Read new_tumbuka_bible Daniyele 6 Bible Online

Daniyele 6 - new_tumbuka_bible bible

Daniyele 6

¹Chikamukondweska Dariyusi kwimika pa ufumu ura ŵimiliri ŵakukwana 120 kuti ŵaŵe ŵakuwusa mu ufumu wakhe wose.

²Pachanya pa ŵimiliri aŵa pakaŵa ŵarongozgi ŵatatu mu awo yumoza wawo wakaŵa Daniyele. Ŵimiliri ŵara ŵakenera kupereka makani ghawo kwa ŵarongozgi ŵeneaŵa mwakuti karonga wareke kusuzgika.

³Daniyele mweneyuyu wakarongora kuti wangagwira nchito makora chomene kuruska ŵarongozgi ŵanyakhe ŵararaŵarara na ŵimiliri, chifukwa mzimu wa pa dera ukaŵa mwa iyo. Ntheura karonga wakanozgera kumwimika pachanya pa ufumu wakhe wose.

⁴Sono ŵarongozgi ŵanyakhe ŵararaŵarara na ŵimiliri ŵara ŵakamba kupenja nthowa kuti ŵasange vifukwa vyakumupacha navyo Daniyele pa makani gha ufumu ura. Kweni iwo kuti ŵakavisanga chara nanga ndi mrandu uliwose, pakuti wakaŵa wakugomezgeka, ndipo mukaŵavye usovyi panji kafukwa mwa iyo.

⁵Ntheura ŵakati kwa yumoza na munyakhe, “Kuti titi tisange chifukwa chilichose cha kumupacha nacho Daniyele chara, pekhapekha chikhwaskane na dango la Chiuta wakhe.

⁶“Penepapo ŵarongozgi ŵararaŵarara na ŵimiliri ŵara ŵakazomerezgana kuti ŵarute kwa karonga, ndipo ŵakati kwa iyo, Imwe Karonga Dariyusi, muŵenge na umoyo utali!

⁷Ise tose ŵarongozgi ŵararaŵarara ŵa mu ufumu winu, ŵeruzgi ŵa charu, ŵimiliri ŵinu, ŵarongozgi ŵinu, ndiposo na nduna, takhara pasi ndipo tazomerezgana kuti, imwe karonga mwimike dango, ilo lingasinthikanga chara. Dango ili liŵe lakuti mu mazuŵa 30 agho ghakwiza, munthu yose uyo wati warombe kalikose kwa chiuta munyakhe panji kwa munthu yunji kuwuskako kwa imwe karonga, waponyeke mu chiŵaya cha nkharamu.

⁸Sono imwe karonga, mulikhozge dango ili pakulembapo zina linu, mwakuti lireke kusinthika. Pakuti dango la ŵaMede na ŵaPeresiya kuti lingasinthika chara.”

⁹Ntheura Karonga Dariyusi wakalembapo zina lakhe pa chikarata chira kuti liŵe dango.

¹⁰Daniyele wakati wamanya kuti dango ili limikika, wakaruta ku nyumba yakhe mu chipinda cha pachanya icho vidangazi vyakhe vikarazga ku Yerusalemu. Mwenemura wakajikama katatu mu zuŵa limoza, kuromba na kurumba Chiuta wakhe, nga ndi umo wakachitiranga nyengo kale.

¹¹Sono ŵanthu ŵara ŵakiza pamoza ndipo ŵakamusanga Daniyele wakuromba na kuŵeyerera panthazi pa Chiuta wakhe.

¹²Penepapo ŵakiza kwa karonga ndipo pakumukumbuska vya dango lira ŵakati kwa iyo, “Imwe karonga, asi imwe muli kwimika dango kuti mu mazuŵa 30 agho ghakwiza, munthu yose uyo wati warombe kalikose kwa chiuta munyakhe panji kwa munthu yunji kuwuskako kwa imwe karonga, waponyeke mu chiŵaya cha nkharamu.” Karonga wakazgora wakati, “Chinthu ichi nchakukhozgeka nadi, chili nga ndi dango la ŵaMede na ŵaPeresiya, ilo kuti lingasinthika chara.”

¹³Ntheura ŵakati kwa karonga, “Daniyele, yumoza wa ŵamikori uyo wakafuma ku charu cha Yuda, kuti wakuchindika imwe karonga chara nanga ndi dango ilo imwe muli kwimika. Iyo wakuromba kwa Chiuta wakhe katatu pa zuŵa.”

¹⁴Para karonga wakapulika mazgu agha, wakaŵa na chitima chomene. Wakayezga kughanaghanira na umo wangathaskira Daniyele. Ntheura wakalimbalimba mpaka dazi likanjira.

¹⁵Sono ŵarwani aŵa ŵakawunganaso kuti ŵapangane kuruta kuya kawonana na karonga, ndipo ŵakati kwa iyo, “Imwe karonga mumanye kuti, kwakuyana na dango la ŵaMede na ŵaPeresiya kuti palije dango panji languro lakwimikika na karonga ilo lingasinthika.”

¹⁶Sono karonga wakalangula kuti Daniyele ŵakamutore ndipo waponyeke mu chiŵaya cha nkharamu. Kweni karonga wakati kwa Daniyele, Chiuta wako mweneuyo ukusopa nyengo zose, wakuthaske.

¹⁷Sono pa muryango wa chiŵaya cha nkharamu ŵakabenekererapo libwe. Karonga wakadindapo chidindo chakhe, ndipo ŵarongozgi ŵararaŵarara ŵara nawo ŵakadindapo chawo, mwakuti paŵavye na chimoza chakusintha pa makani gha Daniyele.

¹⁸Penepapo karonga wakawerera ku nyumba yakhe ya ufumu, ndipo wakachezera usiku wose wakuziŵizga kurya. Kukaŵavye mwanakazi na yumoza wakusenderera pafupi na iyo, ndipo maso ghakhe ghakaŵa gwa ghambula tulo.

¹⁹Kukati kwacha, karonga wakawuka, ndipo maluŵiro wakaruta ku chiŵaya cha nkharamu.

²⁰Para karonga wakasenderera kufupi na chiŵaya cha nkharamu, wakachemerezga na mazgu gha chitima wakati, “Iwe Daniyele muteŵeti wa Chiuta wamoyo, kasi Chiuta wako, uyo ukumuteŵetera nyengo zose wakuthaska ku nkharamu?”

²¹Daniyele wakazgora wakati, “Karonga, muŵe na umoyo utali!

²²Chiuta wane wakatuma mungelo wakhe kwiza kajara milomo ya zinkharamu, ndipo kuti zandipwepweteka chara. Iyo kuti wakusanga kafukwa mwa ine chara, nanga pangaŵa panthazi pa imwe karonga kuti ndili kuchita kanthu kaheni chara.”

²³Penepapo karonga wakakondwa kwakuruska, ndipo wakalangula kuti ŵamufumiskemo Daniyele mu chiŵaya cha nkharamu. Para ŵakachita ntheura, ŵakasanga kuti Daniyele walije kupwetekeka chara, chifukwa wakagomezga mwa Chiuta wakhe.

²⁴Ntheura karonga wakalangula kuti awo ŵakamupachanga Daniyele ŵakatoreke na kuponyeka mu chiŵaya cha nkharamu, iwo pamoza na ŵana ŵawo, na ŵawoli ŵawo. Ndipo pambere ŵandafike pasi pa chiŵaya chira, nkharamu zikaŵapokerera waka na kutekenyura viwangwa vyawo vyose tuchokotuchoko.

²⁵Ntheura Karonga Dariyusi wakaŵalembera ŵamitundu yose, ŵa mafuko ghose na ŵa viyowoyero vyakupambanapambana awo ŵakukhara mu charu chose cha pasi. Iyo wakati, “Mutende uŵenge mwa imwe mose.”

²⁶Ine nkhulangula kuti, “Mu charu chane chose cha ufumu wane, ŵanthu ŵakwenera kopa na kuchindika Chiuta wa Daniyele.” “Pakuti iyo ndi Chiuta wa moyo, wakukhalirira kwa muyirayira, ufumu wakhe kuti upankhukenge chara, kuwusa kwakhe kuti kumarenge chara.

²⁷Iyo wakuthaska na kuponoska, wakuchita vya minthondwe na vyakuzukumiska, kuchanya na pa charu cha pasi. Iyo ndiyo waponoska Daniyele, ku nkhongono ya nkharamu.”

²⁸Ntheura Daniyele wakakhara makora mu nyengo ya kuwusa kwa Dariyusi na kwa Kirusi muPeresiya.