenthema panthazi pakhe na kuŵa na wofi. Ŵawiskemwe ŵakakomanga yose uyo ŵakakhumbanga kukoma, ndipo yose uyo ŵakakhumba kumureka wa moyo, ŵakamurekanga. Yose uyo ŵakakhumba kumukwezga, ŵakamukwezganga, ndipo yose uyo ŵakakhumba kumukhizga ŵakamukhizganga.

²⁰Kweni para wakamba kujiwona na kuŵa na mtima unonono wakajikuzga, wakakhizgika pa ufumu wakhe, ndipo uchindami wakhe ukawuskikako kwa iwo.

²¹Wakachimbizgikira kutali na ŵanthu. Maghanoghano ghakhe ghakaŵa nga ndi gha chinyama. Iwo ŵakenera kuya kakhara na ŵaboli ku thengere. Ŵakaryanga utheka nga ndi ng'ombe, ndipo thupi lawo likazumbwa na jumi la kuchanya, wakasuka wamanya kuti Chiuta Chikurukuru ndiyo wakuwusa maufumu gha ŵanthu, ndipo wakwimika waliyose uyo wakukhumba kuti ndiyo wawuse.

²²Kweni iwe, Belishazara mwana wawo, kuti ulije kujiyuyura, nangauli ukamanya makora vya cheneichi.

²³Mu malo mwakhe, iwe wajikuzga panthazi pa Fumu ya kuchanya. Viteŵetero vya mu nyumba yakhe vyatorekera panthazi pako, ndipo iwe na nduna zako, ŵawoli wako, ŵawoli wako ŵachoko mwamweramo vinyo. Iwe warumba ŵachiuta ŵa siliva, ŵa golide, ŵa mkuŵa, ŵa chisulo, ŵa khuni, na ŵa mawe, awo kuti ŵangawona chara, panji kupulika nesi kumanya. Iwe kuti wachindika Chiuta chara kwa mweneuyo kukufuma muli muvuchi wako, mweneuyo nchitopoko cha mendero ghako yose.”

²⁴Ichi ndicho chifukwa Chiuta wakatuma woko lakhe na kulemba malemba agha.

²⁵Malemba agho ghakalembeka ndi agha: MENE, MENE, TEKELE, PARISINI.

²⁶Kang'anamuliro kakhe ndi aka: MENE, ndiko kuti, Chiuta wapenda mazuŵa gha kuwusa kwako, ndipo kwakhara pachoko waka kuti ghamare.

²⁷TEKELE, ndiko kuti, wapimika pa sikelo, ndipo wakuwona kuti wapereŵera.

²⁸PARISINI, ndiko kuti, ufumu wako wagaŵika, na kupika ku ŵaMede na ku ŵaPeresiya.

²⁹Penepapo Belishazara wakalangula kuti Daniyele ŵamuvwarike munjilira uchesamu na majuda gha golide mu singo ghakhe. Ichi chikapharazgika kuti Daniyele wimikika kuŵa wa mazaza wa chitatu mu ufumu ura.

³⁰Mu usiku wenewura, Belishazara karonga wa charu cha Babuloni wakakomeka.

³¹Ndipo Dariyusi muMede wakapoka ufumu. Pa nyengo iyi Dariyusi wakaŵa na virimika 62.