Read new_tumbuka_bible Daniyele 7 Bible Online

Daniyele 7 - new_tumbuka_bible bible

Daniyele 7

¹Mu chirimika chakudanga cha kuwusa kwa Belishazara, karonga wa charu cha Babuloni, Daniyele wakaŵa na maloto na mboniwoni apo wakagona pa chitara chakhe na usiku. Penepapo wakalemba maloto ghara ndipo ivi ndivyo ghakadumula.

²Daniyele wakati, “Mu mboniwoni yane na usiku nkhawona mphepo zinayi za kuchanya zikuputa kosekose kuti ziwuske nyanja yikuru.

³Mu nyanja mura mukafuma vikoko vinayi vikuru, chose chikapambana na chinyakhe.

⁴Chikoko chakudanga chikaŵa nga ndi nkharamu, kweni chikaŵa na mapapindo gha nombo. Apo nkhalaŵiskanga, nkhawona kuti mapapindo ghakhe ghakukunthika ndipo ŵakachiwuskapo pasi na kuchimika pa malundi ghaŵiri nga ndi munthu. Chikapikaso vinjeru kuŵa nga vya munthu.”

⁵“Nkhawona chikoko chinyakhe cha chiŵiri, icho chikaŵa nga ndi nkharamira. Chikakutumuka ku lwegha lumoza ndipo chikaŵa na mbambo zitatu mu mlomo wakhe pakati pa mino ghakhe. Chikoko chira ŵakachiphalira ŵakati, ‘Wuka, urye nyama yinandi.’ ”

⁶Pamanyuma pa chikoko ichi, nkhawona chikoko chinyakhe icho chikaŵa nga ndi nyalubwe. Pa muwongo wakhe chikaŵa na mapapindo ghanayi nga gha chiyuni. Chikaŵa na mitu yinayi ndipo chikapika mazaza kuti chiyambe kuwusa.

⁷Pamanyuma pa ichi, mu mboniwoni yane ya usiku, nkhawona chikoko cha chinayi icho chikaŵa chakofya na chakutenthemeska ndipo chikaŵa cha nkhongono zakuruska. Chikaŵa na mino ghakuru gha chisulo. Chose icho chikakora chikamanya kuswa tuchokotuchoko na kumirimitizga, ndipo chikakandirizgira pasi ivyo vikakharapo. Pakuŵa na masengwe khumi, chikapambana na vikoko vinyakhe vyose ivyo vikawoneka pambere icho.

⁸Apo nkhaŵa ndichali kulanguruka na masengwe ghara, nkhawona lusengwe lunyakhe luchoko lukufuma pakati pa masengwe ghara. Masengwe ghakudanga ghatatu ghara ghakazgurika kuti luchoko lura lukharepo. Mu lusengwe luchoko lura mukaŵa maso nga nga munthu, ndiposo na mlomo uwo ukayowoyanga mwakujikuzga.

⁹Apo nkhawonanga, vizumbe vikaŵikika ndipo yumoza uyo ndi Chiyamwaka wakakharapo. Vyakuvwara vyakhe vikaŵa vituŵa nga ndi nyathutwe. Sisi la ku mutu wakhe likaŵa lituŵa nga ndi thonje. Chizumbe chakhe chikaŵa dimi la moto, mikombero ya chizumbe chira yikagoleranga moto.

¹⁰Mronga wa moto ukafumanga, na kwenda panthazi pakhe. Ŵanthu vikwi na vikwi, ŵakamuteŵeteranga. Awo ŵakima panthazi pakhe, ŵakaŵa ŵambula mapendeko. Mphara yakweruzga yikambika, ndipo mabuku ghakajurika.

¹¹Chifukwa cha mazgu ghakujikuzga agho lusengwe lura lukayowoyanga, nkhalaŵiskiska mpaka chikoko chira chikakomeka. Thupi lakhe likaparanyika na kuponyeka pa moto.

¹²Vikoko vinyakhe vira vikapokeka mazaza gha kuwusa, kweni vikazomerezgeka kuŵa vyamoyo kwa kanyengo.

¹³Na usiku nkhawona mu mboniwoni, yunji nga ndi mwana wa munthu, wakwiza mu maŵingu. Wakasendereranga kwa Chiyamwaka yura, ndipo ŵanji ŵakiza nayo panthazi pakhe.

¹⁴Wakapokera mazaza, uchindami na nkhongono za ufumu, kuti ŵamitundu yose, ŵa mafuko ghose, na ŵa viyowoyero vyose ŵamuteŵeterenge. Mazaza ghakhe nga muyirayira swii, kuti ghamkumara chara. Ufumu wakhe nawo kuti wamkuparanyika chara.

¹⁵Ine Daniyele, nkhasuzgika chomene mu mtima wane ndipo ivyo nkhawona mu mboniwoni vikandichiruska.

¹⁶Nkhasenderera kufupi na yumoza wa awo ŵakimilira penepara na kumufumba ching'anamulo cha vinthu vira. Iyo wakandiphalira icho vinthu vira vikang'anamulanga.

¹⁷Iyo wakati, “Vikoko vikuru vinayi vira ndi ŵakaronga ŵanayi awo ŵizamkuŵako mu charu cha pasi.

¹⁸Kweni ŵakupatulika ŵa Chiuta Chikurukuru ŵati ŵapoke ufumu uwu na kukhara nawo kwa muyirayira swii.”

¹⁹Sono nkhakhumba kumanya ching'anamulo chenecho cha chikoko cha chinayi chira, icho chikapambana na vinyakhe vyose. Chikoko chira chikaŵa chakofya chomene, cheneichi chikaŵa na mino gha chisulo na njoŵe za mkuŵa, na vyeneivi chikamanya kuryera, kuteketera tuchokotuchoko na kukandirizgira pasi chose icho chikakharapo.

²⁰Nkhakhumbaso kumanya vya masengwe khumi agho ghakaŵa pa mutu wakhe, na lusengwe lunyakhe ulo lukamera lweneulo lukawuskapo masengwe ghanyakhe ghatatu ghara. Lusengwe lura lukaŵa na maso na mlomo pakuyowoyera mazgu ghakujikuzga lweneulo lukaŵa lukuru kuruska ghanyakhe.

²¹Apo nkhawonanga, lusengwe lura lukarwanga nkhondo na ŵakupatulika ŵara, ndipo lukaruskanga.

²²Nkhondo yikarutilira mpaka apo Chiyamwaka yura wakizira, apo weruzgi ukapharazgika kuti ŵakupatulika ŵa Chiuta Chikurukuru ŵara ndiwo ŵakuruska, na pa nyengo apo ŵakupatulika ŵara ŵakapokera ufumu.

²³Iyo wakandizgora kuti, “Chikoko cha chinayi ichi ndi ufumu wa chinayi, uwo uti uŵengeko pa charu, uwo upambanenge na maufumu ghose. Wizamkuparanya charu chose cha pasi, wizamkuchikandirizgira pasi, na kuchiphwanya tuchokotuchoko.

²⁴Masengwe khumi gha ufumu ura, ndi ŵakaronga khumi awo ŵamkuŵako. Ndipo wamkwiza karonga munyakhe, uyo wamkupambana na ŵakudanga ŵara. Iyo wizamkuŵathereska ŵakaronga ŵatatu ŵara.

²⁵Iyo wizamkususka Chiuta Chikurukuru, wizamkuyuzga ŵakupatulika ŵa Chiuta Chikurukuru. Wizamkukhumba kusintha nyengo za viphikiro, na marango gha visopo. Ŵakupatulika ŵizamkuwusika na karonga uyu, pa virimika vitatu na hafu.

²⁶Kweni mphara yamkweruzga, ndipo ufumu wakhe wamkupokeka, kuti umare na kupankhuka kwa muyirayira.

²⁷Ufumu, mazaza na ukuru wa maufumu gha pa charu cha pasi, ghamkuperekeka ku ŵanthu ŵakupatulika ŵa Chiuta Chikurukuru. Ufumu wawo wamkuŵa wa muyirayira, ndipo ŵamazaza wose ŵamkumuteŵetera na kumupulikira.”

²⁸Uwu ndiwo umaliro wa makani agha. Sono ine Daniyele maghanoghano ghane ghakandichiruska chomene, na kusintha kaŵiro kane. Kweni nkhaghasunga makani agha mu mtima wane.